جاقىندا كوكشەتاۋ قالاسىنداعى «دوستار» مادەنيەت سارايىندا «اقان سەرىنىڭ ءان بەسىگى» اتتى ادەبي كەش بولىپ ءوتتى. نەگىزىنەن شارا اقان سەرى قورامسا ۇلىنىڭ شىعارماشىلىعىنا ارنالعان عىلىمي-كونفەرەنتسيا جانە ادەبي-مۋزىكالىق كەش رەتىندە ەكى كەزەڭنەن تۇردى.
شارانى وتكىزۋدەگى باستى ماقسات – حالقىمىزدىڭ اسپاپتىق, ۆوكالدىق مۋزىكاسىن ساقتاۋ جانە ناسيحاتتاۋ. سونداي-اق شىعارماشىلىق بايلانىس پەن ارىپتەستىكتى نىعايتۋ ارقىلى اقان سەرى تۇلعاسىنىڭ تاريحي جانە مادەني ماڭىزىن ارتتىرا ءتۇسۋ كوزدەلگەن.
جالپى, شىعارمالارى قازاق حالقىنىڭ ماڭگىلىك مۋزىكالىق قورىنا ەنگەن ۇلى سۋىرىپ سالما اقىننىڭ مۋزىكالىق مۇراسىن كەڭىنەن تانىتۋ ۋاقىت تالابى. حالىقتىڭ مۋزىكالىق قازىناسىندا وزىنە لايىقتى ورنىن العان اقان سەرىنىڭ «قۇلاگەر», «ماڭماڭگەر», «ماقپال», «بالقاديشا», «كوكجەندەت», «سىرىمبەت» جانە تاعى باسقا تۋىندىلارى ورىندالىپ, قاتىسۋشىلاردىڭ قۇلاق قۇرىشىن قاندىردى. بۇل رەتتە مۋزىكا مەن ونەر زەرتتەۋشىلەرى اقان سەرى شىعارماشىلىعىن زەرتتەۋدە ونىڭ جاڭا قىرلارىن اشىپ, مۋزىكالىق مۇرانى ناسيحاتتاۋدا ۇلكەن جەتىستىكتەرگە قول جەتكىزىپ كەلەدى. وسى تۇرعىدان كەلگەندە كەشتىڭ ۇيىمداستىرىلۋى قالا تۇرعىندارى مەن قوناقتارى ءۇشىن كەرەمەت ۇمىتىلماستاي اۋەزدى مۋزىكالىق تارتۋ بولدى.
اسقار تۇراپباي ۇلى, «ەگەمەن قازاقستان»
اقمولا وبلىسى