«ادام بالاسى كەمشىلىكپەن جاراتىلعان» دەپ قاسيەتتى كىتاپ قۇراندا ايتىلعانداي, پەندەنىڭ ءسوزى مەن ىسىنەن قاتەلىكتەر كەتىپ جاتادى. ۇلكەن عۇلاما يمام عازالي بابامىز ايتقانداي, پەندە قاتەلەسپەي تۇرمايدى, جاقسى ادام دەگەنىمىز – قاتەلىگىن تۇزەۋشى, سودان ساباق العان جان.
بىردە مىناداي وقيعا بولىپتى. كورشىسىنىڭ باياندى تىرلىگىنە قىزعانعان بەيباق ونى «ۇرلىق جاسايدى, الاياقتىقپەن پايدا تابادى» دەپ جالعان وسەك تاراتادى. بۇل ءسوز ۋاقىت وتكەن سايىن ءىسىنىپ-كۇبىنىپ قازيدىڭ قۇلاعىنا جەتەدى. قازي-سوت شابارماندارىن جىبەرىپ «ۇرلىقشى» اتاعان ازاماتتى اباقتىعا جاپتىرىپ, تەرگەپ-تەكسەرەدى.
«اققا – قۇداي جاق» دەگەندەي جالالى جىگىتتىڭ ەشقانداي جازىقتى ەمەسى دالەلدەنىپ, قازي-سوت ءمان-جايدى بىلمەككە وسەك-ءسوز تاراتقان ادامدى شاقىرتادى. ول كىسى قازيدىڭ قاھارىنان قورقىپ, وتىرىك-عايبات ايتقانىن مويىنداپ, كەشىرىم سۇرايدى.
قازي كۇناھارعا ءبىر پاراق اق قاعاز ۇستاتىپ, وسىعان انا جىگىت جايلى ايتقان وسەك-عايباتىڭنىڭ ءبىرىن قالدىرماي جاز دەپ بۇيىرادى. اناۋ جىپكە تىزگەندەي, تاپتىشتەپ جازىپ شىعادى.
– جازىپ بولدىڭ با؟
– بولدىم.
– وندا, – دەيدى قازي قولىڭداعى قاعازدى كۇلدەي ەتىپ ۇساقتاپ تۋرا دا, ۇيىڭە بارا جاتقان جولدا اتتىڭ ۇستىندە تۇرىپ ماڭ دالاعا ۇشىرىپ جىبەر. وسىنى ورىنداعان سوڭ ەرتەڭ قايتا كەل! ساعان قانداي جازا قولدانۋ كەرەكتىگى وسى وقيعادان كەيىن شەشىلەدى.
قازيدىڭ تاپسىرماسىن مۇلتىكسىز ورىنداعان عايباتشى ەرتەڭىندە الىپ-ۇشىپ جەتەدى. «كۇلدەي ەتىپ تۋرالعان قاعازدى جەلگە ۇشىرىپ جىبەردىم تاقسىر!». ونىڭ دۇرىس بولعان ەكەن, – دەگەن قازي: «كەشەگى ۇشىرعان قاعازدىڭ قيقىمدارىن تۇگەل تاۋىپ ءبارىن جيناپ اكەل دە, ءبىر-بىرىنە قوسىپ جازبانى قايتالاپ وقىپ شىق!» دەپ بۇيىرادى. «ولاي جاساي الماساڭ جازاعا تارتىلاسىڭ!».
كۇناھار قاتتى ساسادى. «تاقسىرەكە, جەلگە ۇشقان قاعازدىڭ قيقىمىن قالاي جينايمىن؟». قازي ايتادى: – سەن بەيباق, وسەك ايتپاي تۇرىپ ويلانۋىڭ كەرەك ەدى, تاراتقان ءسوزىڭ قاعازدىڭ قيقىمدارى سياقتى كۇللى الەمگە شاشىلىپ كەتتى, مەن كەشىرگەنمەن ءبارىبىر جايىلعان وسەكتى قايتا جيناي المايتىنىڭدى ۇقتىڭ با؟
«اۋىزدان شىققان ءسوز – اتىلعان وق» دەگەن وسى. ۇڭعىدان ۇشقان وقتى قايتارا المايتىنىمىز سياقتى, اۋىزدان شىققان ءسوز دە قايتا كىرمەيدى. سوزگە اباي بولايىق اعايىن!
بەكەن قايرات ۇلى, «ەگەمەن قازاقستان»