بيىل قوستاناي قالاسىندا كوزگە سۇيەلدەي بولىپ تيەتىن كورىنىس پايدا بولدى. قوستاناي قالالىق تۇرعىن ءۇي-كوممۋنالدىق شارۋاشىلىعى قالاداعى بەلگىسىز سولداتتىڭ, جەڭىس ساياباعىنا كوشىرىلگەن لەنيننىڭ ەسكەرتكىشىن جانە قالا ورتالىعىنداعى تىڭ يگەرۋشىلەرگە قويىلعان ەسكەرتكىش-كەشەنىن قارا بوياۋمەن بوياپ قويدى.
ادەتتە ەسكەتكىشتەردىڭ قولا تۇسىنە كوزى ۇيرەنگەن جۇرتتىڭ قاپ-قارا ءمۇسىن زارەسىن الاتىنداي كەيىپكە ەنگەن. بۇل تۋرالى وڭىرلىك كوممۋنيكاتسيا قىزمەتى ورتالىعىندا جۋرناليستەرگە بەرگەن سۇحباتىندا وبلىستىق مادەنيەت باسقارماسىنىڭ باسشىسى ەرلان قالماقوۆ تا قالالىق تۇرعىن ءۇي كوممۋنالدىق قىزمەتىنىڭ بۇل ىسىن تۇسىنبەيتىنىن ايتتى. مەكەمە ەسكەرتكىشتەردى بوياۋ جونىندە مادەنيەت باسقارماسىنا ەشقانداي حابارلاسپاعان. بۇرىن ەسكەرتكىشتەردى قورعاۋ ينسپەكتسياسى بولاتىن, ەسكەرتكىشتەر مەن تاريحي نىسانداردى جوندەۋ, سىرلاۋ, بوياۋ, كوركەيتۋ جۇمىستارىنىڭ بارلىعى ونىڭ ەرەجەسىنە سايكەس مەملەكەتتىك سۇرانىس ارقىلى جۇرگىزىلەتىن. بۇل جونىندە وبلىستىق مادەنيەت باسقارماسىن حاباردار ەتەتىن.
«مۇمكىن مەكەمە قانداي دا ءبىر ساراپشىنىڭ باعاسىنا سۇيەنگەن بولۋى كەرەك, ونداي بولادى. ادەتتە, ەسكەرتكىشتەر وزىنە قارايتىن مەكەمە, ۇيىم ساراپشىلاردان ولاردى قانداي بوياۋمەن بوياۋ, قانداي ماتەريالدار پايدالانۋ كەرەكتىگى جونىندە نۇسقاۋ الا الادى. الايدا زاڭنامادا بۇل جونىندە ناقتى ەشنارسە جازىلماعان», دەيدى ەرلان بولات ۇلى.
وبلىستىق مادەنيەت باسقارماسى قالا اكىمى بازىل جاقىپوۆقا ەسكەرتكىشتەردىڭ بوياعاننان كەيىنگى كەيپى جونىندە ءوزىنىڭ قارسىلىعىن بىلدىرگەن اكت جىبەرگەن.
«قازىر بۇل ىسكە زاڭدى تۇردە ارالاساتىن ەسكەرتكىشتەردى قورعاۋ ينسپەكتسياسى, ياعني مەملەكەتتىك ورگان جوق. ال بويالعان ەسكەرتكىشتەردى قايتادان وزگەرتۋ جونىندە دە ەشتەڭە ايتا المايمىن. زاڭدا ارحيتەكتۋرالىق نىسانداردى بوياما دەگەن ءسوز تاعى جوق. بۇل تالعام مەن ادەپتىڭ ءىسى بولسا كەرەك» دەپ ءتۇيدى ەرلان قالماقوۆ.
ءنازيرا جارىمبەت, «ەگەمەن قازاقستان»