ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆانىڭ باسشىلىعىمەن قازاقستاننىڭ دەلەگاتسياسى جەنەۆادا بۇۇ ادام قۇقىقتارى جونىندەگى كەڭەسىنىڭ (بۇۇ اقجك) 37-سەسسياسىنا قاتىستى.
س.جاقىپوۆا مۇگەدەكتەر قۇقىقتارى ماسەلەسى بويىنشا بۇۇ ارنايى بايانداماشىسى كاتالينا دەۆانداس-اگيلياردىڭ ينتەراكتيۆتى ديالوگى شەڭبەرىندە ءسوز سويلەدى. ديالوگ بارىسىندا ساراپشىنىڭ 2017 جىلعى قىركۇيەكتەگى قازاقستانعا ساپارى ناتيجەسى بويىنشا دايىنداعان بايانداماسى ۇسىنىلدى. بۇل قۇجات ەڭبەك جانە الەۋمەتتىك قامتۋ, ينكليۋزيۆتى ءبىلىمدى ەنگىزۋ, سايلاۋ قۇقىقتارىن جۇزەگە اسىرۋ, قۇقىقتىق كومەكتىڭ قولجەتىمدىلىگى, سونىمەن قاتار ەلىمىزدەگى مۇمكىندىگى شەكتەۋلى ادامداردىڭ مۇمكىندىكتەرى مەن قۇقىقتارىن ءارى قاراي ۇلعايتۋ بويىنشا ساراپشى ۇسىنىستارىن جانە قازاقستانداعى باستى الەۋمەتتىك سالالارداعى مۇگەدەك تۇلعالاردىڭ جاعدايىن كەشەندى جانە جان-جاقتى تالداۋدى قامتيدى.
ارنايى بايانداماشى قازاقستان ۇكىمەتىنە شاقىرعانى جانە ءوزىنىڭ مانداتىمەن تىعىز ىنتىماقتاستىق ورناتقانى ءۇشىن العىس ءبىلدىردى. 2015 جىلى راتيفيكاتسيالانعان مۇگەدەكتەر قۇقىقتارى جونىندەگى بۇۇ كونۆەنتسياسى شەڭبەرگىندەگى مىندەتتەردى ورىنداۋداعى مەملەكەتتىڭ ناتيجەلى جۇمىسى ەسكەرىلدى. ءوز كەزەگىندە, ءمينيستردىڭ ورىنباسارى ساراپشى بايانداماسىنا وراي جاسالعان قازاقستان ۇكىمەتىنىڭ تۇسىنىكتەمەلەرىن ۇسىنىپ, مۇگەدەك ادامداردىڭ قۇقىقتارىن قامتاماسىز ەتۋ سالاسىنداعى مەملەكەتتىڭ ءارى قارايعى قادامدارى تۋرالى جەتكىزدى.
سول كۇنى جەنەۆاداعى قازاقستاننىڭ تۇراقتى وكىلدىگى كاتالينا دەۆانداس-اگيليارمەن بىرلەسىپ, ادام قۇقىقتارى جونىندەگى كەڭەسكە مۇشە مەملەكەتتەر مەن بايقاۋشى دەلەگاتسيالار, سونىمەن قاتار حالىقارالىق ۇكىمەتارالىق جانە ۇكىمەتتىك ەمەس ۇيىمدار ءۇشىن كونۆەنتسيانى يمپلەمەنتاتسيالاۋ بويىنشا قازاقستاننىڭ تاجىريبەسىنە ارنالعان ءىس-شارا وتكىزدى.
ءىس-شارانىڭ سپيكەرلەرى رەتىندە مۇگەدەكتەر قۇقىقتارى جونىندەگى بۇۇ كوميتەتىنىڭ توراعاسى تەرەزيا دەگەنەر, حالىقارالىق مۇگەدەكتەر اليانسىنىڭ ادام قۇقىقتارى بويىنشا اعا كەڭەسشىسى سيلۆيا كۆان جانە «شىراق» مۇگەدەك ايەلدەر اسسوتسياتسياسى» قوعامدىق بىرلەستىك باسشىسى, قازاقستان ۇكىمەتى جانىنداعى مۇگەدەكتىك ىستەرى بويىنشا ۇيلەستىرۋ كەڭەسىنىڭ مۇشەسى ءلاززات قالتاەۆا ءسوز سويلەدى.
ءىس-شارانىڭ باستى ماقساتى قازاقستان ۇكىمەتى جانىنداعى مۇگەدەكتەر ىستەرى بويىنشا ءساتتى جۇمىس ىستەپ جاتقان ۇيلەستىرۋ كەڭەسىنىڭ تاجىريبەسى نەگىزىندە بۇۇ كونۆەنتسياسىنىڭ شەڭبەرىندە مىندەتتەردى ورىنداۋ بويىنشا قازاقستاننىڭ ءساتتى تاجىريبەسى مەن كونۆەنتسيانىڭ 33-1-بابىندا قاراستىرىلعان ۇيلەستىرۋ مەحانيزمىن قۇرۋ مەن ونىڭ قىزمەتىنە قاتىستى پراكتيكالىق نۇسقاما جونىندە حابارلاۋ بولدى.
ءوز كەزەگىندە, جەنەۆا قالاسىنداعى بۇۇ جانە باسقا حالىقارالىق ۇيىمدار جانىنداعى قازاقستاننىڭ تۇراقتى وكىلى, ەلشى جانار ايتجانوۆا قاتىسۋشىلارعا پرەزيدەنت نۇرسۇلتان نازارباەۆتىڭ جاڭا بەس الەۋمەتتىك باستامالارى تۋرالى حابارلاپ, ولاردى جۇزەگە اسىرۋ بارىسىندا مۇمكىندىگى شەكتەۋلى ادامداردىڭ قۇقىقتارىنا ەرەكشە نازار اۋدارىلاتىندىعى جونىندە اتاپ ءوتتى.
«ەگەمەن-اقپارات»