شىعىس قازاقستانداعى تاسقىن قاۋپى بار اۋدانداردىڭ ءبىرى - كوكپەكتى اۋدانى. اۋداندىق ىشكى ساياسات ءبولىمى ماماندارى وڭىردە تاسقىننىڭ الدىن الۋ جۇمىستارى قارقىندى جۇرگىزىلىپ جاتقانىن حابارلادى.
1 ناۋرىزدان باستاپ بارلىق اۋىلدىق وكرۋگتەردە تاۋلىك بويى كەزەكشىلىك ۇيىمداستىرىلسا, سۋ ارنالارىن, كوپىرلەردى تازالاۋ, بوگەتتەردى نىعايتۋ جانە وزەن ارنالارىن تازارتۋ بويىنشا جۇمىستاردى جۇرگىزۋگە قوسىمشا تەحنيكا تارتۋ ءۇشىن اۋىل شارۋاشىلىق قۇرىلىمدارى, كاسىپورىندار جانە ۇيىمدارىمەن 178 كەلىسىمشارت جاسالىپتى. جالپى اۋدان بويىنشا تاسقىن سۋدى بوگەتسىز وتكىزۋ ءۇشىن 26 كوپىر, 518 سۋ وتكىزگىش قۇبىر قار مەن مۇزدان تازارتىلىپ جاتقان كورىنەدى.
«اۋدانعا 10 مىڭ دانا قاپ پەن 10 توننا ديزەل وتىنى ساتىپ الىندى. سامار, كوكپەكتى, ق ۇلىنجون, تاسساي اۋىلدىق وكرۋگتارى اۋماعىندا ينەرتتى ماتەريال الاتىن كارەردىڭ ورىندارى بەلگىلەنگەن. كوكپەكتى اۋىلىندا دەۋ-29 جول ۇيىمىنىڭ اۋماعىندا 600 توننا ينەرتتى ماتەريال, سامار اۋىلىندا دسۋ-14 جول ۇيىمىنىڭ اۋماعىندا 300 توننا ينەرتتى ماتەريال دايىندالدى. «شىعىس قازاقستان وبلىسى اۆياتسيا بولىمشەسى» كوممۋنالدىق مەملەكەتتىك قازىنالىق كاسىپورنىمەن جانە جارۋ جۇمىستارىمەن اينالىساتىن «ۆوستوكۆزرىۆپروم» جشس-مەن, سونىمەن قاتار, اۋدانداعى جول ۇيىمدارىمەن 48 تەحنيكاعا كەلىسىم شارت جاسالىندى. بارلىق سەلولىق وكرۋگتەردە تاۋلىك بويى كەزەكشىلىك ۇيىمداستىرىلىپ, ءتيىستى جۇمىستار جۇرگىزىلۋدە», - دەيدى اۋداندىق ىشكى ساياسات ءبولىمىنىڭ باسشىسى بەك نۇعىباەۆ.
ازامات قاسىم,
«ەگەمەن قازاقستان»
شىعىس قازاقستان وبلىسى,
كوكپەكتى اۋدانى