«اباي الەمى» اتتى ستۋدەنت جاستاردىڭ ءداستۇرلى رەسپۋبليكالىق ونەر فەستيۆالىندە قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ونەر جانە مادەنيەت فاكۋلتەتىنىڭ 2-كۋرس ستۋدەنتتەرى ءمولدىر قازيەۆا مەن ارۋجان ورازالى ءبىرىنشى ورىنعا يە بولدى, دەپ حابارلايدى وقۋ ورنىنىڭ ءباسپاسوز ورتالىعى.
اباي اتىنداعى قازاق ۇلتتىق پەداگوگيكالىق ۋنيۆەرسيتەتى ۇيىمداستىرعان ونەر سايىسى «اباي ولەڭدەرى», «ابايدىڭ قارا سوزدەرى» جانە «اباي اندەرى» بايقاۋلارى بويىنشا جۇرگىزىلىپ, وعان ەلىمىزدىڭ 22 جوعارى وقۋ ورنىنان 106 ۇمىتكەر قاتىستى.
فەستيۆالدىڭ اشىلۋ راسىمىندە ۋنيۆەرسيتەت رەكتورى تاكير بالىقباەۆ ءبىلىم ورداسىندا ۇلى اقىننىڭ ادەبي مۇراسىن ناسيحاتتاۋ باعىتىندا اتقارىلىپ جاتقان جۇمىستار تۋرالى ايتىپ, قاتىسۋشىلارعا ساتتىلىك تىلەدى.
سايىسقا بەلگىلى ادەبيەتتانۋشى عالىمدار, مادەنيەت جانە ونەر قايراتكەرلەرى, كاسىبي ءانشى-سازگەرلەر قازىلىق ەتتى. اتاپ ايتقاندا, «اباي ولەڭدەرى» بايقاۋى بويىنشا فيلولوگيا عىلىمدارىنىڭ دوكتورى, پروفەسسور مەكەمتاس مىرزاحمەت ۇلى, «ابايدىڭ قارا سوزدەرى» بايقاۋى بويىنشا «حاكىم اباي» عىلىمي-زەرتتەۋ ورتالىعىنىڭ ديرەكتورى جابال شويىمبەت جانە «اباي اندەرى» بايقاۋى بويىنشا قازاقستاننىڭ ەڭبەك سىڭىرگەن قايراتكەرى, ءانشى-كومپوزيتور ارمان دۇيسەنوۆ قازىلار القاسىنا توراعالىق جاسادى.
قىزدار ۋنيۆەرسيتەتىنىڭ «مادەني-تىنىعۋ» ماماندىعىنىڭ 2-كۋرس ستۋدەنتتەرىنەن قۇرالعان «دارىن» دۋەتى «اباي اندەرى» بايقاۋى بويىنشا وزگەلەردەن ۇزدىك اتانىپ, ءبىرىنشى ورىنعا يە بولدى. ەكىنشى ورىن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ستۋدەنتى ولەسيا حومەنكوعا بۇيىرسا, جۇلدەلى ءۇشىنشى ورىندى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ستۋدەنتى ءتاجمينا دانيارقىزى مەن جاڭگىر حان اتىنداعى باتىس قازاقستان اگروتەحنيكالىق ۋنيۆەرسيتەتىنىڭ ستۋدەنتى اقمارال نۇرعازيەۆا ءوزارا ءبولىستى.
– سايىستىڭ العاشقى اينالىمىندا «ايتتىم سالەم قالامقاس» ءانىن ورىنداساق, ەكىنشى تۋردا لاتيف حاميديدىڭ «بۇلبۇل» ءانىن ايتىپ سىنعا تۇستىك. ناتيجەسىندە قازىلار القاسى تاراپىنان جوعارى باعا الىپ, ۇزدىك ناتيجەگە قول جەتكىزدىك, حاكىم ابايدىڭ ءومىرى مەن شىعارماشىلىعىن جاستار اراسىندا كەڭىنەن ناسيحاتتاۋ ماقساتىندا وسى سياقتى ونەر بايقاۋلارىنىڭ ماڭىزى زور دەپ بىلەمىز, – دەيدى قىزدار ۋنيۆەرسيتەتىنىڭ ستۋدەنتتەرى.
شارا سوڭىندا جەڭىمپازدار سىياقى جانە ديپلومدارمەن ماراپاتتالدى. ايتا كەتەيىك, ونەر فەستيۆالىنە ستۋدەنتتەردى ونەر جانە مادەنيەت فاكۋلتەتىنىڭ وقىتۋشىلارى الپىسباي كوپباەۆ پەن ۇلبوسىن بەلعوزيەۆا دايىندادى.