ەلباسىمىزدىڭ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىن تىكەلەي ەفيردەن تىڭدادىم. كەيىن قاعازعا شىعارىپ الىپ وقىدىم. العان اسەرىم, اۋزىما العاش كەلگەن ءسوز – «جاستار بولاشاققا سەنىممەن قارايتىن بولدى عوي» ەدى.
پارلامەنت پالاتالارىنىڭ بىرلەسكەن وتىرىسىندا جاريالاعان ۇندەۋىندە ەلباسى نۇرسۇلتان نازارباەۆ تۇتاس ەلىمىزدىڭ الەۋمەتتىك جاعدايىن جاقسارتاتىن ەڭ ماڭىزدى جايتتارعا توقتالدى. سونىڭ ىشىندە باسىم باعىت, نەگىزگى قولداۋ – ەل ەرتەڭى سانالاتىن جاستارعا باعىتتالدى.
ءوزىڭىز ويلاپ قاراڭىز, تۇرعىن ءۇي نەسيەسىن بۇرىنعىدان دا قولجەتىمدى ەتۋ – ەڭ الدىمەن, جاس ۇرپاقتىڭ قامى. مەكتەپ ءبىتىرىپ, ماماندىق الىپ, ۇلكەن ومىرگە ارالاسقان جاستاردىڭ الدىنان شىعاتىن ەڭ ۇلكەن اسقار – وسى باسپانا جايى ەمەس پە؟ قازاقتىڭ قانشاما تالانتتى اقىنى وسى باسپانا جىرىن جىرلاپ ءوتتى. قۇدايعا شۇكىر, سوڭعى جىلدارى ەلىمىزدە قۇرىلىس سالاسى وركەندەپ, تالاي ادام ءۇيلى بولىپ جاتىر. ال ەلباسىنىڭ جاڭا تاپسىرماسى بۇل ءۇردىستى – جاستاردى تۇرعىن ۇيمەن قامتۋ ءىسىن بۇرىنعىدان دا جىلدامداتا تۇسەتىنى انىق. مەن وسىعان قۋاندىم.
ەلباسى كوتەرگەن وزگە باستامالار دا جاستارعا تىكەلەي قاتىستى. مىسالى جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنتتەردىڭ جاتاقحانا جاعدايىن جاقسارتۋ دەگەن كەرەمەت ەمەس پە؟ جاس كەزىنەن كىسى ەسىگىن جاعالاماي, زاماناۋي جاتاقحانادا الاڭسىز ءبىلىم العان ستۋدەنتتىڭ جان-جاقتى مامان بولۋىنا جول اشىلادى. جاڭادان قوسىلاتىن 20 مىڭ مەملەكەتتىك گرانت تا بىلىمگە قول سوزعان تالاپشىل جاستىڭ قولتىعىنان دەمەۋ بولاتىن ۇلكەن ءىس. كاسىپپەن اينالىسامىن دەگەن جاندارعا دا مەملەكەت تاراپىنان بەرىلەتىن شاعىن نەسيەنىڭ مولشەرى ولشەۋسىز كوبەيگەلى تۇر. وسى يگىلىكتىڭ ءبارى قازاقستان جاستارىنىڭ الدىندا جاڭا ءبىر اسۋ, سەنىمدى سەرپىن تۇرعانىن كورسەتكەندەي.
اقۇشتاپ باقتىگەرەەۆا,
اقىن, «قۇرمەت» وردەنىنىڭ يەگەرى
ورال