14 پەن 29 جاس ارالىعىنداعى ءتىل ۇيرەنۋگە نيەتتىلەردىڭ بارىنە اعىلشىن ءتىلى تەگىن وقىتىلادى.
«تىلدەردى دامىتۋ مەن قولدانۋدىڭ 2011-2020 جىلدارعا ارنالعان» مەملەكەتتىك باعدارلاماسىن جۇزەگە اسىرۋ اياسىندا اتىراۋ وبلىستىق جاستار ساياساتى ماسەلەلەرى جونىندەگى باسقارما وسىنداي يگى ءىس ۇيىمداستىرىپ وتىر. بىلىكتى ماماندار ءدارىس بەرەتىن وقۋ اپتاسىنا ءۇش رەت جاستار رەسۋرستىق ورتالىعىندا وتەدى. ورتالىقتىڭ باسشىسى سەرىك قادىروۆتىڭ ايتۋىنشا, باستاماعا قىزىعۋشىلىق تانىتقاندار قاتارى كوپ. العاشقى ساباق 11 ساۋىردە باستالدى, كۋرس جىلدىڭ اياعىنا دەيىن جۇرگىزىلەدى.
وتكەن جىلى وبلىستىق جاستار ساياساتى ماسەلەلەرى جونىندەگى باسقارمانىڭ ۇيىتقى بولۋىمەن الەۋمەتتىك جاعىنان از قامتىلعان 100 ادام اعىلشىن ءتىلىنىڭ تەگىن كۋرسىنا قاتىسقان ەدى. بيىل دا بۇل ءۇردىس جالعاسىن تاپتى. سونداي-اق اتىراۋ قالاسىنىڭ 300 تۇرعىنىنىڭ جۇمىسقا ورنالاسۋىنا كومەك كورسەتىلدى. كومپيۋتەرلىك ساۋاتتىلىق دەڭگەيىن كوتەرىپ, بىرنەشە ماماندىق بويىنشا وقۋ كۋرستارىنان وتكەن جاستار قازىر تۇراقتى قىزمەتتە ءجۇر.
باقىتگۇل باباش, «ەگەمەن قازاقستان»
اتىراۋ