جىل سايىن 1 ءساۋىر مەن 31 مامىر ارالىعىندا «بەكىرە» كەڭ اۋقىمدى بالىق قورعاۋ ناۋقانى وتەدى. باعالى سۋ مارجاندارىن قورعاۋعا باعىتتالعان شارانىڭ العاشقى ون كۇنىندە قۇقىق بۇزۋشىلاردان 768 كگ بالىق تاركىلەنىپ, ونىڭ 32 كگ بەكىرە تۇقىمداس تۇرلەرىنە 336 مىڭ 800 تەڭگە اكىمشىلىك ايىپپۇل سالىندى.
اتىراۋ وبلىستىق ورمان شارۋاشىلىعى جانە جانۋارلار دۇنيەسى ينسپەكتسياسىنىڭ وكىلى ولەگ تۋشكانوۆتىڭ ايتۋىنشا, قورشاعان ورتانى قورعاۋ زاڭناماسىن بۇزۋدىڭ 47 دەرەگى تىركەلگەن. 28 ادام اكىمشىلىك جاۋاپكەرشىلىككە تارتىلىپ, 19 بالىق اۋلاۋ جانە 5 بىرلىك ءجۇزۋ جانە كولىك قۇرالدارى تاركىلەندى.
اتالعان ينسپەكتسيا ناۋقان ۋاقىتىندا 17 بەكەت ۇيىمداستىرۋدا. 9 بەكەت جايىق وزەنىندە, بەسەۋى قۇرمانعازى اۋدانىندا, ۇشەۋى جىلجىمالى تۇردە قىزمەت ەتەدى. اكتسيا اتىراۋمەن قاتار ماڭعىستاۋ, باتىس قازاقستان وبلىستارىنىڭ دا اۋماعىن قامتيدى.
العاشقى ونكۇندىكتە مەملەكەتتىك تاپسىرىس بويىنشا اتىراۋداعى ەكى بەكىرە زاۋىتىنا سالماعى 100 كگ, ۇزىندىعى 2 مەتر بەكىرە, سالماعى 38 كگ بەكىرە جانە ەكى شوقىر بالىعى اۋلاندى. بيىل بەكىرە زاۋىتتارى قايتا جاڭعىرتىلادى دەگەن جوسپار بار. «جايىق كاسپي» جانە اتىراۋ بالىق ءوسىرۋ زاۋىتتارىنىڭ بارلىق جابدىقتارى جاڭارتىلادى. «سونىڭ ناتيجەسىندە ەكى نىساننىڭ جالپى قۋاتى جىلىنا 30 ملن بەكىرە شاباعىن وسىرۋگە جەتەتىن بولادى» دەپ حابارلادى اۋىل شارۋاشىلىعى مينيسترلىگى ورمان جانە جانۋارلار الەمى كوميتەتىنىڭ اتقارۋشى توراعاسى مارلەن اينابەكوۆ. ازىرگە زاۋىتتاردىڭ قۋاتى جىلىنا 7 ملن شاباق قانا بولىپ وتىر.
باقىتگۇل باباش, «ەگەمەن قازاقستان».
اتىراۋ