ورتالىق ازيا ەلدەرى باسشىلارىنىڭ كونسۋلتاتيۆتىك جۇمىس كەزدەسۋى بارىسىندا نۇرسۇلتان نازارباەۆ وزبەكستان رەسپۋبليكاسىنىڭ پرەزيدەنتى شاۆكات ميرزيوەۆپەن كەزدەستى, دەپ حابارلايدى اقوردانىڭ ءباسپاسوز قىزمەتى.
نۇرسۇلتان نازارباەۆ شاۆكات ميرزيوەۆتىڭ ەكىجاقتى قاتىناستاردى دامىتۋ مەن نىعايتۋداعى ءرولىن ەرەكشە اتاپ ءوتتى.
– ءسىز مەملەكەت باسشىسى بولعالى وزىڭىزبەن بىرنەشە رەت جۇزدەستىك, ءوزارا تالقىلاعان ماسەلەلەردىڭ ءبارى جۇزەگە اسىرىلىپ, جۇمىستار اتقارىلىپ جاتىر. بيىل كوپ جۇمىس ىستەدىڭىز, كورشىلەرمەن ءوزارا قارىم-قاتىناستى رەتتەدىڭىز, ونداعان جىلدار بويى شەشىلمەگەن ماسەلەلەردى شەشتىڭىز. وزبەكستاندا اتقارىپ جاتقان وراسان زور جۇمىستارىڭىز ءۇشىن ريزاشىلىعىمدى بىلدىرەمىن جانە بۇل وڭىرىمىزدەگى بارلىق ەلدەرگە اسەر ەتەدى, – دەدى قازاقستان پرەزيدەنتى.
نۇرسۇلتان نازارباەۆ بۇگىنگى كونسۋلتاتيۆتىك جۇمىس كەزدەسۋىنىڭ ماڭىزدى سيپاتىن اتاپ ءوتتى. ونى وتكىزۋ جونىندەگى يدەيانى وزبەكستان پرەزيدەنتى ۇسىنعان بولاتىن.
– ءبىز بۇگىن بارلىق ارىپتەستەرىمىزبەن بىرگە ەكونوميكالىق پروبلەمالار مەن كۇندەلىكتى ماسەلەلەردى تالقىلاپ, شەشۋ ءۇشىن كەزدەسىپ وتىرمىز. بيىل مۇنداي كەزدەسۋلەر كوپ بولماق: ءوزىڭىز باستاماشى بولعان اۋعانستان جونىندەگى كەزدەسۋ, تۇرىكمەن تاراپى ۇسىنعان ارال تەڭىزىنە قاتىستى كەزدەسۋ جانە باسقا دا ءىس-شارالار وتەدى, – دەدى نۇرسۇلتان نازارباەۆ.
وزبەكستان پرەزيدەنتى قازاقستانعا كەلگەنىنە ريزاشىلىق ءبىلدىرىپ, ورتالىق ازيا ەلدەرى باسشىلارىنىڭ كونسۋلتاتيۆتىك جۇمىس كەزدەسۋىنىڭ از ۋاقىت ىشىندە ۇيىمداستىرىلعانى ءۇشىن نۇرسۇلتان نازارباەۆقا العىس ايتتى.
– بۇگىن مەن سىزگە كونسۋلتاتيۆتىك كەزدەسۋ وتكىزۋ جونىندەگى وزبەكستان باستاماسىن قولداعانىڭىز ءۇشىن العىس ايتقىم كەلەدى. نۇرسۇلتان ءابىش ۇلى, ءسىز تاۋەلسىزدىكتىڭ العاشقى كۇندەرىنەن باستاپ ءاردايىم ينتەگراتسيانىڭ جاقتاۋشىسى بولىپ, بارلىق كەزدەسۋلەردە بىرىگۋ, ىنتىماقتاسۋ جانە ارالاسۋ جونىندە ايتتىڭىز, – دەدى وزبەكستان پرەزيدەنتى.
شاۆكات ميرزيوەۆ ەكىجاقتى ىنتىماقتاستىقتىڭ وزەكتى ماسەلەلەرىن شەشۋ ىسىندەگى نۇرسۇلتان نازارباەۆتىڭ ساياسي ەرىك-جىگەرىن اتاپ ءوتتى.
– بۇگىندە تەمىرجول تاسىمالى 44 پايىزعا ارتقانىنا, جالپى ەلدەرىمىز اراسىنداعى تاۋار اينالىمىنىڭ ەكى ميلليارد دوللارعا جەتكەنىنە قۋانىشتىمىن. سىزبەن ءوزارا كەلىسكەنىمىزدەي, بۇل كورسەتكىشتى بەس ميلليارد دوللارعا دەيىن جەتكىزەمىز, – دەدى وزبەكستان پرەزيدەنتى.