ەلباسى نۇرسۇلتان نازارباەۆ قازاقستان رەسپۋبليكاسى پروكۋراتۋرا ورگاندارىنىڭ قىزمەتكەرلەرى مەن ارداگەرلەرىن كاسىبي مەرەكەلەرى – پروكۋراتۋرا قىزمەتكەرلەرى كۇنىمەن جانە تاۋەلسىز قازاقستان پروكۋراتۋراسى ورگاندارىنىڭ قۇرىلۋىنا 20 جىل تولۋىمەن قۇتتىقتادى.
«بۇل مەرەكەلەرىڭىز بيىل قازاقستان رەسپۋبليكاسى تاۋەلسىزدىگىنىڭ 20 جىلدىعىمەن تۇسپا-تۇس كەلىپ وتىر. وسى جىلداردا ءسىزدەردىڭ ۆەدومستۆولارىڭىز ەلىمىزدەگى زاڭدىلىق پەن قۇقىقتىق ءتارتىپتى قامتاماسىز ەتۋدە مەملەكەتتىڭ بەرىك تە سەنىمدى تىرەگىنە اينالدى.
پروكۋراتۋرا قىزمەتكەرلەرى قوعام مەن مەملەكەتتىڭ مۇددەسىن ساقتاۋدى قورعاۋدا جانە ەلىمىزدىڭ قۇقىقتىق تۇراقتىلىعىن قامتاماسىز ەتۋدە ءوزىنىڭ جاۋاپتى مىندەتىن ابىرويمەن جۇزەگە اسىرۋدا. الداعى كەزدە دە سىزدەردىڭ قىزمەتتەرىڭىزدىڭ باستى باعىتتارى ازاماتتاردىڭ كونستيتۋتسيالىق قۇقىقتارىن قامتاماسىز ەتۋ, قازاقستان مەملەكەتتىلىگىن, ەلىمىزدىڭ ەكونوميكالىق قاۋىپسىزدىگىن نىعايتۋ, قىلمىسپەن جانە سىبايلاس جەمقورلىقپەن اياۋسىز كۇرەس جۇرگىزۋ, ەلىمىزدە قولايلى ىسكەرلىك احۋالدى قامتاماسىز ەتۋ بولىپ قالا بەرەدى. پروكۋراتۋرا ءاردايىم بىرىڭعاي قۇقىقتىق كەڭىستىك پەن قوعامداعى قۇقىقتىق مادەنيەتتىڭ نەگىزى بولۋى ءتيىس», دەلىنگەن قۇتتىقتاۋدا.
مەملەكەت باسشىسى ءارى قاراي جوعارىدا اتالعان مىندەتتەرگە بايلانىستى پروكۋراتۋرا قىزمەتكەرلەرىنىڭ وزدەرىنىڭ كاسىبي بىلىكتىلىگىن ۇدايى جەتىلدىرىپ وتىرۋىنىڭ, مىندەتتەرىن كىرشىكسىز, ادال اتقارۋىنىڭ قوعام ءۇشىن ماڭىزى وراسان زور ەكەنىن اتاپ كورسەتە كەلىپ, ولاردىڭ ءاردايىم وسى ءمىندەتتەردىڭ ۇدەسىنەن شىعاتىنىنا سەنەتىنىن بىلدىرگەن.
ەلباسى قۇتتىقتاۋىنىڭ سوڭىندا اتالعان سالا قىزمەتكەرلەرى مەن ارداگەرلەرىنە زور دەنساۋلىق پەن باقىت, اسا جاۋاپتى قىزمەتتە مول تابىستار تىلەيدى.