جاڭعىرتۋ جۇمىستارى جامبىل وبلىسىن تۇلەتتى

ءباسپاسوز جيىنىندا وبلىس باسشىسى ەلباسىنىڭ «رۋحاني جاڭعىرۋ» باعدارلاماسىن ىسكە اسىرۋ بويىنشا جۇرگىزىلگەن جوبالار مەن اتقارىلعان جۇمىستار جايىن ەگجەي-تەگجەيلى باياندادى. وبلىستا باعدارلامالىق ماقالادان تۋىندايتىن «اتامەكەن», «تاربيە جانە ءبىلىم», «رۋحاني قازىنا», «اقپارات تولقىنى» كىشى باعدارلامالارى مەن «قازاق ءتىلىن لاتىن الىپبيىنە كوشىرۋ», «100 جاڭا كىتاپ», «تۋعان جەر», «قازاقستاننىڭ كيەلى جەرلەرىنىڭ گەوگرافياسى», «جاھانداعى زاماناۋي قازاقستاندىق مادەنيەت», «100 جاڭا ەسىم» ارنايى جوبالارى ءساتتى ىسكە اسىرىلىپ جاتقاندىعىن اتاپ ءوتتى. «باعدارلاما اياسىندا وڭىرلىك جوبالىق كەڭسە قۇرىلىپ, ساراپشىلار كەڭەسى ءوز جۇمىسىنا كىرىستى. سونداي-اق «رۋحاني جاڭعىرۋ» باعدارلاماسىنىڭ جوبالارىنا ارنالعان ينتەراكتيۆتى الاڭدار اشىلدى. وڭىردەن شىققان 80-گە جۋىق كاسىپكەر-مەتسەناتتاردىڭ ەسەبىنەن جالپى قۇنى 817 ميلليون تەڭگە بولاتىن 23 الەۋمەتتىك نىسان پايدالانۋعا بەرىلدى. بيىل جالپى قۇنى 1,5 ميلليارد تەڭگە بولاتىن 29 الەۋمەتتىك نىسان ەل يگىلىگىنە بەرىلەتىن بولادى», دەدى اكىم.

ا.مىرزاحمەتوۆ اتاپ وتكەندەي, ۇلى جىبەك جولىنىڭ بويىنداعى ەجەلگى قالا رەتىندەگى تاراز شاھارىنىڭ باي تاريحىن تۋريزم كلاستەرىن دامىتۋدا كادەگە جاراتۋ جوسپارى تۇزىلگەن. ناتي­جە­سىندە «قازاقستاننىڭ ساكرالدى گەوگرافيا­سى» ارنايى جوباسىنىڭ قاسيەتتى 100 نىسان تىزىمىنە وبلىستان 8 تاريحي-مادەني ورنى ەنگىزىلدى. جامبىل وبلىسىنان قازاقستاننىڭ جەرگىلىكتى ماندەگى وڭىرلىك قاسيەتتى ورىندارىنىڭ كارتاسىنا ۇسىنىلعان 27 ەسكەرتكىش مادەنيەت جانە سپورت مينيسترلىگىنىڭ جانە «قاسيەتتى قازاقستان» عىل­ى­مي-زەرتتەۋ ورتالىعىنىڭ قولداۋىمەن شىققان «قازاق­ستاننىڭ جالپىۇلتتىق قاسيەتتى نىساندارى» جانە «قازاقستاننىڭ وڭىرلىك قاسيەتتى نىساندارى» كىتاپتارىنا ەنگەن. سونداي-اق مادەنيەت جانە سپورت مينيسترلىگى, جامبىل وبلىسىنىڭ اكىمدىگى جانە «قازاقستان تەمىر جولى» اق اراسىندا «اقىرتاس» تاريحي كەشەنىن قالپىنا كەلتىرۋدى بىرلەسە جۇرگىزۋ بويىنشا مەموراندۋمعا قول قويىلعان.

ايتقانداي, باعدارلامالىق ماقالانىڭ نەگى­زىندە وبلىس ورتالىعىنىڭ وزىندىك ساۋلەت كەلبە­تىن قالىپتاستىرۋعا ءجىتى نازار اۋدارىلعان. سوڭعى ەكى اي ىشىندە «جەڭىس» ساياباعىن قايتا جاڭعىرتۋ جۇمىستارى قارقىندى جۇرگىزىلگەن. سول سەكىلدى تاراز قالاسىنداعى بۇرىنعى بازار اۋماعىنداعى «شاحريستان» ساۋدا ورتالىعىنىڭ اۋماعى دا وزگەشە كەيىپكە ەنبەك. مۇندا «كونە تاراز» ارحەولوگيالىق مادەني كەشەنىنەن بولەك, وقۋشىلار سارايى, نەكە سارايى سىندى عيماراتتار بوي كوتەرەدى. ءبىر سوز­بەن ايتقاندا, ەسكى بازاردىڭ ورنى قالانىڭ رۋحاني, مادەني ورتالىعى رەتىندە قالىپتاسىپ, قالا تۇرعىندارى مەن قوناقتارى ءبىر ءسات تىنىستايتىن ورىنعا اينالماق.

جالپى, قوعامنىڭ ساناسىنا سەرپىن بەرەتىن باعدارلامانىڭ جەكەلەگەن تارماقتارى ءبىلىم سالاسىندا دا كورىنىس تابۋدا. ماسەلەن, جامبىل وبلىسىنداعى جالپى ءبىلىم بەرەتىن ورتا مەكتەپتەردە «ولكەتانۋ», «تۋعان ولكە تاريحى», كوللەدجدەردە «تاريحي ولكەتانۋ», «ادەبي ولكەتانۋ» كۋرستارى ەنگىزىلىپ, اپتاسىنا 1 رەت «قازاقستان تاريحى», «قازاق ادەبيەتى», «گەوگرافيا» ساباقتارى مۋزەيلەردە, تاريحي عيماراتتاردا وتكىزىلۋدە. «قورىتا ايتقاندا, جامبىلدىقتار باعدار­لا­مادا كوزدەلگەن ايقىن ماقساتتارعا قول جەت­كىزۋگە قولداۋ ءبىلدىرۋ ءۇشىن بار مۇمكىندىكتەرىن پايدالانۋعا ءازىر. ەسەسىنە جەرگىلىكتى بيلىكتە كيەلى ءوڭىردىڭ وزىندىك ەرەكشەلىكتەرى مەن قۇندىلىقتارىن جاڭعىرتۋ, ولاردى ناسيحاتتاۋ جۇمىستارىن جالعاستىرا بەرۋگە نيەتتى», دەدى ا.مىرزاحمەتوۆ.

دينارا بىتىك, «ەگەمەن قازاقستان»