ءدال قازىر شىعىس قازاقستاننىڭ 6 بىردەي اۋدانى (كۇرشىم, زىريان, جارما, ۇلان, شەمونايحا, كاتونقاراعاي) مەن ەكى قالاسىندا (سەمەي, وسكەمەن) ازاماتتىق قورعانىستىڭ بارلىق قىزمەتتەرى كۇشەيتىلگەن جۇمىس رەجيمىنە اۋىستىرىلدى.
وبلىستىق توتەنشە جاعدايلار دەپارتامەنتىنىڭ تاراتقان سوڭعى مالىمەتتەرىنە سۇيەنسەك, ايماقتا 600 ادام قاۋىپسىز جەرگە كوشىرىلىپتى. اسىرەسە وسكەمەننىڭ ىرگەسىندەگى گلۋبوكوە اۋدانى تۇرعىندارىنا قيىن تيۋدە. اۋداننىڭ توعىز بىردەي اۋىلىن (گلۋبوكوە, پرەدگورنوە, پروگرەسس, التاي, بەلوۋسوۆكا, ۆيننوە, نوۆو-ۋلبينكا, ۆەسەلوۆكا, زارەچنوە) سۋ باسقان.
وبلىس اكىمى دانيال احمەتوۆ كەشە تۇندەلەتىپ گلۋبوكوە اۋدانىنا بارىپ, تاسقىننان زارداپ شەككەن ۇيلەردىڭ تۇرعىندارىمەن كەزدەسىپ, جاعدايدى ءوز كوزىمەن كورىپ قايتتى. ايتا كەتەيىك, كەشە اتالعان اۋداندا جەرگىلىكتى اۋقىمداعى توتەنشە جاعداي جاريالانىپ, 406 ادام (135-ءى – بالالار) قاۋىپسىز جەرگە كوشىرىلگەن-ءدى. ولاردىڭ ءبىر بولىگى گلۋبوكوە كەنتىندەگى جاتاقحاناعا, بەلوۋسوۆكا كەنتىنىڭ اۋرۋحاناسىنا, اگرارلىق كوللەدجگە, پرەدگورنوە اۋىلىنىڭ №2 ورتا مەكتەبىنە, پروگرەسس اۋىلىنىڭ №6 ورتا مەكتەبىنە, قالعاندارى تۋىستارىنىڭ ۇيلەرىنە ورنالاستىرىلعان ەدى. «گلۋبوچانكا وزەنى ارناسىنان اسىپ, وسىنداي جاعداي ورىن الىپ وتىر. 2 كۇننىڭ ىشىندە ارنايى كوميسسيا بارلىق سۋ العان ۇيلەردى تەكسەرەدى. كىرۋ مۇمكىن ەمەس بولعان ۇيلەردىڭ ماسەلەسى سۋ قايتقان سوڭ قارالادى. سول تەكسەرۋلەر ناتيجەسىندە تۇرۋعا جارامسىز بولعان ءۇي يەلەرىنە باسقا ءۇي نەمەسە پاتەر بەرىلەدى. ب ۇلىنگەن ۇيلەر جوندەلەدى» - دەدى ايماق باسشىسى تۇرعىندارمەن كەزدەسۋىندە.
د.احمەتوۆتىڭ ايتۋىنشا, سوڭعى 3 تاۋلىكتە گلۋبوكوە اۋدانىنان بولەك وسكەمەن قالاسىندا 60 ءۇيدى, كاتونقاراعاي اۋدانىندا 4 ءۇيدى سۋ العان. قازىرگى ۋاقىتتا گلۋبوكوە اۋدانى بويىنشا سۋ باسقان ۇيلەردىڭ سانى 163-كە جەتىپ, 566 ادام قاۋىپسىز جەرگە كوشىرىلگەن. الەۋمەتتىك نىساندار بازاسىندا قۇرىلعان ۋاقىتشا باسپانالاردى سولاردىڭ تەك 60-ى عانا پانالاۋدا. قالعاندارى تۋىسقاندارىنىڭ ۇيىنە ورنالاسىپتى. «ەكى كۇننىڭ ىشىندە 78 ميلليمەتر جاڭبىر جاۋعان. بۇل ءۇش ايدىڭ مولشەرىنەن اسادى. گلۋبوكوە اۋدانىندا سۋ العان اۋىلدار دا, وسكەمەننىڭ شەتىندەگى جەكە سەكتورلار دا شۇڭقىرلى جەردە ورنالاسقان.
مەزگىلسىز جاۋىن ءجىبىپ ۇلگەرمەگەن توڭنىڭ بەتىمەن ۇيلەرگە جايىلىپ وتىر. بۇعان دەيىن اياگوزدەگى تاسقىننان زارداپ شەككەن وتباسىلارعا بارلىعى 189 ملن تەڭگە ءبولىندى. ال وسكەمەندەگى تاسقىننىڭ سالدارىن جويۋعا قالا بيۋدجەتىنەن قارجى جۇمسالۋدا. گلۋبوكوە اۋدانىنداعى سۋ باسقان ۇيلەردىڭ تەڭ جارتىسى تەكسەرىلدى. قالعانىن 2 كۇننىڭ ىشىندە قاراپ شىعادى. سونىڭ ناتيجەسى بويىنشا ءتيىستى قارجى بولىنەدى» - دەدى وبلىس اكىمى.
وبلىستىق توتەنشە جاعدايلار دەپارتامەنتى بۇگىن زىريان اۋدانىنداعى بەرەزوۆكا وزەنى ارناسىنان اسىپ, سولوۆەۆو اۋىلىنان 18 ادامنىڭ (ونىڭ 10-ى بالا) قاۋىپسىز جەرگە كوشىرىلىپ, ۋاقىتشا اۋىلداعى مەكتەپكە ورنالاستىرىلعانىن حابارلادى. قازىر كاتونقاراعاي مەن ۇلكەن نارىن اۋىلدارىنداعى كوللەدجدەردە ەۆاكۋاتسيالاۋ بەكەتتەرى اشىلىپ, 32 تۇرعىن ۋاقىتشا ورنالاستىرىلدى.
ازامات قاسىم,
«ەگەمەن قازاقستان»
شىعىس قازاقستان وبلىسى