حورۆاتيا – قازاقستان قۇرامالارى اراسىنداعى تەننيس ماتچىنىڭ الدىندا كاپيتانداردىڭ قاتىسۋىمەن ءباسپاسوز ءماسليحاتى ءوتتى. الدىمەن ءسوز سويلەگەن قازاقستان قۇراماسىنىڭ كاپيتانى دياس دوسقاراەۆ تىلشىلەر ساۋالىنا جاۋاپ بەردى.
- قازاقستان قۇراماسى جاڭادان العان تەننيسشى الەكساندر بۋبليكتى نەگە وسى ويىنعا قاتىستىرمادى. ول جوعارى رەيتينگىسى بار, جاقسى تەننيسشى ەدى عوي؟
- ءيا, الەكساندر بۋبليك قازاقستان قۇراماسىنىڭ ويىندارىنا قاتىسا الادى. الايدا, ونىڭ قازىر تىزەسىندە جاراقات بار. سوندىقتان دا, وسى كەزدەسۋگە شاقىرتىلمادى. ايتپەسە, ءبىزدىڭ قۇرامانى اجەپتاۋىر كۇشەيتەتىن ەدى. دەگەنمەن دە, كەلەر ويىنداردا ءبىز وعان سەنىم ارتاتىن بولامىز.
- الداعى ويىننان نە كۇتەسىز؟
- حورۆاتيا جاقسى ءداستۇرى بار, مىقتى جەڭىستەرگە جەتكەن قۇراما. بۇل ويىن بىزگە ءسوزسىز اۋىر بولاتىنى انىق. حورۆاتيا تەننيسشىلەرى وتە جوعارعى دەڭگەيدە. «دەۆيس كۋبوگىن» جەڭگەن كومانداعا قارسى ويناۋ ەشكىمگە دە وڭاي سوقپاسى بەلگىلى.
- قازاقستان قۇراماسىنىڭ تەننيسشىلەرى ميحايل كۋكۋشكين مەن الەكساندر نەدوۆەسوۆ حورۆاتيا قۇراماسىنىڭ ويىنشىلارى چيليچ, چوريچتەردى ءارتۇرلى جارىستاردا جەڭگەن ەكەن. بۇل جاعداي ءسىزدىڭ شاكىرتتەرىڭىزگە قوسىمشا سەنىمدىلىك بەرە مە؟
- ءيا, راس ايتاسىز, وسىعان دەيىن ءبىزدىڭ تەننيسشىلەرىمىز حورۆاتيا تەننيسشىلەرىمەن كەزدەسكەن. ءتىپتى, ميحايل كۋكشكين مارين چيليچپەن ءۇش رەت كەزدەسىپ, ءۇش ويىندا دا تەگەۋرىندى قارسىلىق كورسەتكەن. ءبىر ماتچتى ءتىپتى جەڭگەن دە بولاتىن. سوندىقتان دا, بۇل فاكتورلاردىڭ بارلىعى ءبىزدىڭ جىگىتتەرگە كىشكەنە دە بولسا سەنىمدىلىك بەرەتىنى انىق.
ەرمۇحامەد ماۋلەن,
«ەگەمەن قازاقستان»
ۆاراجدين, حورۆاتيا.