«رۋحاني جاڭعىرۋ» باعدارلاماسى بويىنشا اقمولا وبلىسىندا ءبىر جىل ىشىندە 117 جوبا ىسكە اسىرىلدى. جوبالاردىڭ جالپى قۇنى 10,2 ملرد تەڭگەنى قۇرادى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا اقمولا وبلىسىنىڭ اكىمى مالىك مىرزالين مالىمدەدى.
«رۋحاني جاڭعىرۋ» باعدارلاماسىنىڭ اقمولا وبلىسىندا جۇزەگە اسىرىلۋىنىڭ ءبىرىنشى جىلعى قورىتىندىسىن تانىستىرعان ءوڭىر باسشىسى وبلىستاعى رۋحاني قۇندىلىقتاردى ناسيحاتتاۋ مەن ساقتاپ قالۋ ماقساتىندا ۇلكەن جۇمىستار اتقارىلعانىن اتاپ ءوتتى. مىسالى, «رۋحاني قازىنا» كىشى باعدارلاماسى شەڭبەرىندە رەسپۋبليكالىق جوبالار رەەسترىنە 97 الەۋمەتتىك-مادەني جانە ينفراقۇرىلىمدىق جوبالار ەنگەن. 2017 جىلى 298 ملن تەڭگەگە 42 جوبا جۇزەگە اسقان. ال بيىل 56 جوبا باستالىپتى.
«وسى باعىتتاعى باستى ناتيجەلەردىڭ ءبىرى اقمولا وبلىسىنداعى 10 نىساننىڭ «100 كيەلى جەر» رەسپۋبليكالىق تىزىمىنە ەنگىزىلگەنى بولىپ تابىلادى. اتاپ ايتار بولساق, ولاردىڭ قاتارىندا قۇماي ارحەولوگيالىق-ەتنوگرافيالىق كەشەنى, ابىلاي حان الاڭى, كەنەسارى ۇڭگىرى, باتىعاي كەسەنەسى, وقجەتپەس تاۋى, قابانباي باتىر مازار-كەسەنەسى, «بەسپاقىر» جانە باۋبەك باتىر كەسەنەلەرى بار. بۇگىندە بۇل نىساندار جالپىۇلتتىق يگىلىك بولىپ تابىلادى», دەدى م.مىرزالين.
اكىم اتاپ وتكەندەي, وبلىستا سونداي-اق QR كودتار – زاماناۋي تەحنولوگيالار كومەگىمەن كيەلى نىساندار تۋرالى اقپاراتتى تسيفرلاندىرۋ بويىنشا «ەسكەرتكىشتەر سىر شەرتەدى» اتتى جوبا ىسكە اسىرىلۋدا. ماسەلەن, بىرقاتار اۋداندارداعى مادەني نىسانداردا جەرلەس دەمەۋشىلەردىڭ قولداۋىمەن جوندەۋ جۇمىستارى جۇرگىزىلىپ, ماتەريالدىق-تەحنيكالىق بازاسىن جاڭارتۋ جونىندەگى ماسەلەلەر شەشىلگەن. جالپى, ءبىر جىل ىشىندە مەتسەناتتار تاراپىنان 150,8 ملن تەڭگە كولەمىندە قولداۋ كورسەتىلگەن.
وبلىس اۋماعىندا بوتاي مادەنيەتىن دامىتۋ جانە ناسيحاتتاۋ ماقساتىندا بۋراباي اۋدانىندا «ۆيزيت تسەنتر «بوتاي» ارحەولوگيالىق-ەتنوگرافيالىق كەشەنىنىڭ اشىق اسپان استىنداعى مۇراجايىن قۇرۋ جوسپارلانىپ وتىر.
ءوڭىر باسشىسى سونىمەن قاتار «جاڭا گۋمانيتارلىق ءبىلىم «قازاق تىلىندەگى 100 جاڭا وقۋلىق» ارنايى جوباسىنىڭ ەرەكشە ءرولىن اتاپ ءوتتى. «جاڭا گۋمانيتارلىق ءبىلىم» پلاتفورماسى نەگىزىندە 20 حالىقارالىق عىلىمي-پراكتيكالىق كونفەرەنتسيا وتكىزىلىپ, 50 ماقالا جاريالاندى, حالىقارالىق كونفەرەنتسيالاردىڭ ناتيجەسىندە 2 جيناق, 3 مونوگرافيا جارىققا شىقتى», دەدى ءوڭىر اكىمى. م.ءمىرزاليننىڭ مالىمدەۋىنشە, وبلىستا «جەر ءجانناتى» ەنتسيكلوپەدياسى, كەڭەس وداعىنىڭ باتىرى مالىك عابدۋلليننىڭ ءومىرى مەن ەڭبەگى تۋرالى ءبىر تومدىق البوم باسىلىپ شىققان. الداعى ۋاقىتتا مالىك عابدۋلليننىڭ ەڭبەكتەرىن 11 تومدىق كىتاپ ەتىپ جارىققا شىعارۋ كوزدەلگەن. سونىمەن قاتار اكىم قازاق تاريحىندا وتكەن بەلگىلى تۇلعالاردىڭ ەسىمدەرى جاڭعىرتىلىپ جاتقانىن ايتتى.
