بەيبىتشىلىك جانە كەلىسىم سارايىندا ءدىن ىستەرى جانە ازاماتتىق قوعام مينيسترلىگى ءدىن كوميتەتىنىڭ توراعىسى ە.وڭعارباەۆتىڭ توراعالىعىمەن قازاقستاننىڭ ءدىني بىرلەستىكتەر وكىلدەرىنىڭ جيىنى ءوتتى.
ءىس-شاراعا جوعارعى سوت جانىنداعى سوت تورەلىگى اكادەمياسىنىڭ كافەدرا مەڭگەرۋشىسى ت.بۋرباەۆ, ۇلتتىق ەكونوميكا مينيسترلىگى ماكروەكونوميكالىق تالداۋ جانە بولجامداۋ دەپارتامەنتى ديرەكتورىنىڭ ورىنباسارى ا.احمەتوۆ, وسى دەپارتامەنتتىڭ باسقارما باسشىسى مىندەتىن اتقارۋشى ن.شايماحانوۆ, ءبىلىم جانە عىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم دەپارتامەنتى ديرەكتورىنىڭ ورىنباسارى گ.سەرالين, سونىمەن قاتار قازاقستاندا تىركەلگەن ءدىني بىرلەستىكتەردىڭ باسشىلارى مەن وكىلدەرى قاتىستى.
جيىننىڭ كۇن تارتىبىنە سايكەس مەملەكەت باسشىسى ن.نازارباەۆتىڭ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋى تالقىلاندى. ە.وڭعارباەۆ ءوز سوزىندە «بەس الەۋمەتتىك باستاما – ناقتى ماقساتتارى مەن انىق كورسەتكىشتەرى بار بىرەگەي الەۋمەتتىك باعدارلاما. ەلباسىمىز كورسەتكەن, ۇسىنعان جولدار وتاندىق ەكونوميكانىڭ ەسەپتەلگەن مۇمكىندىكتەرىنە نەگىزدەلگەن, شىنايى بولىپ ەسەپتەلەدى» دەپ اتاپ ءوتتى.
ءدىني بىرلەستىكتەردىڭ باسشىلارى پرەزيدەنتتىڭ الەۋمەتتىك باستامالارىن قولداي وتىرىپ, بۇل ۇندەۋدى مەملەكەت باسشىسىنىڭ تاريحي شەشىمى رەتىندە مويىندادى جانە بۇل بۇكىل قازاقستاندىق قوعامنىڭ مۇددەسىن ەسكەرەتىن ۋاقتىلى, تۇراقتى, ناقتى, وبەكتيۆتى ەكەنىن ايتتى.
جيىننىڭ قاتىسۋشىلارى حالىقتىڭ ءال-اۋقاتىن جاقسارتۋعا باعىتتالعان ەلباسى جاريالاعان قۇجاتتى قولدادى. استانا شىركەۋىنىڭ پروتوپريەستى بايدەكتىڭ ايتۋىنشا, «بەس الەۋمەتتىك باستاما», ول ءبىرىنشى كەزەكتە كونفەسسياارالىق كەلىسىم مەن بىرلىككە نەگىزدەلگەن, ءبىزدىڭ تاۋەلسىز مەملەكەتىمىزدىڭ پروگرەسسيۆتى دامۋىنىڭ كورسەتكىشى بولىپ سانالادى.
سونداي-اق «قازاقستاننىڭ ءدىني بىرلەستىكتەرى قاۋىمداستىعى» زاڭدى تۇلعالار بىرلەستىگىنىڭ باسشىسى ا.كليۋشەۆ ۇندەۋدى مەملەكەتتى ودان ءارى الەۋمەتتىك دامۋ مەن جاڭعىرتۋعا باعىتتايتىن باعدارلاما, مەملەكەتتىڭ الەۋمەتتىك ساياساتىنىڭ جاڭا دەڭگەيگە شىعۋى دەپ باعالادى. «الەۋمەتتىك-ەكونوميكالىق ماسەلەلەردى شەشۋ قازاقستاندىقتاردىڭ ءومىر ءسۇرۋ ساپاسىن جاقسارتاتىنى ءسوزسىز», دەدى ول.
كەزدەسۋ بارىسىندا قازاقستاننىڭ ءدىني بىرلەستىكتەر وكىلدەرىنىڭ جيىنى اتىنان ناۋرىز مەيرامىن تويلاۋعا بايلانىستى قازاقستان حالقىنا قۇتتىقتاۋ حاتى قابىلداندى.