اۋدان ورتالىعىندا بىلتىر شاعىن اەرودروم قۇرىلىسى باستالدى.
ءبىر جىلدا قۇرىلىسى دا اياقتالدى. ءبىر-ەكى رەت ۇشۋ باعىتىن سىناپ كورگەن ۇشاق قوندى. سودان بەرى باياناۋىلعا ۇشاقپەن ۇشقان جولاۋشىلار جايلى ەستىلمەيدى. بىراق, اۋدان اكىمدىگى قازىر ءبىر ەمەس, بىرىنەن سوڭ ءبىرى 20 ۇشاق قوندىرا الامىز دەپ وتىر. ءسويتىپ, تۋريستەردىڭ كەلىپ-كەتۋىنە جاعداي جاسايدى. چارتەرلىك رەيستەر قابىلداۋدى دا جوسپارلاۋدا. قاراجات ءبولىندى, ۇشاق بار, اەرودروم دايىن, جولاۋشى سۇرانىسى ارتسا بولدى. وبلىس اكىمدىگىنىڭ مالىمەتىنشە, استانا-باياناۋىل, قاراعاندى-باياناۋىل, پاۆلودار-باياناۋىل باعىتتارىنان شاعىن ۇشاقتاردى قابىلداماق. باستاپقى ەكى باعىت رەسپۋبليكالىق بيۋدجەتتەن, ىشكى رەيستەر وبلىس بيۋدجەتىنەن سۋبسيديالانباق. اۋە رەيستەرىن جاساۋعا 2 اۆياكومپانيا دايىن كورىنەدى.
ۇشتى, ۇشتى ۇشاق ۇشادى! تاعى دا اەرودرومعا ارنالعان جوبالىق-سمەتالىق قۇجات, جوبا-جوسپار جاسالىپتى. اۋەگە ارنالعان جوبالاردىڭ ورىندالۋى ءۇشىن شامامەن تاعى دا 250 ميلليون تەڭگە كەرەك كورىنەدى. نەگىزى بۇنداي قىرۋار قاراجات جەرگە دە كەرەك: باياناۋىلعا باراتىن رەسپۋبليكالىق جول ءالى جوندەلمەي تۇر. جىلداعى كوكتەمگى سۋ تاسقىنىنا دايىندىق جۇمىستارى دا كۇتىپ تۇر. جول بويىنداعى مايقايىڭ كەنتى ماڭايىنان سۋ قويماسى سالىنسا, تاسقىن سۋدىڭ ارناسى بۇرىلىپ, اۋىلدار ۇريەلەنبەس ەدى.
فاريدا بىقاي, «ەگەمەن قازاقستان»