اعىمداعى جىلدىڭ 28-29 ناۋرىز كۇندەرى استانا قالاسىندا وتكەن «جاس وتان» جق كەزەكتى IV سەزىندە «جاڭا الەمگە جول سالامىز» اتتى قورىتىندى قۇجات قابىلداندى.
ال 14 مامىر كۇنى استانا قالاسىندا «جاس وتاننىڭ» جاڭادان سايلانعان ورتالىق كەڭەسىنىڭ ءبىرىنشى وتىرىسىندا قورىتىندى قۇجاتتى ىسكە اسىرۋ بويىنشا «جاس وتان» جق 2021 جىلعا دەيىنگى جول كارتاسى قابىلداندى. سونداي-اق, جاستار قاناتىنىڭ جاڭا مۋلتيجوبالارى كەڭەس مۇشەلەرىنە, جاستار ۇيىمدارىنىڭ كوشباسشىلارىنا تانىستىرىلدى. قولعا الىنعان جوبالار جاستار اراسىندا سالاۋاتتى مىنەز-ق ۇلىق پەن ءومىر سالتى قاعيداتتارىن ەنگىزۋ, كاسىپكەرلىكتىڭ جان-جاقتى دامۋىنا ىقپال ەتۋ, قازاق جانە اعىلشىن تىلدەرىن دامىتۋعا ىقپال ەتەتىن ورتانى قالىپتاستىرۋ, تسيفرلى تەحنولوگيالاردى ەنگىزۋ جانە دامىتۋ ءۇشىن جاعداي جاساۋ سەكىلدى ماقساتتاردى كوزدەيدى.
وتىرىسقا «جاس وتان» جق ورتالىق كەڭەسىنىڭ 16 ايماقتان 32 مۇشەسى قاتىستى, ونىڭ ىشىندە 91 توبىنىڭ ءانشىسى دۋلات مۋحامەتقاليەۆ تە بار. قاتىسۋشىلار استانا جاستارى رەسۋرستىق ورتالىعىنىڭ قولداۋىمەن ەلوردانىڭ 20-جىلدىعىنا ارناپ اعاش وتىرعىزۋ ءداستۇرىن قولدادى.
وتىرىس بارىسىندا كەڭەسكە استانا قالاسىنان سايلانعان الىمقۇلوۆ بەكجان ۇيىمنىڭ 18-جىلدىعىنا ارنايى سىيلىق رەتىندە ازىرلەگەن Telegram Bot-تى جۇمىسىمەن تانىستىرىپ, ىسكە قوستى. ەندى ۇيىم تەلەگرام جۇيەسىندە جاستارعا بۇرىنعىدان دا جاقىنىراق جانە قولجەتىمدى بولماق.
بەكجان الىمقۇلوۆ, جاس كاسىپكەر, ورتالىق كەڭەس مۇشەسى:
«بۇگىن تەلەگرامدا جاس وتاننىڭ بوتىن ىسكە قوستىق. قىزىقتىرعان اقپاراتقا جىلدام قول جەتكىزۋگە بولادى. ول ۇيىم تۋرالى باستى اقپاراتتى سول مەزەتتە بەرەدى. تەلەگرامنىڭ ىزدەۋ بولىمىنە @jasotan_bot دەپ جازىپ, قىزىقتىرعان اقپاراتقا سۇرانىس تاستايسىز, ال بوت سول سەكۋندتا سىزگە جاۋاپ قايتارادى. جاس وتاندى تۋعان كۇنىمەن قۇتتىقتايمىن. ۇيىمنىڭ الاڭىندا بۇگىن ايتىلعان جاڭا جوبالاردى بىرگە ىسكە اسىراتىن بولامىز».
ەستەرىڭىزگە سالا كەتسەك, 2008 جىلى 14 مامىردا ەلباسىنىڭ قولداۋىمەن ۇيىم قوعامدىق بىرلەستىك رەتىندە رەسمي تىركەلدى. الايدا «جاس وتاننىڭ» تاريحى ءبىر توپ بەلسەندى جاستاردىڭ قوزعالىسى رەتىندە 2000 جىلدان باستاۋ الادى جانە قازىرگى جاستار ساياساتى مەن جاستار ۇيىمدارىنىڭ قۇرىلۋىنا سەبەپكەر بولدى. سونىمەن قاتار, قاراعاندى وبلىسىنان كەڭەس مۇشەسى سۋنديتاليەۆ نياز جاڭادان قۇرىلاتىن مۇگەدەكتەر ۇيىمى جايلى جاڭالىعىمەن ءبولىستى.
نياز سۋنديتاليەۆ, ورتالىق كەڭەس مۇشەسى:
«قاراعاندى جاستارى مەنى كەڭەس مۇشەسى بولۋعا لايىق دەپ سانادى. وتە قۋانىشتىمىن. مەنىڭ بەلسەندى ازاماتتىق ۇستانىمىم ءاردايىم مۇمكىندىگى شەكتەۋلى جاستاردىڭ ءومىرىن جاقسارتۋعا باعىتتالدى. وسىلايشا مۇگەدەكتەردىڭ قوعامدىق بىرلەستىگىن قۇرۋ تۋرالى ويعا كەلدىك. وسى اي باسىندا «Qamqor plus» ەرەكشە قاجەتتىلىگى بار جاندارعا ارنالعان بىرلەستىكتى رەسمي تىركەۋگە كىرىستىك. وسى باستاماعا قولداۋ بىلدىرگەن «جاس وتانعا» راحمەت ايتقىم كەلەدى».
بيىل ۇيىم تاريحىندا العاش رەت ورتالىق كەڭەس مۇشەلەرىنىڭ اشىق ونلاين سايلاۋى ءوتتى. سايلاۋعا قاتىسقان 363 ادامنىڭ اراسىنان 16 كوشباسشى ەڭ كوپ داۋىس جيناپ, ءوز ايماقتارىنىڭ ۇزدىگى اتاندى. «جاس وتان» ءوز تاريحىندا العاش رەت ۇيىمنىڭ ورتالىق كەڭەس مۇشەلەرىن تاڭداۋدى جاستاردىڭ وزىنە سەنىپ تاپسىردى.