بۇگىن ۇكىمەت وتىرىسىندا مەملەكەتتىك-جەكەشەلىك ارىپتەستىكتى دامىتۋ ماسەلەسىن قاراۋ بارىسىندا قر پرەمەر-ءمينيسترى باقىتجان ساعىنتاەۆ بىرقاتار ناقتى تاپسىرمالار بەردى.
ۇلتتىق ەكونوميكا, ينۆەستيتسيالار جانە دامۋ, دەنساۋلىق ساقتاۋ مينيسترلەرى, سونداي-اق بىرقاتار وبلىستاردىڭ اكىمدەرى ءمجا دامىتۋ تۋرالى باياندادى.
باقىتجان ساعىنتاەۆ مەملەكەت باسشىسى ءمجا تەتىكتەرىن قولدانۋ سالاسىن كەڭەيتۋگە ۇلكەن ءمان بەرىپ وتىرعانىن اتاپ ءوتتى. ۇكىمەت تاراپىنان بارلىق قاجەتتى شەشىمدەر قابىلدانىپ جاتىر جانە ءمجا سالاسىنداعى زاڭنامانى وزگەرتۋ جونىندەگى ماسەلەلەر ۋاقىتىلى قارالۋدا.
«بۇگىنگى باستى ماسەلە – پرەزيدەنتتىڭ 5 الەۋمەتتىك باستاماسىن ىسكە اسىرۋ اياسىندا ءمجا نەگىزىندە ستۋدەنتتەرگە ارنالعان جاتاقحانالار سالۋ. وڭىرلەردىڭ اكىمدەرى اتالعان ماسەلەگە باسا نازار اۋدارۋى كەرەك», — دەدى باقىتجان ساعىنتاەۆ.
ءمجا جوبالارىنىڭ 75%-كە جۋىعى الەۋمەتتىك سالاعا تيەسىلى. بۇل — ءبىلىم بەرۋ جانە دەنساۋلىق ساقتاۋ نىساندارى. ولاردى جۇزەگە اسىرۋ مەملەكەتكە بيۋدجەتتى جەڭىلدەتۋدە ۇلكەن كومەك بەرەدى.
بۇدان وزگە, ب. ساعىنتاەۆ تۇرعىن ءۇي-كوممۋنالدىق شارۋاشىلىق سالاسىندا ءمجا تەتىكتەرىن ەنگىزۋ بويىنشا العاشقى قادامدار جاسالىپ جاتقانىن اتاپ ءوتتى. وسىعان بايلانىستى ينۆەستيتسيالار جانە دامۋ ءمينيسترى ج. قاسىمبەككە ءمجا شەڭبەرىندە جۇزەگە اسىرىلاتىن بارلىق جوبالاردى مۇقيات قاراۋ تاپسىرىلدى.
باقىلاۋ جۇمىستارى پرەمەر-ءمينيستردىڭ ورىنباسارى ە. دوساەۆقا جۇكتەلەدى.