«انادولۋ» اگەنتتىگىنىڭ حابارلاۋىنشا, قاڭتاردىڭ جيىرماسىندا تۇركيا قارۋلى كۇشتەرىنىڭ باس شتابى كۇردتەردىڭ باقىلاۋىنداعى سيريانىڭ سولتۇستىك-باتىسىندا ورنالاسقان افرين قالاسىندا سوعىس وپەراتسياسىنىڭ باستالعانىن رەسمي مالىمدەگەن.
ء«زايتۇن بۇتاعى» دەپ اتالعان وپەراتسياعا تۇرىك اسكەرىنىڭ قولداۋىنا يە سيرياداعى وپپوزيتسيالىق كۇشتەردىڭ وتريادتارى تارتىلعان. سونداي-اق تۇركيا اسكەري اۆياتسياعا جۇگىنۋدە. انكارانىڭ مالىمدەۋىنشە, اسكەري وپەراتسيانىڭ ماقساتى – تۇركيانىڭ شەكاراسىن قورعاۋ, ايماقتاعى قاۋىپسىزدىكتى قامتاماسىز ەتۋ, كۇرد جاساقتارى مەن دايش-كە قارسى تۇرۋ.
حالىقارالىق قاۋىمداستىقتا سيرياداعى كۇردتەردىڭ YPG توبىنا قاتىستى كوزقاراس بىرجاقتى ەمەس. تۇركيا YPG (كۇرد. Yekîneyên Parastina Gel – حالىقتى قورعاۋ جاساقتارى – رەد.) دەپ اتالاتىن كۇرد جاساقتارى توبىن بۇرىننان كۇردىستاننىڭ جۇمىسشىلار پارتياسىمەن (PPK) بايلانىسى بار تەرروريستىك ۇيىم رەتىندە باعالايدى. سوندىقتان دا توپتىڭ سيريانىڭ سولتۇستىگىندەگى ايماقتاردى دايش اسكەرىنەن ازات ەتۋىن ءوز تەرريتورياسىنا قاۋىپ دەپ كورەدى. ال بۇۇ, ەو جانە اقش سيريالىق كۇردتەردىڭ YPG توبىن دايش-كە قارسى ءتيىمدى كۇش رەتىندە باعالايدى. اقش تۇركياعا YPG توبىنا قارسى اسكەري شابۋىلدى توقتاتۋ ءۇشىن قىسىم جاساپ, سيريالىق كۇردتەردى وپەراتسيالار اۋماعىن كەڭەيتپەۋگە شاقىرىپ كەلگەن. ەو تۇركيانى سيريا تەرريتورياسىنداعى اسكەري وپەراتسيالاردان باس تارتىپ, الەمدىك الپاۋىتتاردىڭ ەلدەگى جاعدايدى تۇراقتاندىرۋعا باعىتتالعان تالپىنىستارىن جوققا شىعارماۋعا شاقىرۋدا. بۇۇ تۇركيانى حالىقارالىق زاڭ تالاپتارىنا ساي ارەكەت ەتۋگە ۇندەۋدە.
ساراپشىلار تۇركيانىڭ بۇل قادامى سيرياداعى جاعدايدى ودان ءارى ۋشىقتىرا تۇسەدى دەگەن ويدا. لوندونداعى Teneo Intelligence كومپانياسىنىڭ نەگىزىن سالۋشىلاردىڭ ءبىرى ۋولفانگو پيككولي Bloomberg-كە «تۇركيانىڭ افرين قالاسىنداعى بۇل وپەراتسيا جەتى جىل بويى سوزىلىپ كەلە جاتقان سوعىستا جاڭا وشاقتىڭ تۇتانۋىنا سەبەپ بولىپ قانا قويماي, انكارا مەن ۆاشينگتون اراسىندا ۋشىعىپ تۇرعان بايلانىستى ودان سايىن كۇردەلەندىرە تۇسەدى» دەگەن پىكىرىن بىلدىرگەن.
ۆۆس-ءدىڭ حابارلاۋىنشا, تۇركيانىڭ وسى ۋاقىتقا دەيىن جالعاسىپ كەلگەن شابۋىلدارىنا قاراماستان اقش-تان قولداۋ تاپقان سيرياداعى كۇردتەردىڭ YPG توبى مەن ارابتاردىڭ سيريانىڭ دەموكراتيالىق كۇشتەرى (SDF) ۇيىمى اراسىنداعى وداق ءتۇرلى تەرروريستىك ۇيىمداردىڭ باقىلاۋىنداعى بىرنەشە ستراتەگيالىق ايماقتى ءوز باقىلاۋىنا العان. وسى ايدا وداق جيحادشىلاردى تۇركيامەن شەكاراداعى جارابلۋس قالاسىنا قاراي شەگىنۋگە ماجبۇرلەگەن. جارابلۋس قالاسى دايش-كە قارسى كۇرەستىڭ كەلەسى نىساناسى بولادى دەگەن پىكىر بار. ال تۇركيا بولسا سيريانىڭ سولتۇستىگىندە «بۋففەرلى زونا» قۇرۋ ءۇشىن ماڭىزدى سانالاتىن شەكاراداعى ازاز قالاسىن كۇردتەر باسىپ الادى دەپ قاۋىپتەنۋدە.
كۇردتەر اقش باستاعان دايش-كە قارسى كواليتسيانى كەزىندە تۇركيا مەن يراكتاعى كۇردىستاننىڭ جۇمىسشىلار پارتياسىن (PPK) شابۋىلداۋعا پايدالانسا, قازىر ونى سيريانىڭ سولتۇستىگىندەگى YPG توبىنا قارسى پايدالانۋدا دەپ ايىپتاۋدا. كۇردتەردىڭ ايتۋىنشا, تۇركيانىڭ ولارعا قارسى شابۋىلى دايش-ءتىڭ كۇشەيۋىنە جاعداي جاساپ, سيريا مەن يراكتاعى كۇرد فرونتتارىنىڭ السىرەۋىنە اكەلەدى-ءمىس.