قازاقستان پرەمەر-ليگاسىنىڭ ح تۋر ويىندارى ءوتتى. چەمپيوندىقتان دامەسى زور «قايرات» سىرت الاڭدا جەڭىلىپ قالىپ, «استاناعا» تاعى ءبىر مۇمكىندىك بەرىپ قويدى. ال «اقتوبە» – «اقجايىق» ويىنىندا 8 بىردەي گول سوعىلدى.
«قىزىلجار» مەن «قايساردىڭ» كەزدەسۋىمەن باستالعان تۋر تارتىستى ويىندارعا تولى بولدى. ءوز الاڭىندا تەگەۋرىندى كومانداعا اينالا قالاتىن «قىزىلجار» «قايسار» قاقپاسىنا ءا دەگەننەن لاپ قويدى. الايدا سوڭعى 2 ويىندى 3:0 ەسەبىمەن ۇتقان قىزىلوردالىقتار قورعانىسقا بەكەم بولدى. قوس كوماندا ءبىرىن-ءبىرى الا الماي تەڭ تارقاستى. ايتا كەتەيىك, ويىن سوڭىندا «قايسار» قورعاۋشىسى دجون كامارا قىزىل قاعاز الىپ الاڭنان قۋىلدى. ەندى ول كەلەسى ويىنعا قاتىسا المايدى.
«استانانى» ۇتىپ ءبىر جەلپىنگەن قاراعاندىنىڭ «شاحتەرى» قارا جولاققا ءتۇسىپ قالعانداي. سوڭعى 2 ويىندا دا جەڭىلدى. العاشقىسىن تۇسىنۋگە بولار, ال سوڭعى ويىندا ءوز الاڭىندا «ەرتىسكە» جەڭىلگەنى جانكۇيەرلەردىڭ شىمبايىنا باتتى. «كەنشىلەر» كەلەسى ويىندا 3 ۇپاي الماسا, باس باپكەر ۆلاديمير جۋراۆەلدىڭ دە قىزمەتتەن كەتۋى عاجاپ ەمەس. الايدا «شاحتەر» كەلەسى ويىندى الماتىدا «قايراتقا» قارسى وتكىزەدى. «ەرتىستىڭ» ازىرگە جولى بولىپ تۇر. تورەشى قوسقان 3 مينۋتتىڭ سوڭعىسىندا قاراعاندىلىق پيكالكين ءوز قاقپاسىنا گول سوعىپ الدى.
سوڭعى مينۋت سيندرومىن بۇل تۋردا «قايرات» تا باستان وتكەردى. ماتچ بويى دوپقا كوبىرەك يە بولىپ, قارسىلاستىڭ ادىمىن اشتىرماعان الماتىلىقتار 88-مينۋتتا گول جىبەرىپ الدى. «قايرات» قارسىلاستى قىسپاققا الىپ, جەڭىستى گولدى اڭساپ جۇرگەن شاقتا قارىمتا شابۋىلعا شىققان قوستانايلىقتار ءۇش پاسپەن الماتىلىقتاردىڭ ايىپ الاڭىنا جەتىپ ۇلگەردى. تاجىريبەلى تاڭات نوسەرباەۆ ادەمى پاستان سوڭ بوس قاقپاعا دوپتى توعىتا سالدى.
چەمپيونات ليدەرى «استانا» سىرت الاڭدا «اتىراۋدى» ۇتتى. ءبىرىنشى تايمدا گول مۇلدە سوعىلماسا, ەكىنشى تايمنىڭ بەل ورتاسىندا ەلوردالىقتار 2 دوپ سوقتى. پاتريك تۆۋماسي پەنالتيدەن ەسەپ اشىپ, اراعا 3 مينۋت سالىپ مارين توماسوۆ ونى ەسەلەي ءتۇستى.
العاشقى 4 ويىندا 4 قانا گول سوعىلىپ, تۋردىڭ قىزىعى بولمادى دەپ وتىرعانىمىزدا «اقتوبە» ويىنشىلارى ناعىز شوۋ جاسادى. كەزدەسۋدىڭ 27-مينۋتىندا باعدات قايىروۆ ەسەپ اشىپ, الاڭ يەلەرىن العا شىعاردى. ودان كەيىن ماركوس پيزەللي ەكىنشى گولدى سالىپ, «اقجايىقتى» ەسەڭگىرەتىپ تاستادى. ول از بولعانداي, ءبىرىنشى تايمنىڭ سوڭعى مينۋتىندا رەينالدو ءۇشىنشى گولدى سوعىپ, «اقجايىقتى» جەرگە قاراتتى. ەكىنشى تايمداعى رەينالدو مەن پيزاللي تاعى ءبىر-بىردەن كوزگە ءتۇسىپ ەدى «اقجايىقتىڭ» سالىسى سۋعا كەتتى. قوناقتار تەك 73-مينۋتتان باستاپ ەستەرىن جيدى. ورالدىقتار 80-مينۋتقا دەيىن ءۇش گول سوعىپ, ەسەپ ايىرماسىن قىسقارتتى. «اقتوبەنىڭ» جەڭىسىنەن كەيىن تۋرنيرلىك كەستەدەگى سوڭعى ورىنعا «اتىراۋ» ءتۇسىپ قالدى.
ەرمۇحامەد ماۋلەن, «ەگەمەن قازاقستان»