كەشە قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆتىڭ اقش قورعانىس ءمينيسترىنىڭ ازيا جانە تىنىق مۇحيتى ايماعى قاۋىپسىزدىگى ماسەلەلەرى بويىنشا ورىنباسارى دوكتور پيتەر لەۆويمەن كەزدەسۋى بولىپ ءوتتى.
– اقش-پەن ىنتىماقتاستىق مەملەكەتىمىزدىڭ سىرتقى ساياساتىنداعى ماڭىزدى باعىتتاردىڭ ءبىرى بولىپ تابىلادى. قازاقستاننىڭ اقش-پەن قارىم-قاتىناسى جوعارى سەرپىندىلىگىمەن, ءارتۇرلى قىزمەت سالالارى بويىنشا, ونىڭ ىشىندە قورعانىس سالاسى بويىنشا ءوزارا مۇددەلەستىككە نەگىزدەلگەن شىنايى ارىپتەستىك بايلانىستارىمەن سيپاتتالادى, – دەپ اتاپ ءوتتى قازاقستان قورعانىس ۆەدومستۆوسىنىڭ باسشىسى. – قازاقستان ءوز قاۋىپسىزدىگىن قامتاماسىز ەتۋدى ەلىمىزدىڭ باسشىلىعى جۇرگىزىپ وتىرعان تاتۋ كورشىلىك پەن بەيبىت سۇيگىش ساياساتى ارقىلى قاراستىرادى.
قازاقستان ارمياسى ەكى جاقتى اسكەري ىنتىماقتاستىق شەڭبەرىندە جاسالعان الداعى بەس جىلدىققا (2013-2017 جىلدارعا) ارنالعان جوسپارعا بايلانىستى بەلسەندىلىك تانىتىپ وتىر. قازاقستان قارۋلى كۇشتەرى وكىلدەرىنىڭ كۇشىمەن بىرقاتار جۇمىستار اتقارىلدى. ول ءجونىندە ەكى جاقتى كونسۋلتاتسيادا ءسوز ەتىلدى.
ءىس-شارا سوڭىندا تاراپتار جەمىستى جۇمىستاردىڭ جالعاسا بەرەتىنىنە سەنىم ءبىلدىردى.
وكسانا پارپۋرا, قورعانىس مينيسترلىگى ءباسپاسوز قىزمەتىنىڭ وكىلى.