ستۋدەنتتەر جاتاقحانالارى ءمجا قاعيداسىمەن سالىناتىن بولادى

سپيكەردىڭ ايتۋىنشا, مينيسترلىك «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحاناداعى جاعدايىن جاقسارتۋ» ءۇشىنشى باستاماسىن ىسكە اسىرۋ بويىنشا جۇمىستاردى باستادى. ماسەلەن, اتالعان مىندەتتى ىسكە اسىرۋ مەحانيزمدەرىن ايقىنداۋ ماقساتىندا ۇلتتىق ەكونوميكا مينيسترلىگى, جوو-لار, ۇلتتىق بانك, ەكىنشى دەڭگەيلى بانكتەر, جەكە قۇرىلىس سالۋشىلار وكىلدەرىمەن كەڭەستەر وتكىزىلدى.

«ستۋدەنت جاستاردىڭ ءومىر ءسۇرۋ جاعدايلارىن جاقسارتۋ ماسەلەسىن جەكەمەنشىك رەسۋرستاردىڭ, ونىڭ ىشىندە جوعارى وقۋ ورىندارىنىڭ, كوللەدجدەردىڭ, ينۆەستورلار مەن باسقا دا سەرىكتەستەردىڭ رەسۋرستارى ەسەبىنەن شەشۋ كوزدەلىپ وتىر», — دەپ ناقتىلادى ۆيتسە-مينيستر.

اتالعان مەحانيزمنىڭ جوعارى وقۋ ورىندارى, كوللەدجدەر مەن ينۆەستورلار ءۇشىن تارتىمدىلىعى جاتاقحانالار سالۋعا باعىتتالعان ينۆەستيتسيالاردىڭ ءبىر بولىگىنىڭ مەملەكەت تاراپىنان بىرتىندەپ قايتارىلۋىمەن كەپىلدەندىرۋ ەسەبىنەن اقتالاتىن بولادى. سونىمەن قاتار, جوعارى وقۋ ورىندارىنىڭ, كوللەدجدەردىڭ نەمەسە جەكە سەرىكتەستىڭ جەر تەلىمى بولماعان جاعدايدا, جەرگىلىكتى اتقارۋشى ورگاندار ينجەنەرلىك-كوممۋنيكاتسيالىق ينفراقۇرىلىمداردى جۇرگىزۋمەن جەر تەلىمىن بولەتىن بولادى.

بيبىگۇل اسانوۆا ايتىپ وتكەندەي, قازىرگى كەزدە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ستۋدەنت جاستاردىڭ ءومىر ءسۇرۋ جاعدايلارىن جاقسارتۋ, سونىمەن قاتار جان باسىنا شاققانداعى نورماتيۆتىك قارجىلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ازىرلەنىپ جاتىر. جاقىندا ول مۇددەلى مەملەكەتتىك ورگاندارمەن كەلىسۋگە جىبەرىلەتىن بولادى.

جوبانى ىسكە اسىرۋدىڭ الدىن-الا سحەماسى كەلەسىدەي:

«بانكتەر, جوو-لار مەن قۇرىلىس سالۋشىلار ۇسىنىلىپ وتىرعان سحەمامەن الدىن-الا كەلىسىپ وتىر. ەكىنشى دەڭگەيلى بانكتەردىڭ مالىمەتتەرى بويىنشا, تەڭگەنىڭ وتەمپازدىعى جەتكىلىكتى. سونىمەن قاتار كاسىپكەرلەردىڭ ارزان زاەمدىق رەسۋرستارعا, ونىڭ ىشىندە شەتەلدىك قارجى ينستيتۋتتارىنىڭ رەسۋرستارىنا قولجەتىمدىلىگى ماسەلەسى قاراستىرىلىپ جاتىر», — دەپ تۇيىندەدى ب. اسىلوۆا.

جۋرناليستەردىڭ جاڭا جاتاقحانالاردىڭ سالىنۋى وقۋ اقىسىنىڭ كوتەرىلۋىنە ىقپال ەتپەي مە دەگەن ساۋالدارىنا جاۋاپ بەرە وتىرىپ, ب. اسىلوۆا ستۋدەنتتەردى جاتاقحانالارمەن قامتاماسىز ەتۋ وقۋ اقىسىنا ەش اسەرىن تيگىزبەيتىنىن ايتتى. بۇدان وزگە, قر بعم جاتاقحانالار قۇرىلىسى جوبالارىن ارزانداتۋ باعىتىن ۇستانۋدى كوزدەپ وتىر, سەبەبى بۇگىنگى تاڭدا ۇسىنىلعان جوبالاردىڭ باعاسى ءبىرشاما كوتەرىڭكى.

قازىرگى تاڭدا ەلىمىزدەگى جوو-لاردا 530 مىڭ ستۋدەنت ءبىلىم الادى, ونىڭ ىشىندە 204 مىڭى (38%) — باسقا قالالاردان كەلگەن, جاتاقحانالارعا مۇقتاج ستۋدەنتتەر. پرەزيدەنتتىڭ بەس الەۋمەتتىك باستاماسىنا سايكەس 2022 جىلعا قاراي ستۋدەنتتەر جاتاقحانالارىندا جاڭا 75 مىڭ ورىن ەنگىزۋ قامتاماسىز ەتىلۋى ءتيىس.