قازىرگى تاڭدا اقمولا وبلىسىندا توتەنشە جاعدايلار قىزمەتى كوكتەمگى سۋ تاسقىنىنىڭ الدىن الۋ جۇمىستارىنا كىرىسىپ تە كەتتى. اسىرەسە اتباسار اۋدانىندا وتكەن جىلعى جاعدايدىڭ قايتالانۋى مۇمكىندىگى دە جوققا شىعارىلماۋدا.
وسىعان وراي جاقىندا بۇل اۋداندا «كوكتەم-2018» رەسپۋبليكالىق كوماندالىق-شتابتىق وقۋ-جاتتىعۋىنىڭ وتكىزىلۋى دايىندىق جۇمىستارىنىڭ قانشالىقتى ۇيىمداستىرىلعاندىعىن اشىپ كورسەتىپ بەردى.
قازاقتا «اۋزى كۇيگەن ۇرلەپ ىشەدى», دەمەكشى بىلتىرعى كوكتەمدە سۋ تاسقىنى ءبىراز جۇرتتى ابىگەرگە سالىپ كەتكەنى ءالى ەسىمىزدە. جولدار شايىلىپ, مالدار سۋعا اعىپ, جەرگىلىكتى تۇرعىنداردىڭ باسپانالارى سۋعا تولعان ەدى. وسىلايشا كوكتەمگى قارعىن سۋ وڭىرگە ايتارلىقتاي ەكونوميكالىق شىعىن الىپ كەلگەن. مۇنداي جاعداي جاڭادان قىزمەتىنە بەلسەنە كىرىسكەن وبلىس اكىمى مالىك مىرزالين ءۇشىن ۇلكەن سىن بولدى. جان-جاقتان كەلگەن قولداۋدىڭ ارقاسىندا قيىندىقتى ەڭسەرە بىلگەن وبلىس باسشىسى ارتىنان سول سۋ العان وڭىرلەرگە ارنايى بارىپ, جاعدايمەن جاقىن تانىسقان. ناقتى تاپسىرمالار دا بەرگەن. سودان بەرى جاعداي ءبىرشاما وڭدالىپ قالعان سياقتى. الايدا ول تاپسىرمالار قانشالىقتى تىڭعىلىقتى ورىندالدى, ونى بيىلعى كوكتەمگى جاۋىن-شاشىن دالەلدەمەك.
اتباسار اۋدانىنا جاسالعان ءباسپاسوز تۋرى بارىسىندا وبلىستىق توتەنشە جاعدايلار دەپارتامەنتىنىڭ باستىعى الەكسەي سوۆەتوۆ الدىن الۋ شارالارىنا قاتىستى مالىمەتتەرمەن ءبولىستى. جالپى, اتباسار سۋ باسۋ قاۋپى جوعارى اۋداندار قاتارىندا. ولاي دەيتىنىمىز, وسىنداعى جاباي وزەنىندە, سول توڭىرەكتە ىلعالدىڭ مولشەرى شامادان تىس. ونىڭ ۇستىنە بىرنەشە جىلعا سوزىلعان باقىلاۋلار ناتيجەسى كورسەتكەندەي, اۋدان اۋماعىنا ناۋرىز جانە ءساۋىر ايلارىندا جاۋىن-شاشىن تۇسپەي قويمايدى. ال بۇل بوگەتتەرگە سالماق سالىپ, اپات قاۋپىن كۇشەيتە تۇسەتىنى ءسوزسىز. وسىعان وراي سۋ تاسۋىنىڭ الدىن الۋ ماقساتىندا جوعارىدا اتاپ كەتكەندەي قۇتقارۋعا قۇرىلعان وقۋ-جاتتىعۋدان وزگە كوپتەگەن ناقتى ءىس-شارالار قولعا الىنعان. ءتىپتى بۇل ماقساتقا اۋداندىق بيۋدجەتتەن 57,3 ميلليون تەڭگە دە ءبولىنىپتى. جالپى, اتباسار قالاسى تىرشىلىگىن قامتاماسىز ەتۋ نىساندارىنىڭ, توتەنشە جاعدايلار قىزمەتتەرىنىڭ جۇمىسىن ۇيلەستىرۋ ماقساتىندا اۋدان اكىمى اپپاراتىنىڭ وكىلدەرى ىشىنەن جەدەل شتاب جۇمىسى ۇيىمداستىرىلعان. اتباسار اۋدانىنىڭ اكىمى امانبەك قالجانوۆ جاقىندا ارنايى-تاكتيكالىق وقۋ-جاتتىعۋلاردىڭ ساتىمەن وتكەندىگىمەن دە بولىسە كەتتى. ءسوز رەتى كەلگەندە اتالعان ارنايى-تاكتيكالىق وقۋ-جاتتىعۋعا بارلىعى 99 ادام جانە 18 بىرلىك ءورت, اۆاريالىق-قۇتقارۋ, ينجەنەرلىك تەحنيكا تارتىلسا, توتەنشە جاعداي ورىن الا قالعان كەزدە ساپقا 270 ادام جانە 94 بىرلىك ارنايى تەحنيكا نەمەسە ودان دا كوپ كۇش جۇمىلدىرىلادى دەپ كۇتىلۋدە.
بۇدان باسقا, وتكەن جىلدارداعى كەتكەن كەمشىلىكتەر ەسكەرىلىپ, سۋ تاسقىنىنىڭ الدىن الۋ ماشىقتارى جان-جاقتى ەسكەرىلگەن. سونداي-اق بيىلعى كوكتەمگى سۋ تاسقىنىنىڭ الدىن الۋدا توتەنشە جاعدايلاردى بولدىرماۋ ماقساتىندا ازاماتتىق قورعاۋ قۇرامالارى مەن اپاتتىق-قۇتقارۋ قىزمەتتەرىنىڭ بىرلەسكەن ءىس-قيمىلىن ۇيلەستىرۋ جاعى دا جان-جاقتى پىسىقتالعان. بىراق سوعان قاراماستان, اتباسار اۋدانىنداعى ەلدى مەكەندەردى سۋ باسۋ قاۋپى ءالى دە سەيىلمەۋىنە بايلانىستى نوۆوسەلسكوە, پوكروۆكا, پولتاۆكا سياقتى اۋىلداردا سۋ تاسۋىنىڭ الدىن الۋعا قاتىستى ءتۇرلى شارالار جۇرگىزىلگەن. مۇنىڭ بارلىعى دا اتباسار اۋدانىنداعى ەلدىمەكەندەردى ينجەنەرلىك قورعاۋدىڭ كەستەسىنە سايكەس جۇزەگە اسىرىلۋدا. ال وزگە اۋىلدىق وكرۋگتاردا جۇمىستار اعىمداعى جىلدىڭ 15 ناۋرىزىنا دەيىن اياقتالادى دەپ جوسپارلانعان.
اسقار تۇراپباي ۇلى, «ەگەمەن قازاقستان»
اقمولا وبلىسى