نۇرسۇلتان نازارباەۆتىڭ توراعالىمەن ۇكىمەتتىڭ كەڭەيتىلگەن وتىرىسى باستالدى.
وتىرىس بارىسىندا ەلىمىزدىڭ 2017 جىلعى الەۋمەتتىك-ەكونوميكالىق دامۋ قورىتىندىلارى شىعارىلىپ, الداعى ۋاقىتتا ەكونوميكالىق ءوسىمدى قامتاماسىز ەتۋ جونىندەگى شارالار ايقىندالادى دەپ كۇتىلۋدە.
«جىلدىڭ باسىندا الدىمىزدا تۇرعان ماقساتتاردى انىقتاپ, ءتيىستى سۇراقتاردى ءبىر-بىرىمىزگە قويىپ, جۇمىس ىستەۋدى باستاۋ ءۇشىن بۇگىنگى ۇكىمەتتىڭ كەڭەيتىلگەن ءماجىلىسىن وتكىزگەلى وتىرمىز. وبلىستاردىڭ اكىمدەرى قاتىسۋدا. وزدەرىڭىز بىلەسىزدەر, قاڭتاردا وتكىزگەن ۇكىمەتتىڭ جينالىسىندا بىلتىرعى جىلدىڭ قورىتىندىسى جاريالاندى, ايتىلدى. شىنىن ايتۋ كەرەك, وتكەن جىل وڭاي بولعان جوق. دۇنيەجۇزىنىڭ ەكونوميكاسى دا اۋمالى-توكپەلى بولدى. ءبىزدىڭ دە جاعداي ءارتۇرلى بولدى. دەگەنمەن, ۇكىمەت پەن اكىمشىلىكتەردىڭ بىرلەسىپ ىستەگەن جۇمىستارىنىڭ ارقاسىندا مەنىڭ باعالاۋىم بويىنشا دۇرىس ناتيجەگە جەتتىك», - دەدى نۇرسۇلتان نازارباەۆ.
وسى رەتتە مەملەكەت باسشىسى قازاقستاننىڭ ەكونوميكالىق ءوسىمى وتكەن جىلدىڭ قورىتىندىسىندا 4 پروتسەنتتى قۇراپ, ينفلياتسيا 7 پروتسەنت توڭىرەگىندە بولعانىن ەسكە سالدى.
«بۇل ءبىز ءۇشىن الىنعان جاڭا بەلەس بولىپ سانالادى. سوندىقتان بۇل جاعىنان مەن ۇكىمەتتىڭ جالپى جۇمىسىنا, ءاربىر ۇكىمەت مۇشەلەرىنە وڭ باعامدى بەرگەنىم دۇرىس دەپ سانايمىن. حالىق تا سولاي دەپ ويلايتىن شىعار. دەگەنمەن, ءار ۋاقىتتا جەتىستىكتەرىمىزگە توقمەيىلسىپ وتىرا بەرمەيمىز. الدىمىزدا ماقساتتار كوپ, باعدارلامالاردىڭ ورىندالۋىنىڭ ىشىندە كەمشىلىكتەر بار. ونى ارينە ايتاتىن بولامىز», - دەدى قازاقستان پرەزيدەنتى. سوندىقتان ەلباسى بۇگىنگى ماجىلىستە وتكەن جىلدىڭ قورىتىندىسى حالىققا تاعى ءبىر رەت جاريا ەتىلىپ, ۇكىمەت الدىندا تۇرعان مىندەتتەر ايقىندالاتىندىعىن باسا ايتتى. «بيىل ۇكىمەتتىڭ الدىنا قويىپ وتىرعان 4 پايىز از بولادى. ودان تومەن ءتۇسىپ كەتۋىمىز دە مۇمكىن. سوندىقتان ءوزىمىز الدىمىزعا ودان جوعارى مىندەتتەر قويۋىمىز كەرەك. ونىڭ ىشىندە باعدارلامالاردىڭ ورىندالۋ ماسەلەلەرى بار, ولاردىڭ اراسىندا كەمشىلىكتەر دە جوق ەمەس. سوندىقتان وسى ماسەلەلەر توڭىرەگىندە جۇمىس ىستەيتىن بولامىز», - دەدى نۇرسۇلتان نازارباەۆ.
ايتا كەتەرلىگى, ەلدىڭ جالپى ەكونوميكالىق كورسەتكىشتەرى جونىندە ۇكىمەت باسشىسى باقىتجان ساعىنتاەۆ بايانداما جاساۋدا. ودان كەيىن قارجى ءمينيسترى, ۇلتتىق بانك باسشىسى ءسوز سويلەيدى.
ەسترەىڭىزگە سالا كەتسەك, 2017 جىلى ىشكى جالپى ءونىم ءوسىمى 4 پايىزدى قۇرادى. نەگىزگى كاپيتالعا سالىنعان ينۆەستيتسيا كولەمى 5,5 پايىزعا ارتىپ, ونەركاسىپ ءوندىرىسىنىڭ كولەمى 7,1 پايىزعا ۇلعايدى. 2017 جىلدىڭ 9 ايىندا شەتەل ينۆەستيتسياسىنىڭ تازا ءتۇسىمى 3 034,8 ملن دوللاردى قۇرادى. وتكەن جىلدىڭ قاڭتار-قاراشا ايلارىنىڭ ارالىعىندا قازاقستاننىڭ سىرتقى ساۋدا اينالىمى 69,5 ملرد دوللارعا جەتىپ, 2016 جىلدىڭ سايكەس كەزەڭىمەن سالىستىرعاندا 25,1 پايىزعا ارتتى. ونىڭ ىشىندە ەكسپورت كولەمى 43,1 ملرد دوللارعا جەتىپ وتىر. ۇلتتىق بانكتىڭ التىن-ۆاليۋتا اكتيۆى 31,1 ملرد دوللار بولدى.