ورالدا جاڭا مەكتەپ اشىلدى

 – ەلباسىنىڭ «نۇرلى جول» باعدارلا­ما­سىمەن سالىنعان جاڭا مەكتەپ – كوپتەن كۇتكەن قۋانىش. بۇل جىل باسىنان بەرى پاي­دالانۋعا بەرىلگەن ەكىنشى مەكتەپ. الداعى ۋاقىتتا تەك وبلىس ورتالىعىندا ەمەس, بوكەي ورداسى, زەلەنوۆ, اقجايىق, تەرەك­تى اۋداندارىندا مەكتەپتەر سالامىز. ەلباسى ءبىلىم سالاسىنا ەرەكشە كوڭىل ءبولىپ كەلەدى. وبلىس بويىنشا بۇل سالاداعى بيۋدجەت سوڭعى ءۇش جىلدا 20 ملرد تەڭگەگە كوبەيدى. مۇعالىمدەر جاعدايىنا دا مەم­لەكەت باسشىسى باسا نازار اۋدارۋدا. وسى ورايدا جاڭا فورماتقا وقۋعا كوشكەن مۇعا­لىمدەردىڭ جالاقىسى كوبەيەتىن بولادى. وعان قازىر رەسپۋبليكادان ءتيىستى قاراجات كۇتىپ وتىرمىز, – دەدى سالتاناتتى اشىلۋ جيىنىنا قاتىسقان وبلىس اكىمى التاي كول­گىنوۆ.

سوڭعى جىلدارى كوشىپ كەلۋشىلەردىڭ, تەگىن جەر ۇلەسىن الۋشىلاردىڭ ەسەبىنەن ورال قالاسىنىڭ ەتەك-جەڭى داليىپ بارادى. «كوكجيەك» شاعىن اۋدانى دا سوڭعى كەزدە پايدا بولعان. سۋ, كوگىلدىر وتىن سە­كىلدى جەلىلەر تارتىلىپ, جولى سالىنىپ جاتقان جاڭا اۋداننىڭ بالالارى وسى كەزگە دەيىن كورشىلەس سەلەكتسيوننىي كەنتىندەگى №12 مەكتەپكە قاتىناپ وقيتىن. ول مەكتەپ عيماراتىندا دا ورىن بولماي, وقۋشىلار كوپ قيىندىق كوردى. ەندى, مىنە, جاڭا اۋداننىڭ ءوز مەكتەبى بار. جالپى اۋماعى 8,5 مىڭ شارشى مەتر مەكتەپ عي­ماراتىندا 56 وقۋ كابينەتى, كىتاپحانا, 2 شەبەرحانا, بارلىق قۇرالدارىمەن جاب­دىقتالعان سپورت زالى, 200 ورىندىق ءما­جىلىس زالى, راديوتوراپ كابينەتى, 130 ورىن­عا ارنالعان مەكتەپ اسحاناسى بار. بارلىق كابينەت پروەكتىلىك ەكرانمەن جاب­دىقتالعان. جاڭا مەكتەپكە 500 وقۋ­شى, شاعىن ورتالىققا 100 وقۋشى قابىل­دان­باق.

قۇرىلىسى 2016 جىلدىڭ قاراشا ايىن­دا باستالعان مەكتەپ عيماراتىن سالۋ­عا «نۇرلى جول» باعدارلاماسى اياسىندا 1 255,609 ملن تەڭگە قارجى جۇمسالعان.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان وبلىسى