بۇگىن ءمجا قاعيدالارىنا نەگىزدەلگەن, جوو-لار مەن كوللەدج ستۋدەنتتەرىنە ارنالعان جاتاقحانالار قۇرىلىسى ماسەلەسىنە ارنالعان قر ۇكىمەتىندەگى ءباسپاسوز كونفەرەنتسياسىندا «قارجى ورتالىعى» اق پرەزيدەنتى اسقار يبرايموۆ ەل ستۋدەنتتەرىنە جاڭا جاتاقحانالار سالۋدان وزگە, قازىرگى پايدالانىلىپ جاتقان جاتاقحانالاردا جوندەۋ جۇمىستارى جۇرگىزىلەتىنىن اتاپ ءوتتى, دەپ حابارلايدى primeminister.kz.
ا. يبرايموۆتىڭ ايتۋىنشا, ستۋدەنتتەردىڭ جاتاقحانالارىن جاقسارتۋ اياسىندا «قارجى ورتالىعى» اق فۋنكتسيونالى بۇگىنگى تاڭدا ءبىرىنشى كەزەكتە اتالعان تەتىكتىڭ ناقتىلانۋىنا نەگىزدەلەدى: نورماتيۆتەر, ەسەپتەۋلەر, تولەمدەر جاساۋ, ازىرلەۋ, تيپتىك كەلىسىمشارت جاساسۋ.
«بۇكىل تەتىك بىرىزدىلىك, باسەكەگە قابىلەتتىلىك, تەڭگەرىمدىك جانە تيىسىنشە ناتيجەلىلىك قاعيدالارىن ساقتاي وتىرىپ جۇرگىزىلەدى», — دەدى قارجى ورتالىعىنىڭ باسشىسى.ول سونداي-اق, جاڭا جاتاقحانالار سالۋدان باسقا, قولدانىستاعى تۇرعىن نىساندارىندا جوسپارلى جوندەۋ جۇمىستارى جۇرگىزىلەتىنىن ايتتى.
«بىزدەگى قازىرگى پايدالانىلىپ جاتقان جاتاقحانالاردىڭ نەلىكتەن وسىنداي جوعارى-امورتيزاتسيالىق جاعدايدا ەكەنىن ايتار بولساق, بىزدە توسەك-ورىندارىنىڭ تاپشىلىعى بار, امورتيزاتسيا ءجۇرىپ جاتىر. ورىن تاپشىلىعى ماسەلەسىن شەشكەن كەزدە, كۇشەيىپ كەتكەن امورتيزاتسيا ماسەلەسى وزدىگىنەن جويىلادى. جوسپارلى جوندەۋ جۇمىستارى تالاپتار مەن ستاندارتتارعا سايكەس جۇرگىزىلەتىن بولادى», — دەپ قورىتىندىلادى سپيكەر.