ءار نارسەنىڭ ءوز ۋاقىتىمەن بولعانى جاقسى عوي. قىستان قىسىلىپ شىققان جۇرت جازدا جازىلىپ, جادىراپ, ارقاسىن كەڭگە سالعىسى كەلەدى-اق. الايدا شىعىستا مامىر ايى تۇگەسىلۋگە تاقاسا دا, جەر كوكتەپ, اعاشتار بۇرشىك جارسا دا سۋىق ىزعار قايتپاي تۇر.
14 مامىر كۇنى تۇندە كاتونقاراعاي, زىريان اۋداندارى مەن ريددەر قالاسىندا قىلاۋلاپ قار جاۋىپتى. كەنشىلەر شاھارىندا وسى كۇنى تاڭەرتەڭ تەرمومەتر مينۋس 1-ءدى كورسەتىپتى. ايتپاقشى, وسىدان 10 كۇن بۇرىن شاماسىندا ريددەردە قار قىلاۋلاپ ەمەس, توپەلەپ جاۋىپ, جازدى اڭساپ جۇرگەن جۇرتتى اڭ-تاڭ قىلعان-دى.
وبلىس ورتالىعى – وسكەمەندە دە كۇننىڭ قاباعى قاتۋلى. قار جاۋماسا دا, قار جاۋاتىنداي ءبىر سۋىق ىزعار بار. «بيىل جاز شىعا ما, شىقپاي ما؟» دەپ مازاسى قاشقان جۇرتقا اقساقالدار جاعى «بيىل جاز بولمايدى. ويتكەنى, قىس جىلى بولدى» دەپ ءوز بولجامدارىن ايتىپ جاتىر.
ازامات قاسىم, «ەگەمەن قازاقستان»
شىعىس قازاقستان وبلىسى