سامميت وتكەن ەلدەر ساناۋلى. سولاردىڭ ءبىرى ارى بىرەگەيى – قازاќستان
پان گي مۋن, بۇۇ باس حاتشىسى:
– مەن ەقىۇ-داعى قازاقستاننىڭ توراعالىعىن جوعارى باعالايمىن. ون ءبىر جىل بويى بولماعان ءسامميتتىڭ وتكىزىلۋى قازاقستاننىڭ كوشباسشىلىعىن عانا ەمەس, نۇرسۇلتان نازارباەۆتىڭ جەكە ءوز باسىنا بەرىلگەن ۇلكەن باعا, ونىڭ جاھاندىق ماڭىزى بار باستامالارى مەن يدەيالارىنىڭ مويىندالعاندىعىنىڭ بەلگىسى دەپ ويلايمىن. استانادا ەقىۇ ءسامميتىن وتكىزۋ ارقىلى قازاقستان تمد ەلدەرى مەن ورتالىق ازيا مەملەكەتتەرى اراسىندا ءبىرىنشى بولىپ سۋىرىلىپ العا شىعىپ, ءوزارا ارىپتەستىكتىڭ جاڭا داۋىرىنە جول اشتى.
حيللاري كلينتون, اقش مەملەكەتتىك حاتشىسى:
– تۇڭعىش رەت ەقىۇ ءسامميتىنىڭ ورتالىق ازياداعى ەلدە ءوتىپ وتىرعاندىعى ۇيىمنىڭ جانە حەلسينكي قاعيداتتارىنىڭ ءبىر عانا توپتا نەمەسە جەكەلەگەن ەلدەردە عانا ەمەس, بۇكىل الەمدە دەرلىك قولدانىلاتىندىعىن كورسەتەدى.
استاناداعى بۇل سامميت ۇلكەن ماڭىزعا يە. بۇل ءسامميتتى وتكىزگەن قازاقستان تاۋەلسىزدىك العان جىلدار ىشىندە تولايىم تابىستارعا, ونىڭ ىشىندە ەكونوميكالىق جەتىستىكتەرگە قول جەتكىزدى. وسى ارقىلى ول ءوزىنىڭ الدىنا ماقسات قويىپ, سونى ورىنداي الاتىن ەل ەكەنىن كورسەتتى.
سەرگەي لاۆروۆ, رەسەي فەدەراتسياسىنىڭ سىرتقى ىستەر ءمينيسترى:
– قازاقستان توراعالىعىنىڭ داۋسىز جەمىسى دەپ ون ءبىر جىل بويى وتكىزىلمەگەن ۇيىم ءسامميتىن ۇيىمداستىرۋىن اتاۋعا ءتيىسپىز. كوپكە ءمالىم, رەسەي پرەزيدەنتى دميتري مەدۆەدەۆ سامميت وتكىزۋ جايىنداعى قازاقستان پرەزيدەنتى نۇرسۇلتان نازارباەۆتىڭ باستاماسىن العاشقى بولىپ قولدادى. جانە وسى جولعى ءسامميتتىڭ تۇڭعىش رەت گەوگرافيالىق ەۋروپادان تىس ايماقتا وتكىزىلۋى ۇيىمعا مۇشە ەۋروپالىقتار مەن ازيالىقتاردىڭ اراسىنداعى ۇزىلمەيتىن بايلانىستىڭ بەلگىسىندەي بولدى.
انگەلا مەركەل, گەرمانيا كانتسلەرى:
– ءبىز حەلسينكي اكتىسى ومىرگە كەلگەننەن كەيىن 35 جىلدان سوڭ جۇزدەستىك. سودان بەرى الەم وتە قاتتى وزگەردى. قازىرگى كۇنگى ۆانكۋۆەر مەن ۆلاديۆوستوك اراسىنداعى كەڭىستىك ول كەزدەگىدەن مۇلدە باسقاشا سيپاتتا. وسىنداي جاعدايدا پرەزيدەنت نازارباەۆقا استانا ءسامميتىن ۇيىمداستىرعانى ءۇشىن العىسىمدى بىلدىرەمىن. تۇڭعىش رەت ەقىۇ ءسامميتى ورتالىق ازيادا وتكىزىلدى. بۇل وسى ايماققا جاڭاشا كوزبەن قاراۋعا مۇمكىندىك بەرەدى.
الەكساندر لۋكاشەنكو, بەلارۋس رەسپۋبليكاسىنىڭ پرەزيدەنتى:
– استانا ءسامميتىنىڭ وتكىزىلۋى – نۇرسۇلتان نازارباەۆ باعىندىرعان ەڭ بيىك بەلەس بولىپ تابىلادى. ول بۇل بەلەستى جوعارى ەتىپ قويدى جانە ونداعى ءوزىنىڭ مىندەتتەمەلەرىن تاماشا ورىنداپ شىقتى. مەن ەقىۇ-نىڭ سامميتتەرىنە وسىمەن ءۇشىنشى رەت قاتىسقان ساياساتكەرمىن. مۇنداي جوعارى وتكەن جيىندى ءالى كورگەنىم جوق.
مەن نۇرسۇلتان ءابىش ۇلىنا, وزگە دە ساياساتكەرلەر ايتقانىنداي, بۇل سامميت جۇمىسى بارلىق سەگمەنتتەر بويىنشا كەرەمەت ۇيىمداستىرىلعانىن اتاپ كورسەتەمىن. نەتكەن تاماشا ۇدەرىس, شەنەۋنىكتەر, قاۋىپسىزدىك قىزمەتى, جۋرناليستەر – ءبارى دە شىنايى دوستىق نيەتتە قوناقجايلىلىق تانىتتى. سامميت جۇمىسىنا ەشكىم دە كەدەرگى جاسامادى. ءبىز قازاقستاننان ۇيرەنۋىمىز كەرەك.
كەۆين رادد, اۆستراليا سىرتقى ىستەر ءمينيسترى:
– قازاقستان ەقىۇ جۇمىسىنا تىڭ سەرپىن بەردى. راسىندا, قازاقستان توراعالىعىنا دەيىن ۇيىم جۇمىسىندا ءبىرشاما ۇنسىزدىككە تولى تىنىشتىق ورناعانى ەشكىمگە دە جاسىرىن ەمەس. مەن قازاقستان پرەزيدەنتىنە بارلىعىمىزدى ۇلكەن ۇنقاتىسۋ الاڭىنا شاقىرعانى ءۇشىن العىس ايتامىن. جانە ونىڭ كونفەسسياارالىق, ۇلتارالىق كەلىسىم جولىنداعى جۇمىسى اتاپ ايتۋعا تۇرارلىق. بۇگىندە بۇل وتە ماڭىزدى ماسەلە.
سامميت اسا ۇلكەن جەتىستىك بولدى. ول ءبىر مەزگىلدە ۇلان-عايىر ايماقتا ورنالاسقان ەلدەردىڭ باسشىلارىن جينادى. كەڭىستىكتەگى قاۋىپسىزدىك ماسەلەسىن تەك بەيبىت جولىمەن قامتاماسىز ەتۋدىڭ باستى قاعيدات ەكەنىن بارلىعىنا ماقۇلداتقىزدى.