تەمىرتاۋدا بالىق اۋلاۋدان الەم چەمپيوناتى ءوتتى

جالپى, الەم چەمپيوناتىن وتكىزۋ قۇقىعىنا ءبىزدىڭ ەل مەن بولگاريا باسەكەگە تۇسكەن بولاتىن. تۇپكىلىكتى شەشىم وتكەن جىلدىڭ ناۋرىز ايىن­دا قابىلدانىپ, مۇنداي جارىس وتكىزۋگە ينفرا­قۇرى­لىمى ساقاداي-ساي سامارقان سۋ قويماسى ابدەن لايىق دەپ تانىلعان ەدى.

چەمپيونات ەرەجەسىنە ساي, ءبىرىنشى كەزەڭدە بەس-بەستەن مۇشەسى بار ءار كوماندا بالىقتى ءۇزىلىسسىز ءۇش ساعات بويى اۋلادى. ەكىنشى كەزەڭدە دە وسىنشا ۋاقىت اۋلاۋ شارت بولدى. العاشقى تۋر قورىتىندىسىندا پاۆلودارلىق ەرجان ۋاحيتوۆ ءۇش ساعاتتا 9,5 كيلو بالىق اۋلاپ, الەمدىك رەكورد ورناتقان ەدى. بىراق, ەكى تۋر ناتيجەسى بويىنشا ەرجان دا, ءبىزدىڭ قۇراما دا ۇزدىك ۇشتىككە ەنە المادى. جارىس قورىتىندىسىندا قۇرامىندا پاۆەل لوگۆينەنكو, ەرجان ۋاحيتوۆ, دميتري لەۆيتسكي, تيمۋر كوۆاليوۆ (پاۆلودار), دميتري ەليسەەۆ (قوستاناي) جانە پاۆەل نەزامۋتدينوۆ (الماتى) ونەر كورسەتكەن قازاقستان كومانداسى اۋلاعان بالىقتىڭ سالماعى 41,150 كيلو بولىپ, ولار التىنشى ورىندى مىسە تۇتتى. دەگەنمەن, از دا بولسا ىلگەرىلەۋ بار. ءبىزدىڭ بالىقشىلار بىلتىر لاتۆيادا وتكەن الەم چەمپيوناتىن 7-ورىنمەن اياقتاعان بولاتىن.

ال چەمپيوناتتا 48,583 كيلو بالىق اۋلاعان رە­سەي كومانداسى باس جۇلدەنى يەمدەندى. اۋلاعان بالىق­تارىنىڭ جالپى سالماعى 46,313 كيلو تارتقان لاتۆيا كومانداسى ەكىنشى ورىن الدى. ۇزدىك ۇشتىكتى 42,728 كيلو بالىق ۇستاعان ليتۆا بالىقشىلارى تۇيىندەدى.

جەكەلەي سىندا التىن جۇلدە لاتۆيالىق بالىقشىعا بۇيىرسا, رەسەي وكىلى كۇمىس مەدال يەگەرى اتاندى. ۋكراينالىق سپورتشى قولا جۇلدەنى قاناعات ەتتى. قازاقستاندىقتار اراسىنان ەڭ ۇزدىك كورسەتكىشكە پاۆەل نەزامۋتدينوۆ قول جەتكىزدى. ول 10,168 كيلو بالىق اۋلاپ, چەمپيوناتتى 12-ءشى ورىنمەن اياقتادى.

قازاقستان 2009 جىلدان بەرى تۇششى سۋدا بالىق اۋ­لاۋ حالىقارالىق فەدەراتسياسىنىڭ مۇشەسى. ءبىر عانا قاراعاندى وبلىسىنىڭ وزىندە بەس مىڭعا جۋىق سپورت­شى بار, ولار فەدەراتسيانىڭ قولداۋىمەن ءتۇرلى سايىس­تارعا قاتىسىپ, ءتاۋىر ناتيجەلەرگە قول جەتكىزىپ ءجۇر. 

قايرات ءابىلدا, «ەگەمەن قازاقستان»

قاراعاندى وبلىسى, تەمىرتاۋ قالاسى