الماتىداعى قازاقستاننىڭ ءابىلحان قاستەەۆ اتىنداعى مەملەكەتتىك ونەر مۋزەيىندە بەلگىلى قوعام قايراتكەرى, ەڭبەگى سىڭگەن ونەر قايراتكەرى جانە قازاقستاننىڭ ديزاينەرلەر وداعىنىڭ پرەزيدەنتى تيمۋر سۇلەيمەنوۆپەن قوشتاسۋ ءراسىمى ءوتتى, - دەپ حابارلايدى الماتى اكىمدىگىنىڭ ءباسپاسوز قىزمەتى.
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ كوڭىل ايتۋ جەدەلحاتىن الماتى اكىمى باۋىرجان بايبەك وقىپ بەردى. مەملەكەت باسشىسى بەلگىلى قوعام قايراتكەرى تيمۋر سۇلەيمەنوۆتىڭ قايتىس بولعانى جونىندەگى حاباردى قاتتى قايعىرىپ قابىلداعان.
"تيمۋر بيماش ۇلى ءوز ماماندىعىنىڭ حاس شەبەرى ەدى. ول ارحيتەكتور جانە ديزاينەر رەتىندە كەمەل ءبىلىمى مەن مول تاجىريبەسىن تۋعان ەلىنىڭ يگىلىگىنە ارناپ ەڭبەك ەتتى. قازاقستاندا وسى ونەر تۇرلەرىنىڭ دامۋىنا لايىقتى ۇلەسىن قوسىپ, بىرقاتار ماڭىزدى جوبالاردىڭ ىسكە اسۋىندا ءوز قولتاڭباسىن قالدىردى. ەلىمىزدە العاش رەت ديزاينەرلەر وداعىن قۇرىپ, كوپ جىل بويى سونىڭ جۇمىسىنا جەتەكشىلىك جاسادى. كەزىندە رەسپۋبليكا جوعارعى كەڭەسىنىڭ دەپۋتاتى بولىپ سايلانىپ, زاڭ شىعارۋ قىزمەتىنىڭ دامۋىنا دا ۇلەسىن قوستى. اياۋلى ازاماتتىڭ ەڭبەگى مەن ديدارى حالقىمىزدىڭ جادىندا ءاردايىم ساقتالادى دەپ ويلايمىن", - دەلىنگەن جەدەلحاتتا.
بۇگىنگى كۇنى ونىڭ وزىندىك قولتاڭباسىن ەلىمىزدىڭ ءار وڭىرىنەن كورۋگە بولادى. ولاردىڭ اراسىندا استاناداعى ساياسي رەپرەسسيا قۇرباندارىنا ارنالعان مەموريالدى كەشەن, "اتامەكەن" ەتنو-مەموريالدى پاركى, اڭىراقاي شايقاسىنداعى تاريحي ەسكەرتكىشتەر, الماتى وبلىسىنداعى "چەركاسسك قورعانىنىڭ باتىرلارى" مەموريالدى كەشەنى بار. تيمۋر سۇلەيمەنوۆ ماسكەۋدەگى اباي ەسكەرتكىشى مەن الماتىداعى "تاۋەلسىزدىك تاڭى" مونۋمەنتىن جاساۋعا دا قاتىسقان ەدى.