الماتىدا حالىقارالىق ءداستۇرلى مەديتسينا جانە حالىق ەمشىلەرىنىڭ ءىىى سەزى ءوتتى. ءۇش كۇنگە سوزىلعان القالى باسقوسۋعا وتاندىق حالىق ەمشىلەرىمەن قاتار 17 مەملەكەتتەن – قىتاي, موڭعوليا, رەسەي, جاپونيا, ۋكراينا, تۇركيا, ت.ب. ەلدەردەن كەلگەن قوناقتار قاتىستى.
– مەملەكەت باسشىسى ن.نازارباەۆ قاشاندا ۇلتتىڭ دەنساۋلىعى ماسەلەسىنە وراسان كوڭىل ءبولەدى, – دەدى سەزدى اشقان دەنساۋلىق ساقتاۋ مينيسترلىگى جانىنداعى «قر حالىقتىق جانە رۋحاني ەمشىلەر» مەكەمەسىنىڭ ديرەكتورى, شىۇ شەڭبەرىندە ءداستۇرلى مەديتسينا اكادەمياسىن قۇرۋ ءجونىندەگى شىۇ-عا مۇشە مەملەكەتتەردىڭ رەسمي وكىلى شاكەن قاجى شىنتاەۆ. – سەزد كۇندەرى بىزدەر ءبىر-ءبىرىمىز ارقىلى حالىقتىق ەمنىڭ جاڭا مەكتەبىمەن تانىسىپ, تاجىريبە, ءادىس-تاسىلدەرىمىزبەن ءبولىستىك. ال مۇنىڭ بارلىعى ءبىزدىڭ وتانداستارىمىزدىڭ دەنساۋلىعى ءۇشىن قىزمەت جاسايتىن بولادى.
ءبىر ايتا كەتەرلىگى, بۇگىندە حالىقتىق ەم قاناتىن كەڭ جايا تۇسۋدە. وعان شاڭحاي ىنتىماقتاستىعى ۇيىمى شەڭبەرىندە ءداستۇرلى مەديتسينا اكادەمياسىن قۇرۋ جونىندە قاناتقاقتى جوبا ۇسىنىپ, سونىڭ نەگىزىندە ۇيىمعا مۇشە مەملەكەتتەر مەموراندۋمعا قول قويۋى دالەل بولسا كەرەك. ونىڭ شتاب-پاتەرى پەكين مەن ماسكەۋدە ورنالاسقان. باعدارلامانىڭ ماقساتى – كادر دايىنداپ, ولاردىڭ ءبىلىمىن جەتىلدىرۋ, ءداستۇرلى مەديتسينامەن حالىقتى ەمدەۋدى جوعارى عىلىمي تۇرعىدا نەگىزدەۋ. قازىر قازاقستاندا وسى اكادەميا قۇرىلىپ, ءوز جۇمىسىن باستاپ كەتتى. ەلىمىزدە وتكەن بۇل جيىن وسى ماسەلەنىڭ وڭ شەشىلۋىنە ىقپالىن تيگىزبەك.
فورۋمدا سويلەگەن شەشەندەر ءداستۇرلى حالىقتىق مەديتسينا مەن ەمشىلىكتى ۇيىمداستىرۋداعى جۇمىستاردى, پراكتيكالىق قىزمەتتەرىن ساراپتان وتكىزىپ, كەلەسى جىلى تۇركيادا وتەتىن حالىقارالىق سيمپوزيۋمدا قارالاتىن ماسەلەلەرگە قاتىستى ۇسىنىستارىن پىسىقتادى.
گۇلزەينەپ سادىرقىزى.