دۋشانبە قالاسىندا تاجىك-اۋعان شەكاراسىنداعى اسكەري بورىشىن ورىنداۋ كەزىندە 1995 جىلعى 7 ساۋىردە قازا تاپقان قازاقستاندىق جاۋىنگەرلەردىڭ ەسكەرتكىشىنە گۇل شوقتارىن قويۋ ءراسىمى ءوتتى, دەپ حابارلايدى سىرتقى ىستەر مينيسترلىگىنىڭ ءباسپاسوز قىزمەتى.
ءىس-شاراعا تاجىكستان رەسپۋبليكاسى قارۋلى كۇشتەرىنىڭ باس شتابىنىڭ باسشىلىعى, تاجىكستان ارداگەر-ينتەرناتسيوناليستەر وداعىنىڭ, ەلشىلىكتەردىڭ اسكەري اتتاشات وكىلدەرى, شەكارا قىزمەتىنىڭ ارداگەرلەرى, جەرگىلىكتى بۇقارالىق اقپارات وكىلدەرى, قازاقستاننىڭ تاجىكستانداعى ەلشىلىگىنىڭ قىزمەتكەرلەرى مەن ولاردىڭ وتباسى مۇشەلەرى قاتىستى.
ءوز سوزىندە قازاقستاننىڭ تاجىكستانداعى ەلشىسى نۇرلان سەيتىموۆ ءوز ومىرلەرىن قيا وتىرىپ, قازاقستاندىق جاۋىنگەرلەر اسكەري بورىشتارىن باتىرلىقپەن ورىنداپ, اسكەري انتتارىنا ادال بولىپ قالعاندارىن اتاپ ءوتتى. ەلشى قۇربانداردى ەستە ساقتاپ وتىرعان تاجىك حالقىنا العىسىن ءبىلدىرىپ, قازاقستان ءوز باتىرلارىن ءاردايىم جوعارى دارىپتەيدى دەپ مالىمدەدى.
تاجىك تاراپىنان سويلەۋشىلەر قازا تاپقان قازاقستاندىق جاۋىنگەرلەر وزدەرى قورعاعان تاجىك حالقىنىڭ جادىندا ماڭگى ساقتالاتىنىن اتاپ كورسەتتى, سونداي-اق تاجىكستانداعى قيىن جىلدارى قولداۋ بىلدىرگەنى ءۇشىن قازاق حالقىنا جانە ونىڭ باسشىلىعىنا زور ريزاشىلىقتارىن جەتكىزدى.