«اقمولا وبلىسى سال-سەرىلەر ەلى بولىپ ەسەپتەلەدى. ءبىزدىڭ وبلىس ءبىرجان سال, اقان سەرى, بالۋان شولاق, ۇكىلى ىبىراي جانە باسقا دا تۇلعالاردىڭ ەلى. ولاردىڭ شىعارمالارى حالىقتىڭ دۇنيەتانىمىن بايىتىپ, ۇلتتىق قۇندىلىقتار دەڭگەيىنە اينالدى. قازىر وبلىستا ايماقتىڭ ايگىلى تۇلعالارىن ودان ءارى ناسيحاتتاۋ ءۇشىن كوپتەگەن جۇمىستار جۇرگىزىلۋدە. 2017 جىل اقمولالىقتار ءۇشىن ايتۋلى كەزەڭ بولدى. پرەزيدەنت جارلىعىمەن ءبىزدىڭ وبلىستىڭ ەڭبەكشىلدەر اۋدانىنا ءبىرجان سال اتامىزدىڭ ەسىمى, وبلىستىق فيلارمونياعا ۇكىلى ىبىراي, كوكشەتاۋ قالاسىنداعى ۇلتتىق سپورت تۇرلەرى بويىنشا بالالار مەن جاسوسپىرىمدەر سپورت مەكتەبىنە بالۋان شولاق اتالارىمىزدىڭ ەسىمدەرى بەرىلدى. بۇل شارالار جاس ۇرپاقتى تاربيەلەۋ جانە قوعامداعى رۋحاني بىرلىكتى ودان ءارى نىعايتۋعا مۇمكىندىك بەرەدى دەپ سەنەمىن», دەدى ايماق باسشىسى.
«اتامەكەن» كىشى باعدارلاماسى اياسىندا اقمولا وبلىسىندا ءبىلىم, دەنساۋلىق ساقتاۋ, مادەنيەت, سپورت جانە كوممۋنالدىق شارۋاشىلىق سالالارىندا جالپى قۇنى 5,2 ملرد تەڭگەنى قۇرايتىن 59 الەۋمەتتىك جوبا ىسكە اسىپ, 14 جاڭا الەۋمەتتىك نىسان سالىنعان.
«قورعالجىن اۋدانىندا ەلىمىزدەگى 80 پايىزدان استام قۇس تۇرلەرى مەكەندەيدى. ءدال وسى جەردە رەسپۋبليكاداعى العاشقى ايماقتىق ورنيتولوگيالىق ورتالىق اشىلدى. بۇل جوبانى كاسىپكەر قۇرالاي تۇسپەكوۆا 53,5 ملن تەڭگەگە تۇگەلدەي قارجىلاندىرعان جانە باستاماشىلىق ەتكەن. ماۋسىم ايىنان باستاپ العاشقى مەكتەپ ەكسپەديتسيالارى باستالادى. سونىمەن قاتار وسى جىلى ورتالىق بازاسىندا جالپى قۇنى 25 ملن تەڭگەگە زەرتحانانىڭ, ءتورت باقىلاۋ پۋنكتىنىڭ اشىلۋى, سپورتتىق ورنيتولوگيا فەستيۆالىن وتكىزۋ, كەشەندى عىلىمي-تانىمدىق ورنيتولوگيالىق ءىس-شارالاردى وتكىزۋ جوسپارلانىپ وتىر», دەدى اكىم. سونداي-اق ول قازاقستاندىقتاردى ءوز تۋعان ولكەسىن سۇيۋگە, شىققان تەگىن, مادەنيەتىن جانە حالقىنىڭ سالت-داستۇرلەرىن بىلۋگە شاقىراتىن «تۋعان جەر» ارنايى جوباسى اياسىندا قورعالجىن اۋدانىندا «بالتابەك» تۋريستىك كەشەنى اشىلعانىن, وندا تۋريستەرگە اتپەن سەرۋەندەۋگە جانە تازى مەن توبەت ءتارىزدى اسىل تۇقىمدى يتتەردىڭ سۇيەمەلدەۋىمەن اڭشىلىققا شىعۋ ۇسىنىلعانىن اتاپ ءوتتى. ال بيىل تاعى دا 30 الەۋمەتتىك جوبا باستاۋ الماق. مىسالى, تسەلينوگراد اۋدانىندا جەرگىلىكتى تۋمالاردىڭ باستاماسىمەن شامامەن 2 ملرد تەڭگە كولەمىندە 2 جاڭا مەكتەپ پەن 2 بالاباقشانىڭ قۇرىلىسى قاراستىرىلعان.
«جالپى, اقمولا وبلىسىندا «رۋحاني جاڭعىرۋ» باعدارلاماسىن جۇزەگە اسىرۋ بويىنشا جۇيەلى جۇمىستار قولعا الىندى. ءوڭىرىمىزدىڭ ءوز قۇندىلىقتارى, ەرەكشەلىكتەرى بار, ال ەڭ باستىسى, رۋحاني قۇندىلىقتاردى قالىپتاستىرۋ ارقىلى پاتريوتيزمگە ۇندەيتىن ادامدار بار», دەپ قورىتىندىلادى ءسوزىن وبلىس اكىمى.
دينارا بىتىك, «ەگەمەن قازاقستان»