بقو قازاقستان حالقى اسسامبلەياسى پرەزيدەنتتىڭ ۇندەۋىن تالقىلادى

- ەلباسىنىڭ بەس الەۋمەتتىك باستاما تۋرالى ۇندەۋىن تالقىلاۋ باتىس قازاقستان وڭىرىندە دە قىزۋ ءجۇرىپ جاتىر. جۇرتشىلىق بۇل پىكىرتالاستارعا بەلسەنە قاتىسۋدا. ويتكەنى بۇل بەس باعىتتىڭ حالىققا بەرەرى كوپ. باتىسقازاقستاندىقتار ەلباسى ۇسىنعان باستامانى تولىعىمەن قولدايدى, - دەيدى باتىس قازاقستان وبلىسى قازاقستان حالقى اسسامبلەياسى قوعامدىق كەلىسىم كەڭەسىنىڭ باسشىسى مەدعات حامبەتوۆ.

باتىس قازاقستان وبلىسىنىڭ قازاقستان حالقى اسسامبلەياسى توراعاسىنىڭ ورىنباسارى, حاتشىلىق مەڭگەرۋشىسى عايسا قاپاقوۆتىڭ جەتەكشىلىگىمەن وتكەن كەڭەيتىلگەن وتىرىسقا قاتىسۋشىلار دا ءبىراۋىزدان بۇل باستامالاردىڭ ماڭىزى زور ەكەنىن ايتتى.

- بۇل بەس باعىتتىڭ ءاربىر قازاقستاندىققا قاتىسى بار. مىسالى, ستۋدەنتتى جاتاقحانامەن قامتۋدىڭ ءوزى – وقيمىن دەگەن جاسقا قولداۋ عانا ەمەس, ونىڭ اۋىلداعى اتا-اناسىنا دا كومەك. مىسالى, بالاسىن اقىلى وقىتىپ, جىلىنا ءبىراز قارجى جۇمساپ وتىرعان ادام ءارى پاتەر جالداپ شىعىنداناتىن. ەلباسى تاپسىرماسىنا سايكەس قازاقستاندا ستۋدەنتتىك جاتاقحانا ماسەلەسى 2020 جىلعا دەيىن شەشىلۋى كەرەك, - دەدى ءوز سوزىندە عايسا قاپاقوۆ.

كەڭەيتىلگەن وتىرىستا ءسوز العان شەشەن-ينگۋش ەتنومادەني بىرلەستىگىنىڭ توراعاسى دانيلبەك ساراتوۆ, ورال قالاسى شاعىن اۋداندارى قوعامدىق كەلىسىم كەڭەستەرىنىڭ مۇشەسى ساميعوللا اديەۆ ءوز ويىن ورتاعا سالدى. ەدىل-جايىق قازاق قاۋىمداستىعىنىڭ توراعاسى امانجول زەينۋللين اسىرەسە شاعىن كاسىپكەرلىكتى دامىتۋ ماسەلەسىنە اعا بۋىن, ۇلتتىق بىرلەستىكتەر وكىلدەرى دە اتسالىسۋ قاجەتتىگىنە توقتالدى.

- پرەزيدەنت ۇندەۋىندە جالاقىسى تومەن ازاماتتاردىڭ سالىعىن ازايتۋ, شاعىن كاسىپكەرلىكتى دامىتۋعا مەملەكەتتىك قولداۋدى ارتىرۋ تۋرالى ايتىلعان. بۇلار – بىرىمەن ءبىرى بايلانىستى, وتە وزەكتى ماسەلەلەر. بۇل باستامالاردى مەملەكەت تاراپىنان قارجىلاي قامتۋ دا ناقتى كورسەتىلگەن, ەندى قوعامنىڭ ءوزى قوزعالۋى كەرەك. جاسىراتىنى جوق, ءبىدىڭ حالىقتا جالقاۋلىق, مارعاۋلىق بار. جاس بۋىننىڭ بولاشاعى ءۇشىن كاسىپكەرلىك داعدىنى دامىتۋ, باسەكەلەستىككە ۇمتىلۋ تۋرالى جاتپاي-تۇرماي ايتۋىمىز كەرەك. ويلاپ قاراڭىزشى, بۇگىندە قازاقستاندا 1 بولمەلى پاتەردىڭ باعاسى 7 ملن تەڭگەدەي بولادى ەكەن. ونى «7-20-25» باعدارلاماسىنا سايكەس 25 جىلعا بولگەننىڭ وزىندە ايىنا 50 مىڭ تەڭگە تولەۋى ءتيىس. از جالاقىلى, 60 مىڭ تەڭگە جالاقى الاتىن ادامنىڭ پاتەر الۋ مۇمكىندىگى ءبارىبىر شەكتەۋلى. ءوز ويىمشا, حالىق شاعىن كاسىپكەرلىككە بەرىلىپ جاتقان نەسيەنى پايدالانۋى كەرەك. ەلىمىزدە قۇرىلىس قارقىندى, بىراق بۇراندا, شەگە شىعاراتىن تسەح جوق. ال ونى بولمەنىڭ ءبىر بۇرىشىندا تۇراتىن شاعىن ستانوكپەن دە جاساۋعا بولادى. مىنە, وسىنداي ىستەردى نەگە كوبىرەك قولعا الماسقا, – دەيدى امانجول زەينوللا ۇلى.

قازبەك قۇتتىمۇرات ۇلى

«ەگەمەن قازاقستان»

ورال