گلۋبوكوە اۋدانىندا قاۋىپسىز جەرگە كوشىرىلگەن تۇرعىندار سانى 272 ادامعا جەتتى, دەپ حابارلايدى اۋدان اكىمدىگىنىڭ ءباسپاسوز قىزمەتى.
اۋدان اكىمىنىڭ ورىنباسارى سەرگەي كيماسوۆتىڭ ايتۋىنشا, 160 ءۇي قىزىل سۋ قۇرساۋىندا قالىپ, 272 ادام قاۋىپسىز جەرگە كوشىرىلگەن. ولاردىڭ كوبى اۋىل مەكتەپتەرىن پانالاۋعا ءماجبۇر.
«اپات سالدارىمەن 85 تەحنيكا مەن 160 ادام كۇرەسىپ جاتىر. جايىلعان سۋدى سورعىتۋ جۇمىستارى دا قىزۋ جۇرۋدە. ارىقتار مەن قۇبىرلار قايتا-قايتا تازارتىلۋدا. تاسقىن باستاعالى 150 توننا قيىرشىق تاس توگىپ, 3500 قۇمقاپ توسەدىك. بۇل جۇمىستارعا توتەنشە جاعداي ماماندارى, جەرگىلىكتى پوليتسيا قىزمەتكەرلەرى مەن كوممۋنالدىق قىزمەت جۇمىسشىلارى جانە قاراپايىم حالىق كومەكتەسۋدە» - دەيدى سەرگەي كيماسوۆ.
ەسكە سالا كەتەيىك, بۇگىن اۋداندا جەرگىلىكتى ماڭىزداعى توتەنشە جاعداي جاريالانعان بولاتىن. قازىرگى تاڭدا گلۋبوكوە جانە بەلوۋسوۆكا كەنتى, تارحانكا, پرەدگورنوە جانە پروگرەسس اۋىلدارى سۋ قۇرساۋىندا قالىپ وتىر.