قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسىنا قاتىستى, دەپ حابارلادى akorda.kz.
ۇلتتىق اكادەميالىق كىتاپحانادا قازاقستان حالقى اسسامبلەياسىنىڭ XXVI سەسسياسى قارساڭىندا قازاقستان رەسپۋبليكاسىنىڭ مەملەكەتتىك حاتشىسى گ.ابدىقالىقوۆانىڭ قاتىسۋىمەن قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسى ءوتتى.
جيىنعا قحا توراعاسىنىڭ ورىنباسارى – حاتشىلىق مەڭگەرۋشىسى ل.پروكوپەنكو, پارلامەنت ءماجىلىسىنىڭ دەپۋتاتتارى, اسسامبلەيا مۇشەلەرى, قوعام قايراتكەرلەرى, عىلىمي جانە شىعارماشىلىق زيالى قاۋىم وكىلدەرى قاتىستى.
گۇلشارا ابدىقالىقوۆا مەملەكەت باسشىسىنىڭ: «قازىرگى زاماناۋي جاھاندىق جاعدايدا ۇلتتىق بىرلىك دەگەنىمىز – الەۋمەتتىك بىرلىك, ال قالىپتاسقان مەملەكەت دەگەنىمىز – الەۋمەتتىك مەملەكەت», – دەگەن سوزدەرىن اتاپ ءوتتى.
– «پرەزيدەنتتىڭ بەس الەۋمەتتىك باستاماسى» قوعامدى كەشەندى تۇردە الەۋمەتتىك جاڭعىرتۋدىڭ قوزعاۋشى كۇشىنە اينالۋعا ءتيىس. ولار ساياسي, ەكونوميكالىق جانە رۋحاني سالالارداعى اۋقىمدى رەفورمالار الگوريتمىن جالعاستىرا وتىرىپ, تۇيىندەيتىن بولادى. الەۋمەتتىك بىرلىكتى تۇعىر ەتكەن ۇلتتىق بىرەگەيلىكتى نىعايتۋ ماسەلەلەرى ءاردايىم قازاقستان حالقى اسسامبلەياسىنىڭ باستى نازارىندا بولۋعا ءتيىس, – دەدى مەملەكەتتىك حاتشى.
2017 جىلى قحا قوعامدىق سانانى جاڭعىرتۋ جوبالارى بويىنشا 20 رەسپۋبليكالىق جانە 395 وڭىرلىك ءىس-شارا ۇيىمداستىردى. 2 مىڭنان استام قايىرىمدىلىق ءىس-شارا وتكىزىلىپ, كوپ بالالى جانە تابىسى تومەن 60 مىڭنان استام وتباسىعا, سونىمەن قاتار 8 مىڭعا جۋىق ءتۇرلى ۇيىمدارعا كومەك كورسەتىلدى.
باسقوسۋدا پارلامەنت ماجىلىسىندەگى قحا-نىڭ دەپۋتاتتار توبىنىڭ, ماڭعىستاۋ وبلىسى قازاقستان حالقى اسسامبلەياسىنىڭ جانە رەسپۋبليكالىق ازەربايجاندار قاۋىمداستىعى جۇمىسىنىڭ قورىتىندىلارى قارالدى.
سونداي-اق, باسقا دا بىرقاتار ماسەلە, اتاپ ايتقاندا قحا-نىڭ XXVI سەسسياسى قاراۋىنا قازاقستان حالقى اسسامبلەياسى توراعاسىنىڭ ەتنومادەني بىرلەستىكتەر اتىنان ۇسىنىلاتىن جاڭا قوعامدىق ورىنباسارلارىنىڭ كانديداتۋراسىنا بايلانىستى ماسەلەلەر قاراستىرىلدى.
وتىرىس بارىسىندا قازاقستان رەسپۋبليكاسىنىڭ مەملەكەتتىك حاتشىسى گ.ابدىقالىقوۆا قۇرمەتتى اتاققا يە بولعان رەسەيلىك كورنەكتى ساياسي جانە قوعام قايراتكەرى رۋسلان اۋشەۆتى, گەرمانيانىڭ مەملەكەت جانە قوعام قايراتكەرى گەنريح تسەرتيكتى قۇتتىقتاپ, ولارعا قحا دوستىق ەلشىسىنىڭ پاتەنتىن تاپسىردى.