ەكى مىڭ جىلدىق تاريحى بار كونە تاراز شاھارىندا سوڭعى ۋاقىتتاردا ىلكىمدى ىستەر قولعا الىنىپ, وڭ ناتيجەسىن بەرە باستادى. جامبىلدىق جۇرتشىلىق اۋليەاتا جەرىندەگى الەۋەتتى باستامالارعا كۋا بولىپ, وبلىس ورتالىعىنداعى قايتادان قالپىنا كەلتىرىلگەن بىرەگەي نىسانداردى تاماشالاۋدا.
ناقتى ايتساق, جامبىل وبلىسىنىڭ اكىمى اسقار مىرزاحمەتوۆتىڭ باستاماسىمەن تاراز قالاسىنداعى باۋىرجان مومىش ۇلى اتىنداعى «جەڭىس» ساياباعىن قايتا جاڭعىرتۋ جۇمىستارى جۇزەگە اسىرىلعانىن جۇرتشىلىق جاقسى بىلەدى. شىندىعىندا وسى ۋاقىتقا دەيىن اتالعان ساياباق قاراۋسىز قالعانداي كۇي كەشىپ, مۇندا كوپشىلىك ءجيى بارا بەرمەيتىن بولعان ەدى. الايدا اينالاسى ءبىر ايدىڭ ىشىندە داڭقتى باتىر اتىنداعى ساياباق قايتادان جاڭعىرتۋدان ءوتىپ, كوپشىلىكتىڭ كوزايىمىنا اينالدى.
ساياباق قۇرىلىسىنا باس-اياعى 300 جۇمىسشى مەن 50 تەحنيكا جۇمىلدىرىلدى. ءسات سايىن شاھارداعى قۇرىلىس قارقىن الىپ, ساياباق جاڭا كەلبەتكە ەندى. سونىمەن قاتار تۇرعىندار تىلەگىنە وراي «جەڭىس» ساياباعى ماڭىنداعى ءىلياس جانسۇگىروۆ كوشەسىنە تاعى ءبىر جولاق قوسىلىپ, كەڭەيتىلدى. مەموريالدى كەشەننىڭ كىرەبەرىسىنە ارنايى قاقپا ورناتىلدى. اتالعان كەشەننىڭ ەكى باس قاقپاسىنىڭ بيىكتىگى 8 مەتر, ەنى 13 مەترلىك ءمارمار, تراۆەرتين تاستارىنان قالاندى. وندا كۇزەت ساقشىلارىنىڭ ءمۇسىنى قويىلعان.
ساياباقتىڭ ورتاسىنان «ماڭگىلىك الاۋ» كەشەنى ورىن العان. سونىمەن قاتار وسى ۋاقىتقا دەيىن جامبىل وبلىستىق قازاق دراما تەاترىنىڭ ءبىر شەتىندە تۇرعان باۋىرجان مومىش ۇلىنىڭ ەسكەرتكىشى اتالعان ساياباققا كوشىرىلىپ, مۇندا كورەرمەندەر ءۇشىن ارنايى الاڭدار جاسالعان. ال «باتىرلار» اللەياسىندا جامبىل وبلىسىنان شىققان 39 كەڭەس وداعىنىڭ باتىرى مەن 9 «داڭق» وردەنىنىڭ بارلىق دارەجەلى يەگەرلەرىنىڭ ەسىمدەرى جازىلعان ۇلكەيتىلگەن جۇلدىزشالار ورناتىلىپ, «داڭق» اللەياسىندا جامبىل وبلىسىنان ەكىنشى دۇنيەجۇزىلىك سوعىسقا قاتىسقان 105351 جاۋىنگەردىڭ ەسىمى التى قاتار ءمارمار تاسقا قاشالىپ جازىلدى.
ساياباقتى جاڭعىرتۋ جۇمىستارىنىڭ كەلەسى ساتىسىندا «داڭق» زالىنىڭ قۇرىلىسى جۇرگىزىلەدى. مۇندا سوعىس جانە تىل ەڭبەككەرلەرىنە ارنالعان مۋزەي سالىناتىن بولادى. اللەيانىڭ ورتاسىندا سوناۋ قيىن-قىستاۋ جىلدارى تىلدا ەڭبەك ەتكەندەر ءۇشىن مونۋمەنت, «تىرنالار» مەموريالدارى, ءىس-شارالار وتكىزىلەتىن ارنايى ساحنا ورناتىلادى. سونىمەن قاتار مۇندا اۋعان سوعىسى, چەرنوبىل اپاتىنا قاتىسۋشىلار مەن سەمەي پوليگونىندا جاۋىنگەرلىك بورىشىن وتەگەندەردىڭ مونۋمەنتتەرى قايتادان جاڭارتىلعان تۇردە ساياباقتىڭ كۇنشىعىس بەتىنە جايعاستىرىلادى.
ساياباقتىڭ اۋماعىنداعى 15 مىڭ شارشى مەترگە اباتتاندىرۋ, كوگالداندىرۋ, كوگەرىشتەندىرۋ جۇمىستارى جۇرگىزىلدى. مۇندا سەگىز ءتۇرلى اعاشتار وتىرعىزىلىپ, ونىڭ اينالاسى گۇلزارلارمەن كومكەرىلدى. ءبىر ايتا كەتەرلىگى, اتالعان ساياباقتاعى اعاشتار مەن گۇلزارلاردى باپتاۋ ءۇشىن مۇندا سۋ جەلىلەرى تارتىلعان. ەندى الداعى ۋاقىتتا قازىبەك بي كوشەسى مەن دىنمۇحامەد قوناەۆ كوشەسى ارالىعىنداعى ۇشبۇلاق كانالىنىڭ بويىندا دەمالۋشىلار ءۇشىن جاعاجاي جاسالىپ, بۇل جەر ۆەلوجولدارمەن جابدىقتالادى. سول ماڭداعى كوپىر قايتا جوندەۋدەن ءوتىپ, پروتون قويىلادى.
بۇگىنگى تاڭدا باۋىرجان مومىش ۇلى اتىنداعى «جەڭىس» ساياباعى جامبىلدىق جۇرتشىلىقتىڭ ءوزارا سىرلاسىپ, تىنىعىپ قايتاتىن ورتالىعىنا اينالدى. ءارى بابالار ەرلىگىن ۇرپاققا ناسيحاتتاۋدا دا اتالعان ساياباقتىڭ ءرولى ەرەكشە. مۇنداعى «ەرلىك» مەموريالدىق كەشەنىندەگى داڭقتى قولباسشى باۋكەڭنىڭ ەسكەرتكىشى, ونىڭ جانىنداعى سوعىستا ەرلىك كورسەتكەن باتىرلاردىڭ جەكە-جەكە جۇلدىزدارى, ودان كەيىن ءجۇز مىڭنان استام اسكەردىڭ جازىلعان ەسىمدەرى بۇگىنگى ۇرپاققا پاتريوتتىق رۋح سىيلايتىنى اقيقات.
حاميت ەسامان, «ەگەمەن قازاقستان»
جامبىل وبلىسى