«قىزىلجار-سق» فۋتبول كومانداسى توعىز جىلعى ۇزىلىستەن كەيىن بىلتىر ەل چەمپيوناتىنىڭ پرەمەر-ليگاسىنا ورالدى.
جاسىراتىنى جوق, كەمى التى اي بويى اق كورپەسىن ايقارا جامىلاتىن تەرىسكەيدە جاۋىندى-شاشىندى جاز ايلارىندا دا جەرگىلىكتى اياقدوپ شەبەرلەرىنىڭ تىڭعىلىقتى جاتتىعۋلارىنا كەدەرگىلەر از كەزدەسپەيتىن. بيىل قۇرىلعانىنا جارتى عاسىر تولىپ وتىرعان كلۋب جۋىردا ۇلكەن قۋانىشقا بولەندى. «جاستار» ستاديونىندا اۋماعى ەكى مىڭ شارشى مەتردى قۇرايتىن جابىق فۋتبول مانەجى پايدالانۋعا بەرىلدى.
نىساننىڭ اشىلۋ سالتاناتىنا ايماق باسشىسى قۇمار اقساقالوۆ قاتىسىپ, تۇرعىندار اراسىندا سالاماتتى ءومىر سالتىن نىعايتىپ, سپورتتىڭ بۇقارالىعىن ارتتىرۋدا سپورت ينفراقۇرىلىمدارىن كوپتەپ سالۋدىڭ ماڭىزدىلىعىن اتاپ ءوتتى.
فۋتبول ورتالىعىنىڭ جەتەكشىسى ۆياچەسلاۆ كولودانىڭ ايتۋىنا قاراعاندا, حالىقارالىق تالاپتارعا ساي تۇرعىزىلعان جابىق مانەجدە 200-گە جۋىق جاس فۋتبولشىلار دا, جەڭىل اتلەتشىلەر دە جاتتىعا الادى. ولاردى 14 باپكەر شىڭدايدى.
بىلتىر وبلىس ورتالىعىنداعى كوپقاباتتى ۇيلەردىڭ اۋلالارى مەن مەكتەپتەر جانىندا 9 شاعىن فۋتبول الاڭى بوي كوتەرگەن بولاتىن.
شالعايداعى سپورت كەشەنىءۋاليحانوۆ اۋدانىندا بەس مىڭعا جۋىق ادام سپورتپەن جۇيەلى تۇردە اينالىسادى. بۇل ماقسات ءۇشىن 146 سپورت نىسانى جۇمىس ىستەيدى. جۋىردا مۇندا دەنەشىنىقتىرۋ-ساۋىقتىرۋ كەشەنى ىسكە قوسىلدى. ونىڭ اشىلۋىنا قاتىسقان دەنەشىنىقتىرۋ جانە سپورت باسقارماسىنىڭ باسشىسى رۋسلان ەسەنالين ايماق باسشىسى اتىنان 400 مىڭ تەڭگەنىڭ سەرتيفيكاتى مەن بوكسقا ارنالعان رينگتى تارتۋ ەتتى. اۋدان اكىمى مەدەت وسپانوۆ 33 ۇيىرمەگە 400-دەن استام جەتكىنشەكتىڭ تارتىلعانىن, ەرەجەسىز جەكپە-جەك سەكتسياسى قۇرىلعانىن, ارنايى مامان باسپانامەن قامتاماسىز ەتىلگەنىن جەتكىزدى.
1,5 مىڭ شارشى مەتر اۋماقتى الىپ جاتقان كەشەننىڭ قۇرىلىسىنا وبلىستىق قازىنادان 183 ميلليون تەڭگە جۇمسالدى. ونىڭ ءبىرىنشى قاباتىندا فۋتبول, ۆولەيبول, كۇرەس, بوكسپەن اينالىسۋعا, ەكىنشى قاباتىندا شاحمات, دويبى, توعىزقۇمالاق ويناۋعا بارلىق جاعداي جاسالعان. دۋش, ساۋنا جۇمىس ىستەيدى.
الماتى قالاسىندا «Clinik Dr. Vovk» ورتالىعىنا جەتەكشىلىك ەتەتىن ۆيكتور ۆوۆك تا قۋانىشقا ورتاقتاسىپ, سىي-سياپات جاسادى. ول جەرلەستەرىنە جۇيەلى تۇردە قارجىلىق قولداۋ كورسەتىپ تۇرادى. فۋتبول الاڭىن اشۋعا, قۇرال-جابدىقتار الۋعا جاردەمدەستى. جاس حوككەيشىلەرگە 2 ميلليون تەڭگەنىڭ كيىمدەرىن ساتىپ اپەردى. بىرقاتار تۋرنيرلەردى ۇيىمداستىرۋعا ۇيىتقى بولدى.
ءتۇرلى بايراقتى باسەكەلەردە توپ جارىپ جۇرگەن سايىپقىران سپورتشىلار اۋداندا از ەمەس. سولاردىڭ ءبىرى ەركىن كۇرەستەن سپورت شەبەرلىگىنە ۇمىتكەر سانات قايىرگەلدين مينسك قالاسىندا وقۋشىلار اراسىندا وتكەن جارىستا جۇلدەلى ءۇشىنشى ورىندى يەلەنىپ, تۇركيادا ۇيىمداستىرىلاتىن بىرىنشىلىككە ازىرلەنۋدە. بۇعان دەيىن كوللەدجدە دايىندالىپ كەلگەن ەدىك. جاڭا زالدا شەبەرلىگىمىزدى جەتىلدىرە تۇسەتىن بولامىز, دەيدى بولاشاعىنان ۇلكەن ءۇمىت كۇتتىرەتىن بالعىن بالۋان.
پاراليمپياداشىلار ماراپاتتالدىوڭتۇستىك كورەيانىڭ پحەنچحان قالاسىندا وتكەن ءحىى قىسقى پاراليمپيادا ويىندارىندا ەلىمىزدىڭ نامىسىن التى سپورتشى قورعاسا, ۇشەۋى قىزىلجار وڭىرىنەن بولدى. ولاردىڭ اراسىندا الەكساندر گەرليتس شاڭعى جارىسىنان ءتورتىنشى ورىنعا تۇراقتاپ, قازاقستان كومانداسىنىڭ جالپى ەسەپتە 20-ورىنعا ورنىعۋىنا ۇلكەن ۇلەس قوستى.
جەرلەستەرىمىز تالاي الەمدىك جارىستاردا قازاقستاننىڭ اتاعىن شارتاراپقا تانىتىپ ءجۇر. ال مۇگەدەك سپورتشىلاردىڭ جەتىستىكتەرى ۇلكەن ەرلىكپەن پاراپار, دەدى وبلىس اكىمى قۇمار اقساقالوۆ پاراليمپياداشىلاردى ارنايى قابىلداعان جيىندا.
بياتلون جانە شاڭعىدان حالىقارالىق دارەجەدەگى سپورت شەبەرى الەكساندر گەرليتسكە قۇرمەت گراموتاسى مەن 1 ميلليون تەڭگەنىڭ سەرتيفيكاتى تابىس ەتىلدى. وزگە سپورتشىلار جارتى ميلليون تەڭگە مولشەرىندە سىياقىعا, جاتتىقتىرۋشىلار العىس حات پەن اقشالاي سىيلىققا يە بولدى.
جوعارى ساناتتاعى باپكەرلەر ماريا جانە يۆان دروبيازكولار وڭىرىمىزدە مۇگەدەكتەر سپورتىنىڭ دامۋىنا ايتارلىقتاي ەڭبەك ءسىڭىرىپ كەلەدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى