يران استاناسى تەگەران قالاسىندا ءوتىپ جاتقان VIII جابىق كەشەندەگى ازيا چەمپيوناتىنىڭ العاشقى جارىس كۇنىندە قازاقتان جەڭىل اتلەتتەرى 2 التىن جانە 1 قولا مەدال جەڭىپ الدى.
1 اقپان كۇنى تاڭەرتەڭگى باعدارلامادا تەك قىزدار ونەر كورسەتتى. 3000 مەترگە جۇگىرۋدەن قوستانايلىق تاتيانا نەروزناك قارسىلاستارىنان وق بويى وزىپ شىقتى. ول 3 شاقىرىمدى 9 مينۋت 33.65 سەكۋندتا جۇگىرىپ ءوتتى. ءسويتىپ, ەكىنشى ورىنداعى قىرعىز سپورتشىسى گۇلشانا ساتاروۆادان 14 سەكۋندقا وزىپ كەتتى. قولا جۇلدە ۆەتنامنان كەلگەن تحي وان نگۋەنگە بۇيىردى.
– بۇعان دەيىن ەكى مارتە جابىق كەشەندەگى ازيا چەمپيوناتىندا 800 مەترگە جۇگىرىپ, قولا جۇلدە ەنشىلەگەنمىن. وسى جولى چەمپيون بولۋ باقىتى بۇيىردى. ارينە, التىننىڭ اسەرى باسقا, قۋانىشتىمىن. وسى جولى دايىندىعىم وتە جاقسى بولدى. ەندى 1500 مەتردە دە جەڭىسكە جەتۋدى كوزدەيمىن. سوسىن تامىز ايىندا وتەتىن جازعى ازيا ويىندارىنا دايىندالامىن», – دەيدى تاتيانا نەروزناك.
قازاقستان قۇراماسىنىڭ قورجىنىنا ەكىنشى التىندى ءۇش قارعىپ سەكىرۋدەن يرينا ەكتوۆا سالدى. سولتۇستىك قازاقستان وبلىسىنىڭ تۋماسىنىڭ تەگەرانداعى ەڭ ۇزدىك كورسەتكىشى – 13.79 مەتر. ەكتوۆا 2018 جىلدى جوعارعى قارقىنمەن باستادى. ول بۇعان دەيىن قاڭتار ايىندا وسكەمەندە وتكەن ءۇش جارىستا توپ جارعان بولاتىن. ەكىنشى ورىنعا – 2017 جىلعى ازيا چەمپيوناتىنىڭ قولا جۇلدەگەرى ۇندىستاندىق شينا نەلليكال تۇراقتادى (13.37 م). ۇزدىك ۇشتىكتى 13.22 مەترمەن تحي تحۋ تحاو (ۆەتنام) تۇيىندەدى. ال تاعى ءبىر قازاقستاندىق اتلەت ماريا وۆچيننيكوۆا ءتورتىنشى ورىندى قاناعات تۇتتى –13.00 مەتر.
– وزگە ەلدە قازاقستاننىڭ ءانۇرانىن شىرقاپ, ەلىننىڭ تۋىن كوككە كوتەرگەندە ەرەكشە اسەردە بولاسىڭ. بۇل ساتتەگى ەموتسيانى ايتىپ جەتكىزۋ قيىن. ناتيجەم اسا جوعارى دا تومەن دە ەمەس, ورتاشا دەسەم بولدى. سوندىقتان بۇگىنگى كورسەتكەن ونەرىمە +4 دەگەن باعا قويامىن. ەندى ۇزىندىققا سەكىرۋدەن قاتىسامىن. شامام كەلگەنشە قازاقستان قۇراماسىنا تاعى ءبىر جۇلدە سىيلاسام دەپ ۇمىتتەنەمىن», – دەيدى ءۇش قارعىپ سەكىرۋدەن 2018 جىلعى جابىق كەشەندەگى ازيا چەمپيوناتىنىڭ جەڭىمپازى يرينا ەكتوۆا.
بيىكتىكككە cەكىرۋدەن شىعىس قازاقستان وبلىسىنىڭ سپورتشىسى نادەجدا دۋبوۆيتسكايا قولا جۇلدەگە قول جەتكىزدى. جەرلەسىمىز تەگەراندا 1.80 مەتردى باعىندىردى. نەگىزى جەرگىلىكتى سپورتشى سەپيدەح تاۆاكوليدىڭ دە كورسەتكىشى نادەجدامەن بىردەي بولعانىمەن, ول قوسىمشا كورسەتكىشتەر ارقاسىندا كۇمىس جۇلدەگە يە بولدى. ال وزبەكستاندىق ناديا دۋسانوۆا 2018 جىلعى جابىق كەشەندەگى ازيا بىرىنشىلىگىنىڭ چەمپيونى اتاندى (1.87 م).
سونداي-اق 60 جانە 400 مەترگە جۇگىرگەن قىزدارىمىز فينالعا شىقتى. ەڭ قىسقا قاشىقتىقتا ريما كاشافۋتدينوۆا مەن ۆيكتوريا زيابكينا ونەر كورسەتسە, 400 مەتردە ەلينا ميحينا مەن سۆەتلانا گولەندوۆا بار. ەرلەردەن 400 مەترگە فينالدا ميحايل ليتۆين جۇگىرەدى. ول بۇگىن ىرىكتەۋ كەزەڭىن 48.35 سەكۋندتا جۇگىرىپ ءوتتى.