باتىس قازاقستان وبلىسىنىڭ جىمپيتى اۋىلىندا ورنالاسقان الاش مۇراجايى بۇگىندە «الاش ارىستارىنىڭ ءۇيى» دەگەن اتاۋمەن قازاقستاننىڭ جالپىۇلتتىق قاسيەتتى نىساندارىنىڭ تىزىمىنە ەنگىزىلگەن. 1917-1918 جىلدارى كۇنباتىس الاشوردا ۇكىمەتى ورنالاسقان ەكى قاباتتى تاريحي عيماراتتىڭ ەڭ قۇندى جادىگەرلەرىنىڭ ءبىرى – جاھانشا دوسمۇحامەد ۇلىنىڭ ماسكەۋدەگى ۇيىنەن اكەلىنگەن قالى كىلەم.
جاھانشا دوسمۇحامەد ۇلى ءومىرىنىڭ سوڭعى جىلدارى ماسكەۋدە وتكەنى ءمالىم. 1938 جىلى 1 ماۋسىمدا سوڭعى رەت تۇتقىندالعان كەزدە جاھانشانىڭ وتباسى قۇرامىندا ايەلى ولگا كونستانتينوۆنا دوسمۇحامەدوۆا, ەنەسى ولگا فەدوروۆنا پۋشكارەۆا, نەمەرە ءىنىسى قادەس دوسمۇحامەدوۆ بولعان ەكەن. قادەس – جاھانشانىڭ نەمەرە تۋىسى ءولداننىڭ بالاسى, ءوز بالاسى بولماعان سوڭ ولگا مەن جاھانشا قادەستى باۋىرىنا باسقان.
– كىلەمنىڭ تاريحىنا كەلەتىن بولساق, ونى ولگا كونستانتينوۆنا 1964 جىلى قانيپا شارىپقىزىنا ءوز قولىمەن سىيلاپتى. شەجىرەگە كوز سالساق, سۇلتان اتامىزدان ەكى ۇل – دوسمۇحامەد پەن ىزمۇحامبەت تاراعان. دوسمۇحامەدتەن قاباس پەن جاھانشا تۋسا, ىزمۇحامبەتتەن ءولدان مەن ءشارىپ تاراعان. شارىپتەن تۋعان قانيپا اپامىز دا جاھانشانىڭ تاربيەسىندە بولىپ, قارىنداسى سانالىپ كەتكەن, – دەيدى جىمپيتىداعى سىرىم دات ۇلى اتىنداعى مۋزەي مەڭگەرۋشىسى ايناگۇل ويشىباەۆا.
جاھانشا دوسمۇحامەد ۇلى تاعى ءبىر قازاقتىڭ مارعاسقا تۇلعاسى تۇرار رىسقۇلوۆپەن تۋعان باجا بولعان. جاھانشانىڭ ماسكەۋدە پاتەرلى بولۋىنا دا وسى تۇراردىڭ ىقپالى بولسا كەرەك. ايناگۇل ويشىباەۆانىڭ ايتۋىنا قاراعاندا, جاھانشانىڭ ماسكەۋدەگى پاتەرىندە قازاقتىڭ تالاي-تالاي ايتۋلى تۇلعالارى ءجيى باس قوسىپ وتىرعان ەكەن. ەندەشە بۇل كىلەمدە تالاي تۇلعانىڭ تابانىنىڭ تابى قالعان دەسەك قاتە بولماس.
ايتا كەتەيىك, ولگا كونستانتينوۆنا ۇزاق ءومىر ءسۇرىپ, 1986 جىلى جەلتوقساندا قايتىس بولعان. ولە-ولگەنشە جىمپيتىمەن قاتىناسى ۇزىلمەگەن, ەرىنىڭ تۋىستارىمەن ارالاسىپ تۇرعان. جاھانشانىڭ كوپتەگەن وتباسىلىق سۋرەتتەرى ءدال وسى ولگا انامىزدىڭ ساقتاۋىمەن بۇگىنگە جەتتى.
قازبەك قۇتتىمۇرات ۇلى, «ەگەمەن قازاقستان»
باتىس قازاقستان وبلىسى