حالىقتى الەۋمەتتىك قورعاۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزىلىپ, ەلىمىزدە قوعامنىڭ ءارتۇرلى توپتارىنا مەملەكەت تاراپىنان تاعايىندالاتىن جاردەماقىلاردى تولەۋ ءتارتىبى وزگەرگەن بولاتىن. بۇل وزگەرىستەر مۇگەدەكتىكتى تاعايىنداۋ ماسەلەسىنە دە قاتىستى. ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا باتىس قازاقستان وبلىسىندا تاجىريبەدەن وتكىزىلىپ جاتقان وسى جوبانىڭ بارىسىمەن تانىستى.
بۇرىن ناۋقاستار مۇگەدەكتىك الۋى ءۇشىن اۋرۋحانادا ايلاپ جاتىپ, ەمحانادا تەكسەرىلىپ, سان ءتۇرلى قۇجات جيناپ, سودان كەيىن عانا مەديتسينالىق-الەۋمەتتىك ساراپتامادان ءوتىپ, مۇگەدەكتىك تۋرالى قۇجاتىن الا الاتىن. جاڭا جوبا بويىنشا بۇل ءتارتىپ وزگەردى. ەندى مۇگەدەكتىك ناۋقاستىڭ قاتىسۋىنسىز, قۇجاتتاردى ساراپتاۋ ارقىلى سىرتىنان تاعايىندالادى. بۇل سىرقاتقا قاتىستى بارلىق مەديتسينالىق قۇجات ەلەكتروندى فورماعا ءتۇسىپ, ناۋقاستىڭ ەلەكتروندى امبۋلاتوريالىق كارتاسى پايدا بولعان كەزدە وپ-وڭاي جۇزەگە اسادى ەكەن. ياعني مۇگەدەكتىكتى تاعايىندايتىن تاۋەلسىز ساراپشىلار ەلەكتروندى كورسەتكىشتەردى ساراپتاۋ ارقىلى شەشىم قابىلدايدى. بۇل قۇجاتتاردا ناۋقاستىڭ اتى-ءجونى كورسەتىلمەيتىندىكتەن, ساراپشىلار ءتىپتى كىمگە مۇگەدەكتىك تاعايىنداپ وتىرعاندارىن دا بىلمەيدى ەكەن.
سوڭعى كەزدە وڭىردە دەنساۋلىق ساقتاۋ سالاسىن اقپاراتتاندىرۋ ءىسى جەدەل جۇرۋدە. وبلىستىق دەنساۋلىق ساقتاۋ باسقارماسىنىڭ باسشىسى قانات توسەكباەۆتىڭ ايتۋىنشا, ءوڭىردىڭ مەديتسينالىق ۇيىمدارىندا «Kazmedinform» مەديتسينالىق اقپاراتتىق جۇيەسى, قالانىڭ 6 ەمحاناسىندا ەلەكتروندى كەزەكتى باسقارۋ جۇيەسى, جەدەل مەديتسينالىق جاردەمدى باسقارۋدىڭ «اديس» اۆتوماتتاندىرىلعان جۇيەسى ەنگىزىلگەن. مۇنىڭ ءبارى جوعارىدا ايتىلعان مۇگەدەكتىكتى تاعايىنداۋ جونىندەگى قاناتقاقتى جوبانى سىناپ كورۋگە تولىق مۇمكىندىك بەرەدى.
س.جاقىپوۆا ورالداعى №3 ەمحانانىڭ جۇمىسىمەن تانىسقان سوڭ, مەديتسينالىق اقپاراتتىق جۇيە بويىنشا وڭىرلەر اراسىندا باتىس قازاقستان وبلىسىنىڭ كوشباسشى ەكەندىگىن ايتىپ ءوتتى. مىنە, سوندىقتان دا اتالعان قاناتقاقتى جوبا ءبىرىنشى بولىپ اق جايىق وڭىرىندە ىسكە قوسىلادى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى