«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ «پرەزيدەنتتىڭ بەس الەۋمەتتىك باستاماسىن» كەڭىنەن ءتۇسىندىرىپ, تالقىلاۋ ماقساتىندا ارنايى ساپارمەن قاراعاندى وبلىسىنا كەلدى.
الدىمەن ماۋلەن اشىمباەۆ وبلىس اكىمى ەرلان قوشانوۆپەن بىرگە اتالعان مەتاللۋرگيا كومبيناتىنا باردى.
«نۇر وتان» پارتياسى توراعاسىنىڭ ءبىرىنشى ورىنباسارى ءوزىنىڭ وسى قىزمەتكە كەلگەلى وبلىستارعا جاساعان ساپارى ءدال قاراعاندىدان باستالعانىنا نازار اۋدارىپ, ونىڭ ءوز ءمانى بار ەكەنىن ايتتى.
– قاراعاندى ەل ەكونوميكاسىندا الار ورنى ەرەكشە ءىرى وندىرىستىك وڭىرلەردىڭ ءبىرى. بۇل جاقتا ەل ەكونوميكاسىنا قوماقتى قارجى قۇيىپ وتىرعان ءىرى ينۆەستورلار جۇمىس ىستەيدى. ال قازاقستان ماگنيتكاسى سانالاتىن تەمىرتاۋدا ەلباسىمىزدىڭ ەڭبەك جولى باستالعانى بارشاعا ءمالىم. سوندىقتان بۇل ساپاردىڭ ماڭىزى جوعارى دەپ ەسەپتەيمىن, – دەدى م.اشىمباەۆ.
سونىمەن قاتار م.اشىمباەۆ وبلىستاعى تاعى ءبىر جەتەكشى ءوندىرىس ورنى«Maker» قاراعاندى قۇيۋ-ماشينا جاساۋ زاۋىتىندا بولدى.
اتالعان كاسىپورىنداردىڭ ەڭبەك ۇجىمدارىمەن كەزدەسكەن «نۇر وتان» پارتياسى توراعاسىنىڭ ءبىرىنشى ورىنباسارى «پرەزيدەنتتىڭ بەس الەۋمەتتىك باستاماسىنىڭ» ماڭىزىنا ەرەكشە توقتالدى.
– بۇل باستامالاردىڭ ماڭىزى حالىق ءۇشىن وتە جوعارى. ونى جۇزەگە اسىرۋعا «نۇر وتان» پارتياسى بەلسەنە قاتىساتىن بولادى. بۇل جۇمىستارعا بارلىق نۇروتاندىقتار جانە وسىنداي ءىرى كاسىپورىندارداعى باستاۋىش پارتيا ۇيىمدارى دا بەلسەندى قاتىسۋى ءتيىس, – دەدى م.اشىمباەۆ.
وڭىردە يندۋستريالىق-ونەركاسىپتىك كەشەندەردى قارقىندى دامىتۋمەن قاتار, ولارعا بىلىكتى مامان دايارلاۋ ىسىنە دە ەرەكشە كوڭىل بولىنۋدە. ەلباسىنىڭ دۋالدى ءبىلىم بەرۋ باستاماسىن جەمىستى جۇزەگە اسىرىپ وتىرعان سونداي وقۋ ورىندارىنىڭ ءبىرى – تەمىرتاۋ جوعارى پوليتەحنيكالىق كوللەدجى.
وقۋ ورنىنا ارنايى كەلگەن م.اشىمباەۆ كوللەدجدىڭ پروفەسسور-وقىتۋشىلار قۇرامىمەن جانە «سەرپىن-2050» باعدارلاماسى بويىنشا ءبىلىم الىپ جاتقان ستۋدەنت جاستارمەن كەزدەستى. بۇگىندە مۇندا اتالعان باعدارلامامەن ەلىمىزدىڭ وڭتۇستىك وڭىرلەرىنەن كەلگەن كوپتەگەن جاس ءبىلىم الۋدا. ولار وقۋ بىتىرگەننەن كەيىن جەرگىلىكتى ونەركاسىپ ورىندارىنا جۇمىسقا تۇرۋدى كوزدەپ وتىر. ال بۇگىندە قاراعاندى وبلىسىندا بىلىكتى ماماندارعا, سونىڭ ىشىندە تەxنيكالىق ماماندىقتارعا دەگەن سۇرانىس ەرەكشە جوعارى. وسى ماسەلەگە نازار اۋدارعان پارتيا توراعاسىنىڭ ءبىرىنشى ورىنباسارى وڭتۇستىكتەن كەلگەن جاستاردىڭ ورتالىق وڭىردە قالۋىنىڭ يگى اسەرى مول ەكەنىن ايتتى.
كوللەدج ستۋدەنتتەرى ەلباسى باستامالارىنىڭ ارقاسىندا كوپتەگەن وزەكتى ماسەلەلەردىڭ شەشىم تاپقانىنا ەرەكشە قۋانىشتارىن ءبىلدىردى. مەملەكەت باسشىسىنىڭ «تسيفرلى قازاقستان» باعدارلاماسى دا ەلىمىزدەگى ەڭ ماڭىزدى باستامالاردىڭ ءبىرى ەكەنى ءسوزسىز. وسى باعىتتا وبلىستا ايتارلىقتاي جۇمىستار اتقارىلۋدا. ءبىر عانا دەنساۋلىق ساقتاۋ ىسىنە اقپاراتتىق تەحنولوگيانى ەنگىزۋ بويىنشا كەشەندى جۇمىستار قولعا الىنعان. مۇنىڭ جارقىن مىسالى رەتىندە قاراعاندى قالالىق №3 ەمحاناداعى يگى ىستەردى ايتۋعا بولادى.
م.اشىمباەۆ ەمحانا ۇجىمىمەن كەزدەسىپ, ەلباسىنىڭ بەس الەۋمەتتىك باستاماسىندا مەديتسينا قىزمەتكەرلەرىنە دە ەرەكشە قولداۋ كورسەتىلگەنىن ايتتى. ياعني باسپانا الۋ ماسەلەسىنىڭ جاڭا مۇمكىندىكتەرى مەن سالىق جۇكتەمەسىنىڭ تومەندەۋى وسىنداي الەۋمەتتىك سالا ماماندارىنا تىكەلەي قاتىستى ەكەنى بەلگىلى.
پرەزيدەنتتىڭ تاعى ءبىر ماڭىزدى باستاماسى – شاعىن نەسيە بەرۋدى كوبەيتۋ. بۇل جاپپاي كاسىپكەرلىكتىڭ دامۋىنا ايتارلىقتاي وڭ اسەرىن تيگىزەتىن يگى باستاما. وسىعان وراي م.اشىمباەۆ قاراعاندى قالاسىنداعى كاسىپكەرلەرگە قىزمەت كورسەتۋ ورتالىعىندا بولىپ, ونىڭ قىزمەتكەرلەرىمەن جانە جەرگىلىكتى كاسىپكەرلەرمەن كەزدەستى. كەزدەسۋ بارىسىندا كاسىپكەرلىكتى دامىتۋدىڭ جاڭا مۇمكىندىكتەرى تۋرالى ءسوز بولدى. م.اشىمباەۆ بيزنەستى قولداۋعا باعىتتالعان پارتيالىق جوبا جايىندا دا ايتىپ ءوتتى.
وبلىسقا ساپارى اياسىندا پارتيا توراعاسىنىڭ ءبىرىنشى ورىنباسارى بىرقاتار قۇرىلىس نىساندارىن دا ارالادى.
سونداي-اق پارتيا توراعاسىنىڭ ءبىرىنشى ورىنباسارى تەمىرتاۋ قالاسىنداعى تۇڭعىش پرەزيدەنتتىڭ تاريحي-مادەني ورتالىعىندا بولىپ, ەلباسىمەن بىرگە جۇمىس ىستەگەن ارىپتەستەرىمەن, قاناتتاس سەرىكتەرىمەن جانە كۋرستاستارىمەن كەزدەستى.
ساپار سوڭىندا م.اشىمباەۆ پارتيانىڭ قاراعاندى وبلىستىق اكتيۆىمەن كەزدەسىپ, «پرەزيدەنتتىڭ بەس الەۋمەتتىك باستاماسىن» حالىققا ءتۇسىندىرۋ جانە ونى جۇزەگە اسىرۋ جونىندە بىرقاتار ناقتى تاپسىرمالار بەردى.
قايرات ءابىلدا, «ەگەمەن قازاقستان»
قاراعاندى وبلىسى