اۋليەاتا ءوڭىرى امال مەرەكەسىن اتاپ ءوتتى

بۇل كۇنى تاراز قالاسىنداعى «بالاساعۇن» ورتالىق كونتسەرت زالىندا سوناۋ ساقتار زامانىنان, تۇمار پاتشايىم داۋىرىنەن بەرى جالعاسىپ كەلە جاتقان ۇلتتىق ءداستۇر ناسيحاتتالدى. اتالعان يگى شارانى وبلىستىق مادەنيەت, ارحيۆتەر جانە قۇجاتتاما باسقارماسى ۇيىمداستىردى.

بۇل ورايدا وبلىستىق قازاق دراما تەاترىنىڭ ارتىستەرى كورىسۋ كۇنىنىڭ ۇلت­تىق داستۇرىمىزگە ەنگەنىن بەي­نە­لەيتىن قويىلىم قويىپ, كوپ­شى­لىكتىڭ ىقىلاسىنا يە بولدى. وسى كۇ­نى ەرلەر ءبىر-بىرىمەن ءتوس قاعى­س­تى­رىپ, اقساقالدار مەن اق جاۋلىقتى اجە­لەر ۇرپاق تاربيەسى جونىندە ونە­گەلى اڭگىمەلەر ءوربىتتى. كوپشىلىك ءبى­رىن-ءبىرى جاڭا جاس قوسۋىمەن قۇت­تىقتاپ, مارە-سارە كۇي كەشتى. مەرەكە بارىسىندا وبلىستىق ارداگەرلەر كەڭەسىنىڭ توراعاسى, جامبىل وبلى­سى­نىڭ قۇرمەتتى ازاماتى ەركىن­بەك سول­تىباەۆ ءسوز الىپ, كوپ­شىلىكتى كە­لىپ جەتكەن كوكتەم مەرە­كە­سى­مەن قۇت­تىقتادى. الدا كەلە جات­قان ۇلىس­تىڭ ۇلى كۇنى ەلىمىزگە بەي­بىتشىلىك پەن تاتۋلىق اكەلسىن دە­گەن تىلەگىن ءبىلدىردى. سونداي-اق ەڭ­بەك ار­داگەرى نۇرماحان تىلەگەنوۆ تاراز قا­لاسىنىڭ تۇرعىندارى مەن قوناق­تا­رىنا باتا بەردى.

ايتا كەتەيىك, ناۋرىز مەرەكەسى بيىل اۋليەاتالىقتار ءۇشىن جاڭا مازمۇنعا يە بولۋدا. ولاي دەيتىنىمىز, جامبىل وبلىسىنىڭ اكىمى اسقار مىرزاحمەتوۆتىڭ قاۋلىسىمەن 14-22 ناۋرىز ارالىعىندا وڭىردە ناۋرىز مەرەكەسى تويلاناتىن بولادى. توعىز كۇن بويى حالىق «كورىسۋ كۇنى», «مەيىرىم كۇنى», «تاعزىم كۇنى», «الاس كۇنى», «ناۋرىز-شاشۋ», «ىنتىماق كۇنى», «شاتتىق كۇنى», «ۇيلەسىم كۇنى» جانە « ۇلىس كۇنى» سياقتى ايتۋ­لى كۇندەردى اتاپ ءوتىپ, ءار كۇننىڭ ءوز ەرەكشەلىگىنە ساي سالتاناتتى شارا­لار ۇيىمداستىرىلادى. وسىناۋ دۋ­ماندى كۇنى وبلىستىق فيلارمونيا ونەر­پازدارىنىڭ ونەرى مەن وڭىردەگى ەتنو­مادەني بىرلەستىكتەردىڭ كون­تسەرت­تىك باعدارلاماسى دا كوپشىلىككە كوكتەم اسەرىن سىيلادى. سونداي-اق مەرەكەگە جينالعان كوپشىلىك ارنايى تىگىلگەن كيىز ءۇيدىڭ ىشىنە كىرىپ, ناۋرىز-كوجەدەن جانە ءتاتتى باۋىرساقتاردان ءدام تاتتى.

حاميت ەسامان, «ەگەمەن قازاقستان»

جامبىل وبلىسى