الماتىداعى «بوبەك» ۇلتتىق عىلىمي-پراكتيكالىق, ءبىلىم بەرۋ جانە ساۋىقتىرۋ ورتالىعىندا «بوبەك» قايىرىمدىلىق قورىنىڭ پرەزيدەنتى, ء«وزىن ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسىنىڭ اۆتورى سارا نازارباەۆا ەلىمىزدىڭ بىرقاتار وڭىرىنەن كەلگەن ءبىلىم بەرۋ ۇيىمدارىنىڭ باسشىلارىمەن كەزدەستى.
قازاقستاننىڭ ءبىرىنشى حانىمى سارا نازارباەۆانىڭ «سۇيىسپەنشىلىك ساباقتارى» تاقىرىبى اياسىندا پەداگوگتار, وقۋشىلار جانە تۇلەكتەرمەن ءجيى-ءجيى كەزدەسىپ تۇرۋدى جاقسى داستۇرگە اينالدىرعانى بارشاعا ءمالىم. بۇعان دەيىن دە وسىنداي يگى شارالاردىڭ تالايىنا كۋا بولعانىمىز بار. ال وسى جولى وتكەن جيىنعا ءبىلىم جانە عىلىم مينيسترلىگى, وبلىستىق ءبىلىم باسقارماسى وكىلدەرى, ء«وزىن ءوزى تانۋ» ءپانى بويىنشا بىلىكتىلىگىن ارتتىرۋ كۋرسىنا ەلىمىزدىڭ بىرقاتار ايماعىنان ارنايى كەلگەن مەكتەپ ديرەكتورلارى مەن ولاردىڭ ورىنباسارلارى قاتىستى.
– ء«وزىن ءوزى تانۋ» – قانداي دا كۇردەلى جاعدايدا ادامي قاسيەت جانە ادامگەرشىلىك قۇندىلىقتان ارىلماي, ابزال ازامات جانە ەلگە ەلەۋلى تۇلعا بولىپ قالىپتاسۋدىڭ قىر-سىرىن ۇيرەتەتىن ۇلكەن ءىلىم. ول قيىندىققا مويىماۋدى, جاۋاپتى ساتتە شۇعىل ءارى دۇرىس شەشىم قابىلداۋدى جانە ءوز تاعدىرىڭا اسا جاۋاپكەرشىلىكپەن قاراۋدى ۇيرەتەدى. اللانىڭ ادال جولىمەن ومىردەگى ءوز جولىڭدى تابۋعا, كوزدەگەن ماقساتىڭا جەتۋگە ۇگىتتەيدى. ء«وزىن ءوزى تانۋ» ءپانى جاستاردىڭ بويىندا ماحاببات, ادامگەرشىلىك, مەيىرىمدىلىك, يماندىلىق سياقتى جالپىادامزاتتىق قۇندىلىقتاردى قالىپتاستىرادى, ولاردى رۋحاني ادامگەرشىلىكتىڭ نارىمەن سۋسىنداتادى, – دەيدى سارا الپىسقىزى.
«بوبەكتەگى» باسقوسۋ بارىسىندا رەسپۋبليكامىزدىڭ ءار وڭىرىنەن جينالعان ءبىلىم بەرۋ ۇيىمدارىنىڭ قىزمەتكەرلەرى دە وسى تاقىرىپقا بايلانىستى قىزىقتى اڭگىمەلەر ءوربىتىپ, كوپشىلىكپەن وي ءبولىستى. ولاردىڭ بارلىعى دا وقۋشىلار ءۇشىن ءوزىن-ءوزى تانۋعا, ءوزىن دامىتۋعا باعىتتالعان جۇمىستار تەك مەكتەپ قابىرعاسىندا عانا ەمەس, وتباسىندا دا جالعاسىن تاۋىپ, اتا-انالاردىڭ كومەگىمەن ءوزارا ىقپالداستىق باعىتتا جۇرگىزىلۋى كەرەكتىگىن ايتتى. سەبەبى ء«وزىن-ءوزى تانۋ» – جارىق دۇنيەدە ءومىر ءسۇرىپ جاتقان ءار جەتكىنشەككە ءوزىن ادام ەكەنىن تەرەڭ سەزىنۋگە, ادامدارعا قۋانىش سىيلاي بىلۋگە باۋليدى. جانىندا جۇرگەن اياۋلى ادامداردىڭ بار ەكەنىن ۇعىنۋعا كومەكتەسەدى. بورىش پەن پارىزعا ادال بولۋعا تاربيەلەيدى.
عالىم سۇلەيمەن, «ەگەمەن قازاقستان»
الماتى