ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا اتىراۋ وبلىسىندا قولعا الىنعان جۇمىستار جايلى جارىسا جازعانبىز. ولاردىڭ اراسىندا قازاقستاندا عانا ەمەس, تمد-دا تەڭدەسى جوق عاجاپ جوبالار بولدى.
الايدا ۋاقىت سىنىنان ءوتۋ بارىنە بىردەي وڭايعا تۇسپەي تۇر. مىسالى, ەلۋدەن استام ءدارى-دارمەك ءتۇرى شىعارىلادى دەگەن فارماتسەۆتيكالىق زاۋىتتى الايىق. مۇنداي ۇلكەن كاسىپورىن پوستكەڭەستىك ەلدەردە بۇرىن-سوڭدى بولماعان دەپ, جوباعا سەنىم ارتقان ەدىك. امال نە, ورتا جولعا كەلگەندە زاۋىت قۇرىلىسى توقتاپ قالدى. جارعىلىق كاپيتالدىڭ 3 پايىزى «اتىراۋ» الەۋمەتتىك-كاسىپكەرلىك كورپوراتسياسىنا, 97 پايىزى زاۋىت يەلەرىنە تيەسىلى بولاتىن. «اتىراۋ» اكك ءوز كەزەگىندە 800 ملن تەڭگە قارىز بەردى. باستاپقىدا جوبالاۋعا بايلانىستى پروبلەمالار بولىپتى, كەيىن زاۋىتتىڭ باسقارۋشى كومپانياسى قارجىنى ماقساتسىز جۇمساعانى انىقتالعان. زاۋىت شىعىننىڭ ورنىن تولتىردى دەگەنمەن, جۇمىستىڭ الداعى باعىتى ءدۇدامال كۇيدە. وڭىرلىك كوممۋنيكاتسيالار قىزمەتىندە وتكەن بريفينگتە وبلىس اكىمىنىڭ ءبىرىنشى ورىنباسارى ساعىندىق لۇقپانوۆ وسى تەكتەس جايتتاردى اشىپ ايتتى. – جوبا باستاماشىلارى بارلىق مۇمكىندىكتى قاراستىرامىز دەگەنمەن, قازىر زاۋىتتىڭ قارجىلىق احۋالى قيىن, – دەدى ول.
«پكف كونتينەنت كو لتد» جشس «بيزنەستىڭ جول كارتاسى-2020» مەملەكەتتىك باعدارلاماسى اياسىندا وپتيكالىق-تالشىقتى كابەل زاۋىتى جوباسىن قولعا العان ەدى. مۇنداي ءوندىرىس ورنى ءبىزدىڭ ەلدە ەكەۋ عانا, ءبىرى – قوستانايدا, ەكىنشىسى – اتىراۋدا. زاۋىت جۇمىس ىستەپ تۇر, بىراق ءونىمدى «قازاقتەلەكوم» اق قانا الادى. باسقا اسا قاجەتتىلىك جوق. وسىنى ەسكەرگەن جەرگىلىكتى اتقارۋشى بيلىك مىس كابەل شىعارۋدى ۇسىندى. بۇل جەردە ءبىر اتاپ وتەرلىك جايت, كوپتەگەن كومپانيا مەنەدجمەنت قاعيدالارىن قاپەرگە الا بەرمەيدى. جاپ-جاقسى جوبالاردىڭ ورتا جولدا تۇرالاپ قالۋىنا و باستا ءونىمدى وتكىزۋ, شيكىزاتپەن قامتۋ, باعا ساياساتى سەكىلدى ماڭىزدى ماسەلەلەردى ەسكەرمەۋ سەبەپ بولىپ وتىر. مۇنى وبلىس اكىمىنىڭ ءبىرىنشى ورىنباسارى دا جوققا شىعارمادى.
باسەكەلەستەردىڭ مۇمكىندىكتەرىن ەسكەرمەۋدىڭ اقىرى جاقسىلىققا اكەلمەيدى. مىسالى, «شەۆرون» كومپانياسىنىڭ ىلمەكتى ارماتۋرا زاۋىتى شىعاراتىن ونىمدەردىڭ نارىقتاعى قۇنى جوعارى. باسقا وندىرۋشىلەر بۇدان الدەقايدا ارزانعا ۇسىنعاسىن, سۇرانىس تا از.
– ءبىز زاۋىت باسشىلىعىمەن بىرنەشە رەت كەزدەسىپ, بۇل جاعدايدان شىعۋدىڭ جولدارىن قاراستىردىق. بىراق مەملەكەتتىك تاپسىرىس اياسىندا دا زاڭنان اتتاپ كەتە المايمىز, – دەيدى س.لۇقپانوۆ.
مەملەكەتتىڭ قىرۋار قارجىسىن شىعىنداپ قولعا الىنعان جۇمىستاردىڭ جارتى جولدا جۇزەگە اسپاي قالۋى, ارينە وكىنىشتى. ەل سەنىم ارتقان يننوۆاتسيالىق جوبالار ءالى دە بولسا وڭالىپ كەتەر دەگەن ءۇمىت باسىم.
باقىتگۇل باباش,
«ەگەمەن قازاقستان»
اتىراۋ