قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆانىڭ توراعالىعىمەن قازاقستان رەسپۋبليكاسىنىڭ پرەزيدەنتى جانىنداعى سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيا وتىرىسى ءوتتى, دەپ حابارلايدى اقوردانىڭ ءباسپاسوز كلۋبى.
جيىندا 2015-2025 جىلدارعا ارنالعان سىبايلاس جەمقورلىققا قارسى ستراتەگيانى جۇزەگە اسىرۋعا باعىتتالعان 2015-2017 جىلدارداعى ءىس-شارالار جوسپارىنىڭ ورىندالۋ ناتيجەلەرى, سونداي-اق مەملەكەتتىك كىرىس ورگاندارىنداعى جەمقورلىققا قارسى ارەكەت باعىتىندا قابىلدانىپ جاتقان شارالار قارالدى.
وتىرىستى اشقان گۇلشارا ابدىقالىقوۆا نۇرسۇلتان نازارباەۆتىڭ قازاقستان حالقىنا ارناعان ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنداعى سىبايلاس جەمقورلىقتىڭ الدىن الۋعا بايلانىستى كۇرەس جالعاسا بەرەدى دەگەن سوزىنە توقتالدى. مەملەكەتتىك ورگاندارداعى ۇدەرىستەرگە, سونىڭ ىشىندە ولاردىڭ تۇرعىندارمەن جانە بيزنەس وكىلدەرىمەن ءوزارا ىقپالداستىعىنا تسيفرلاندىرۋ تەحنولوگيالارىن ەنگىزۋ ماڭىزدى بولىپ سانالادى.
– جالپى العاندا, قابىلدانعان شارالار «ترانسپارەنسي ينتەرنەشنلدىڭ» سىبايلاس جەمقورلىقتى قابىلداۋ يندەكسىندە قازاقستاننىڭ 9 ساتىعا كوتەرىلۋىنە مۇمكىندىك بەردى, – دەدى مەملەكەتتىك حاتشى. وتكەن ءۇش جىلدا اكىمشىلىك كەدەرگىلەردى ايتارلىقتاي ازايتۋعا, تۇرمىستىق سيپاتتاعى سىبايلاس جەمقورلىقتى باسەڭدەتۋگە, سونداي-اق مەملەكەتتىك ورگاندار قىزمەتىنىڭ اشىقتىعىن ارتتىرۋعا قول جەتكىزىلدى.
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل جونىندەگى اگەنتتىك پەن قارجى مينيسترلىگىنىڭ مەملەكەتتىك كىرىستەر كوميتەتىنىڭ باياندامالارى تىڭدالدى.
سىبايلاس جەمقورلىققا قارسى ستراتەگيانى جۇزەگە اسىرۋ باعىتىندا 2015-2017 جىلدارعا ارنالعان ءىس-شارالار جوسپارى بويىنشا 63 شارا اتقارىلدى, سونىڭ ىشىندە 4 جاڭا زاڭ, 20 نورماتيۆتىك-قۇقىقتىق اكت ازىرلەنىپ, 8 اقپاراتتىق جۇيە ىسكە قوسىلدى, سونداي-اق 36 ۇيىمداستىرۋ ءىس-شاراسى وتكىزىلدى. قازىرگى ۋاقىتتا قازاقستان رەسپۋبليكاسىنىڭ 2025 جىلعا دەيىنگى دامۋىنىڭ ستراتەگيالىق جوسپارى ەسكەرىلە وتىرىپ ازىرلەنگەن سىبايلاس جەمقورلىققا قارسى ستراتەگيانى جۇزەگە اسىرۋ باعىتىندا 2018-2020 جىلدارعا ارنالعان ءىس-شارالار جوسپارى بەكىتىلۋگە ۇسىنىلدى.
كوميسسيا وتىرىسىنىڭ قورىتىندىسى بويىنشا مەملەكەتتىك كىرىستەر كوميتەتىنىڭ ىشكى قاۋىپسىزدىك بولىمشەلەرىنىڭ جۇمىسىن جانداندىرۋ, قاراماعىنداعى قىزمەتكەرلەردىڭ جەمقورلىق سيپاتىنداعى قۇقىق بۇزۋشىلىعى ءۇشىن باسشىلاردىڭ جاۋاپكەرشىلىگىن ارتتىرۋ, سونداي-اق جەمقورلىق قاتەرىن ازايتۋ ءۇشىن تسيفرلىق تەحنولوگيالاردى ەنگىزۋ جونىندە تاپسىرمالار بەرىلدى.