قىزىلوردالىقتار ناۋرىز مەيرامىن اتاپ ءوتتى

ورتالىق الاڭدا 30 كيىز ءۇي تىگىلىپ, ءار كيىز ۇيگە وزىندىك زامانعا ساي اتاۋ بەرىلدى: «شىعىس جۇلدىزى», «رۋحاني جاڭعىرۋ», «استانا قالاسىنا 20 جىل, قىزىلوردا قالاسىنا 200 جىل» جانە ت.ب. مۇندا كەلگەن قوناقتار ءتاتتى تاعامداردان ءدام تاتىپ, قىزىقتى ويىن-ساۋىق باعدارلامالارىن تاماشالادى. ودان بولەك, ارنايى پاۆيلونداردا جاپپاي كاسىپكەرلىكتى دامىتۋ جىلىنا ارنالعان كورمە ۇيىمداستىرىلىپ, جەرگىلىكتى وندىرۋشىلەردىڭ ونىمدەرى ورنالاستىردى.

مەرەكەلىك ءىس-شارا بارىسىندا قازاقشا كۇرەس, اسىق اتۋ, ارقان تارتۋ, گىر كوتەرۋ سەكىلدى ۇلتتىق سپورت ويىندارىنان جارىس ۇيىمداستىرىلدى, تاقىرىپتىق ساحنالىق كورىنىستەر مەن كونتسەرت كورسەتىلدى.

وبلىس اكىمى قىرىمبەك كوشەرباەۆ ايماق تۇرعىندارىن قۇتتىقتاپ, جىلى لەبىزىن ءبىلدىردى.

«بيىل ءبىز استانانىڭ 20 جىلدىعى مەن قىزىلوردا قالاسىنىڭ 200 جىلدىق مەرەيتويىن تويلاماقپىز! ناۋرىز بەن ناۋرىز ارالىعىندا سىر ءوڭىرى دە جەلكەندى جەتىستىكتەر مەن تاعىلىمدى تابىستار ورداسىنا اينالدى. 2018 جىل وبلىسىمىزدا جاپپاي كاسىپكەرلىكتى دامىتۋ جىلى دەپ جاريالاندى. سۇلۋ سىردىڭ سول جاعالاۋىنان جاڭا قالا بوي كوتەرۋدە. ەلوردامىز استانانى گازداندىرۋ - ءبىزدىڭ سىر وڭىرىنەن باستاۋ الاتىنى ءبىز ءۇشىن ۇلكەن قۋانىش. وسىنداي جاقسىلىعى مول ىزگى ىستەرمەن ناۋرىز مەيرامىنا امان-ەسەن جەتىپ وتىرايىق», - دەدى ايماق باسشىسى.

سونداي-اق, وبلىس اكىمى تيتوۆ مولتەك اۋدانىنداعى بۇرىنعى اپاتتى ءۇي تۇرعىندارى قونىستانعان تاسبوگەت كەنتىندەگى مولتەك اۋدانعا بارىپ, جاعدايلارىمەن تانىسىپ, ۇلىستىڭ ۇلى كۇنىمەن قۇتتىقتادى. مەرەكە قارساڭىندا جاڭا ۇيگە قونىستانعان تۇرعىندار ايماق باسشىسىنا ماسەلەلەرىن تەز ارادا شەشىپ بەرگەنى ءۇشىن تاعى دا العىس ايتتى.

اتاپ وتەيىك, بيىل ناۋرىز مەرەكەسىن سىر ەلىندە جاڭاشا باستاۋ ماقساتىندا 14 ناۋرىز كۇنىنەن باستاپ «قاۋىشۋ» كۇنى دەپ اتاپ ءوتتى. مەرەكە قارساڭىندا قىزىلوردا قالاسى مەن بارلىق اۋدانداردا سەنبىلىكتەر, اۋىل شارۋاشىلىق ونىمدەرى جارمەڭكەلەرى, ءتۇرلى مەرەكەلىك شارالار ۇيىمداستىرىلدى. ماسەلەن, كەشە ورتالىق الاڭدا «دومبىرا-دۋمان» جانە «جاستار كەشى» ءوتتى. 20-31 ناۋرىز كۇندەرى كوركەمسۋرەت گالەرەياسىندا «كوكتەم لەبى» كورمەسىندە جاس سۋرەتشىلەر كورەرمەندەردىڭ نازارىنا ءوز ونەرلەرىن ۇسىنادى. قالالىق يپپودرومدا بايگە, اۋدارىسپاق, تەڭگە ءىلۋ, قىز قۋ سەكىلدى ۇلتتىق ويىن تۇرلەرىنەن جارىستار ءوتتى.

تاعى ءبىر ەرەكشەلىك – بيىل ءاربىر مەرەكەلىك كۇن بەلگىلى تاقىرىپپەن وتكىزىلدى. ماسەلەن, 16 ناۋرىز - «ناۋرىز ءداستۇر», 17 ناۋرىز - «ناۋرىز-جاڭارۋ» كۇنى بولىپ بەكىتىلىپ, سالتاناتتى شارالار, تانىمدىق ساباقتار مەن كەزدەسۋلەر ۇيىمداستىرىلدى.