ادام ومىرىنە قاۋىپ تونگەن كەزدە العاشقى جەدەل جاردەمدى قالاي جاساۋ كەرەكتىگى ۇيرەتىلدى

ترەنينگكە شاقىرىلعان جۋرناليستەر ادامنىڭ جۇرەگى قىسىپ قالعاندا قانداي كومەك شۇعىل جاساۋ كەرەك, بالالار بوگدە زات جۇتىپ قويعاندا نە ىستەۋ قاجەت, جاراقات العان كەزدە قولدى, اياقتى قوزعالتپاي ۇستاۋ, تاڭىپ بايلاۋ ءتارىزدى العاشقى كومەكتەردىڭ كوپتەگەن تۇرلەرىن ۇيرەندى.

بۇل كۋرستار سەمەيدە تۇڭعىش رەت ۇيىمداستىرىلىپ جاتىر ەكەن. بۇگىندە رەسپۋبليكانىڭ بارلىق ايماعىندا 100-دەن اسا قاتىسۋشى وسىنداي ترەنينگتەن وتۋدە.

- ماعان وسى كۋرس وتە ۇنادى,-دەدى وبلىستىق «رۋدنىي التاي» گازەتىنىڭ ءتىلشىسى ەكاتەرينا گۋلياەۆا,-ارينە, ءبىز جۋرناليستەر ءتۇرلى وقيعالاردىڭ ورتاسىندا جۇرەمىز. سوندا ادامدارعا كومەك كورسەتۋ ءبىزدىڭ پارىزىمىز. وسىنداي ترەنينگ ۇيىمداستىرىپ وتىرعان سەمەي مەملەكەتتىك مەديتسينا ۋنيۆەرسيتەتىنىڭ ۇجىمىنا ۇلكەن راحمەت.

ماسەلەن, جول كولىك اپاتىنا ءتۇسىپ قالعاندا زارداپ شەككەن ادامدى جەدەل جاردەم كەلگەنشە امان الىپ قالۋعا بولاتىندىعىن جۋرناليستەر قاۋىمى ترەنينگ بارىسىندا ۇيرەنىپ, كورىپ ءبىلدى. ايتپەگەن كۇنى تەك مەديتسينا قىزمەتكەرلەرىن عانا توسىپ, ءولىم اۋزىنداعى ادامدى قۇتقارا المايتىن دا جاعدايلار كەزىگەدى ەكەن.

-ءبىز بۇل اكتسيانى جۋرناليستەردەن باستاپ وتىرمىز,-دەدى ۋنيۆەرسيتەتتىڭ وقۋ-جاتتىعۋ ورتالىعىنىڭ ديرەكتورى دينارا مۇقانوۆا,-قازاقستاندا مەديتسينالىق كومەك جەتپەي جاتىپ, اسىرەسە جول اپاتى كەزىندە ادامدار قايتىس بولىپ كەتىپ جاتاتىن وقيعالار بار. بۇل قازىردە 42 پايىزدىق كورسەتكىشتى كورسەتىپ تۇر. سوندىقتان دا پارامەديك بولۋدى ۇيرەنىپ العان ءجون. پارامەديك دەگەنىمىز بۇل مەديتسينالىق ءبىلىمى بولماسا دا, دارىگەر كەلگەنگە دەيىن ءبىر جاعداي جاساپ, قينالىپ جاتان ادامنىڭ ءومىرىن ۇزارتۋعا ىقپال ەتۋ. ەگەر ءبىز پارامەديكتەردىڭ قاتارىن كوبەيتسەك, ادام ءومىرىن ساقتاپ قالا الامىز. ماسەلەن, گوللانديادا ادامعا العاشقى كومەك بەرۋدى بالا كەزدەن, ءتىپتى بالاباقشادان ۇيرەتەدى. جۋرناليستەردەن پارامەديك دايارلاۋ ارقىلى ءبىز وسى سالانى حالىققا كەڭىنەن تاراتپاقپى. اسىرەسە ادام ومىرلەرىن ساقتاپ قالعىمىز كەلەدى.  

راۋشان نۇعمانبەكوۆا