ەلباسىمىز نۇرسۇلتان نازارباەۆتى «حالىق قاھارمانى» اتاعىنا ۇسىنۋ جونىندەگى قالالىق ارداگەرلەر كەڭەسىنىڭ اتىنان جازىلعان اق نيەت حاتتان جاقسى حابار كۇتۋشىلەردىڭ ءبىرىمىن. مۇنداي تىلەكتەر تالاي بولعان. باسىمىزدان كوپ جاعدايلاردى كەشكەن, قوعامدىق, مەملەكەتتىك جۇيەنىڭ اۋىسقانىن كورگەن, ونداعى سان قيلى بۇرالاڭ بەلدەردەن وتكەن ءبىز ءۇشىن اتاق-داڭقتىڭ مازمۇنى دا وزگەرىڭكىرەپ بارا جاتقانداي بولعان. ادەتتە, مەملەكەت باسقارعان ادامنىڭ ءۇش-تورتتەن التىن جۇلدىز تاعۋى قالىپتى نارسە سياقتى ەدى.
ءبىزدىڭ قاسيەتتى تاۋەلسىزدىگىمىز بارلىق سالاداعى ەركىن جەلپىنىسپەن قاتار, ءومىر ماعىناسىنا بالانار ار-ۇجدان قۇندىلىعىن كادۋىلگى تازا دەڭگەيگە كوتەرۋىمەن قىمبات. بۇل جونىندە تۇڭعىش پرەزيدەنتىمىز, وتانىنىڭ اياۋلى پەرزەنتى نۇرسۇلتان ءابىش ۇلى نازارباەۆ ورەلى ونەگە تانىتا ءبىلدى. تاققا ادال وتىرۋدىڭ تالاي بەلەسىنەن ءوتتى, جاڭا تۇرپاتتى سايلاۋلار مەن جالپىحالىقتىق رەفەرەندۋمدارعا ءوزى باستاماشى بولدى. حالىقتىڭ ەركىنە ەرىك بەرىپ, الەم تالپىنىپ كەلە جاتقان دەموكراتيا ۇستىندارىن بەكىتتى. اتاققۇمارلاۋ حالىق اتاقتى اقتاي ءبىلۋدىڭ, ەڭبەك ءسىڭىرۋدىڭ, ونى جارقىراتىپ تاعىپ ءجۇرۋدىڭ جاۋاپكەرشىلىگىن وسىدان-اق اڭعارادى.
مەملەكەتتىك ماراپات – ادام ءومىرىندەگى ايرىقشا وقيعا. ونىڭ استارىندا ۇنەمى ماقتانىشقا بولەيتىن قۋانىش بار. ەلىمىز ارمانى تاۋەلسىزدىگىمىزدىڭ جيىرماسىنشى بەلەسىنە شىقتى. القىنباي, ابىرويمەن شىقتى. جەتىستىكتەرىمىز جۇرەكتى جىلىتىپ, بولاشاعىمىزعا الاڭدامايتىن بولدىق. مىنە, ادام بالاسى ءۇشىن, ءبىزدىڭ سۇيىكتى پرەزيدەنتىمىز ءۇشىن وسىدان ارتىق باقىت جوق دەپ ەسەپتەيمىن. حالىق تىلەگىن ۇكىمەت قولداپ, پارلامەنت زاڭداستىرعانىنا شەكسىز قۋانىشتىمىن. ارداقتى ەلباسىمىزعا, ۇلت كوشباسشىسىنا زور دەنساۋلىق, وتان يگىلىگى جولىنداعى ەرەن ەڭبەگىڭىز جەمىستى بولسىن دەگەن تىلەگىمدى جەتكىزگىم كەلەدى.
ايدوس ابۋتالىپ ۇلى, ەڭبەك ارداگەرى.
اقمولا وبلىسى.