حوككەيدەن قازاقستان ۇلتتىق قۇراماسى الەم چەمپيوناتىن جەڭىسپەن باستادى. بۋداپەشتتە ءوتىپ جاتقان جاھاندىق جارىستا وتانداستارىمىز العاشقى كەزدەسۋدە ايدىن يەلەرى – ۆەنگريانى ۇتتى.
بىردە الا, بىردە قۇلا ونەر كورسەتەتىن قازاقستان قۇراماسى وتكەن جىلعى ساتسىزدىكتەن كەيىن جوعارى توپقا قايتا ورالۋدى جوسپارلاپ وتىر. ول ءۇشىن بۋداپەشتتەگى تۋرنيردە الدىنا جان سالماي, جاقسى كورسەتكىش تىركەۋى قاجەت. قازاقستان قۇراماسىنىڭ ەكى جىل قاتارىنان ءبىرىنشى ليگادا ونەر كورسەتۋىنىڭ ءوزى ەل حوككەيىنىڭ ابىرويىنا سىن. سوندىقتان دا وتكەن جىلعىداي ءۇشىنشى ورىن الىپ قالساق, قازاق جانكۇيەرلەرى حوككەيشىلەرىمىزدى كەشىرمەيىن دەپ تۇر.
العاشقى كەزدەسۋدە ايدىن يەلەرىنە ەش مۇمكىندىك قالدىرماي, 3:0 ەسەبىمەن ايقىن جەڭىسكە جەتتىك. بۇل ويىندا ورەحوۆ پەن رىمارەۆ (2) سوققان شايبالار سەنىمدى جەڭىستى اكەلدى.
قازاقستان قۇراماسىنىڭ ويىنشىلار ءتىزىمى: كارلسسون-سەميونوۆ-داللمەن, ستارچەنكو-كۋچين-رىمارەۆ; لاكيزا-مەتالنيكوۆ, ميحايليس-گرەنتس-ەۆدوكيموۆ; پولوحوۆ-ورەحوۆ, اكولزين-ساگادەەۆ-ماركەلوۆ; ىبىرايبەكوۆ-پەتۋحوۆ, اسەتوۆ-گۋركوۆ-ۆولكوۆ.
ەندى قۇرامامىز بۇگىن استانا ۋاقىتىمەن كەشكى 22:00-دە ۇلىبريتانيا كومانداسىمەن كۇش سىناسادى. ولاردان بولەك توبىمىزدا يتاليا, سلوۆەنيا, پولشا قۇرامالارى بار. ءبىرىنشى ليگانىڭ «ا» توبىندا نەگىزگى باسەكەلەستەرىمىز يتاليا مەن سلوۆەنيا قۇرامالارى ەكەنىن ايتا كەتۋىمىز كەرەك. ولار وتكەن جىلى جوعارى ليگادا ونەر كورسەتىپ, سوڭعى 15 جانە 16-ورىنداردى يەمدەنىپ, تومەنگى توپقا ءتۇسىپ قالعان. دەمەك, وسى ەكى قۇراماعا قارسى وتەتىن ويىنداردا جەرلەستەرىمىز جەڭىسكە جەتۋى ءتيىس. ايتا كەتەيىك, ۇلىبريتانيامەن ويناپ بولعان سوڭ, 25-ءى كۇنى يتاليامەن, 27-ءسى كۇنى سلوۆەنيامەن جولىعامىز.
ەرمۇحامەد ماۋلەن, «ەگەمەن قازاقستان»